Inkera y’Abatutsi
Ni mu nkera yo mu Rugwiro
Urugamba rutanze agahenge
Urugwiro rutozwa intore
Abatutsi batebya
Useserejwe agaseka urumenesha ashira
Ngo atazinga umunya nk’umunyamusozi
Uwa Kagame ushakirwa abakannyi
Barahira birenga ngo haba ah’ipasi
Binaniranye bawubatiza umudende
Ngo badakanga Rutenderi
Kuko ariwe nyir’ igisenge
Ingando yashojwe amatara yaka
Batangaza ko Kagame yabaye uwa mbere
Nyamwasa bamugira uwa nyuma
Nyamara ngo bose batsinze
Bahabwa icyemezo cy’ubutore
Nyamwasa ananirwa gushinjagira ashira
Uwo mwanya ntiwari umunyuze
Arega abatoza kubera
Ananirwa guseka urumenesha yatojwe
Ijwi ryajemo amakaraza
Ati tubwizanye ukuri nk’abatutsi
Ibyo nabyo bimubera icyaha
Ngo asheshereje umuhutu Bazivamo
Yiregura avuga ko yamwibeshyeho
Akaba yamwitaga imfura
Cyane ko no ku butumire
Byiswe inkera y’abatutsi
Bazivamo amuca mu ijambo
Ati nihuturiye ku nkota
Ntaza guhohoterwa mpezwa
Nkajyana iyi nzara kandi ameza andembuza
Baraseka bya gitutsi
Ijambo rihabwa Nyiramongi
Abatumira ku mafunguro
Rutaremara rw’umujiji
Muri iyo nkera yitwa umuvunyi
Yatijwe kuyobora imihango
Mbere yo kwegera ameza
Abasubiriramo imigenzo n’imiziririzo
Ngo imfura iranywa ntirya
Naryo ryari isomo ry’ingando
Ngo bitaba amasigarabyicaro
Bagakorera amahano ku murinzi
Nyamara inyama zari amoko amagana
Bamwe bati ni ikizami
Rutaremara abivuga asanga ameza
Isahani mu ntoki iruta urutaro
Amaso yamushize imutwe
Arebana indagara ubwuzu
Abatutsi bati sigaho
Watubwiye ko indagara zitera inka iragara
Arivuguruza uko abimenyereye
Ati navuze inyama sinavuze indagara
Umudaho awufatana igihunga awucuritse
Ayorana umushyitsi ntibyaza
Ati utu dushenzi turansuzuguye
Ntiyazuyaza ashoramo intoki
Nyiramongi aguye mu kantu
Ati humura mabuja nakarabye
Igihe twari ku isomo ry’isuku
Ibyo nabyo barabiseka bya gitutsi
Nziza avuga ahunitse bagwa mu kantu
Ati noneho niba utu tuginga duca inka tugasigara
Twerure tworore indagara
Zo zidasaba umunyu n’urwuri
Abamuzi bati asanzwe avuga urukiga
Banamubera abagabo ko ari umututsi
Muligande isengesho aricamo kabiri
Isahani ya Musoni arayiraha avuga amina
Musoni ntiyiha akabanga azinga ishati
Karegeya k’umuhima abishongoraho
Ati mu bisanzwe abatutsi barasaniraga inka
Ngo urugamba rw’indagara ntibazarukira
Kabayija amuca mu ijambo
Ati ibyo si ishyano si n’amahano
Murabizi iby’ubworozi narabyize
Muri gahunda y’iterambere
Tuzasimbuza inka indagara
Twabitangije kumena amata
Abatutsi barijujuta ngo yishe ikinyarwanda
Ngo amata ntamenwa arabogorwa
Ati sory baraseka
Nabwo barenzaho bya gitutsi
Inyumba yafashaga Nyiramongi
Asezera adashoje aharira abato
Nyiramongi aramucyaha
Ati ko utatanze ibinyobwa
Inyumba arahira nyiri igisenge
Ati banywe amazi y’indagara
Aruta iyo nkangaza y’abazungu
Abivuga ayagotomera
Amenetse ku gishura ayakamurira ku mbehe
Rudasingwa arasuma
Asingira umudaho
We ntiyawaruza arawurisha
Batereye hejuru icyarimwe
Asaba imbabazi nyir’igisenge
Ati nandavuriye ubusa
Twa dutindi nsanze turura
Bacisha make ariheza
Yicara imbere ya Rusesabagina
Wari watumiwe na Nyiramirimo
Baza gushwanira mu nkera
Bapfa ubusa nk’uburarwa
Ngo Rusesabagina yanze indagara
Ubwo ngo yanze gusabana
No kwihutura ngo ase n’abandi
Ataba igitotsi mu batutsi
Apfukamira nyiri igisenge
Avuga ibisekuru agira bitatu
Ati nemerwe nk’umuhutu
Nubahwe nk’imfura
Asomya inkangaza Rudasingwa
Nterera ijisho aho bicaye
Mbona ntihageze indagara
Undi wari wifashe ni Kagame
Mbajije Nyiramongi impamvu
Ati namusigiye umurwi ukwiye umugaba
Ntajya asangira na rubanda.
Nza no kumenya bingoye
Ko indagara ari gahunda y’ingoma
Ivura ingarisi umudari
Mbajije iby’izisabiriza inyuma y’urugo
Bati gahunda ni ndende
Umunsi wari uciye ikibu
Abatutsi basakabaga
Nyamara batasinze
Bamwe bafashe akabando
Basigasira amabondo
Indagara zabaye indagara
Kalisa na Mutsindashyaka banyuzwa mu misoto
Bagaruka mu nkera bahotswe
Ndaranganya amaso mu nkera
Abatutsi batasize n’iyonka
Mbonamo abasazi
Mbonamo abasizi
Mbonamo imfura nke
N’ubututsi butuye mu mfuruka z’abatutsi
Bushinzwe gusetsa no guseka urumenesha
Nyamara bose biswe abatutsi
Mbona Roza Kabuye abebera
N’imbehe y’indagara mu gikondorero
Akebaguza yiheza
Asekura inkingi agwa agaramye
Twikanga ko akuyemo inda
Bitaratinda turahumurizwa
Ngo ntiyari inda zari indagara
Baraseka bya gitutsi
Mu basizi mbona Ngarambe
N’inkoni n’inkuyo
Avuga amazina y’indagara
Mbanza no kugira ngo ni ay’inka
Nibuka ko muri gahunda y’ingoma
Inka zasimbuwe n’indagara
Mu basazi mbona Mazimpaka
Yari yanze kurya indagara
N’itoroshi mu ntoki amurika
Nyamara amatara mu rugwiro ari inzora
Mubajije icyo ahamura ati ndashakisha
Musobanuje icyo yataye
Ati nabuze umututsi mu nkera
Menya ntyo ko ari umusazi
Mwereka umubyeyi wari hafi y’umugabe
Yari yasokoje uruhanika
Asa na nyina w’Imana
Nawe amubonera inenge
Ngo yagorewe ku ngoma nka Murorunkwere
Acuruza amata ari umugabekazi
Icyansi kimwe ku ruhimbi
kivanwamo amata
Cyibikwamo amahera
Sinizimba mu magambo
Mwereka Bizimungu
Wasaga n’uwigunze
Nka Musinga ku Nkombo
Nawe amubonera icyaha
Ngo yagizwe umworo yari umwiru
Ibyo binyibutsa Kayijuka k’impumyi
Nti nibyo ingoma zifitanye isano
Sinanabitindaho turakomeza
Mwereka Biruta wasinziriye mu nkera
Umutwe urambitse mu mbehe
Ayikomba agona nyamara akamira
Abonerwa inenge ngo si umututsi ni Nkundiye
Binyibutsa mwene Kabego
Wahatswe neza n’ingoma yambaye se
Nshaka isano ndaribura
Sinanabasha gukomeza
Umukono Polisi asaba ijambo
Ashimira Kagame n’indagara
Ati kera abatutsi bacyorora inka
Bavugaga ko zisa na nyirazo
None izi ndagara zisa na Kagame
Abatutsi bagwa mu kantu
Kamaze umwanya nk’uwo guhumbya
Bihozagara ava ku ntebe
Agwa yubamye araramya
Asenga nyir’igisenge
Ati ungire umushumba mwimanyi
Iby’ubworozi narabyize
Ndagire indagara ubwo zikamwa
Baraseka barenzaho
Mukankomeje yiha ijambo
Arateshaguzwa bagwa mu kantu
Ashima Kagame akeza indagara
Arahimbarwa arataraka
Akura inkanda asa n’ubandwa
Bitera Musoni isoni n’ubwuzu
Ahisha amaso mu gishura cya Kirabo
Bitera isoni abatutsi
Basaba Kagame gusoza ingando
Basoza bavuza impanda
Uwo munsi wandikwa mu mateka
Ngo usimbure uw’intwari
Witwe umunsi w’indagara
Benjah Rutabana
Source:http://www.editions-sources-du-nil.com/article-inkera-y-abatutsi-87006195.html
