Ibihugu bya Afurika ntibyabashije kumvikana ngo bitere ishoti urukiko mpanabyaha rwa La Haye.

download

Ku wa gatandatu taliki ya 12 Ukwakira 2012, ku cyicaro cy’umuryango w’ubumwe bwa Afurika  Addis Abebba muri Ethipia, ibihugu bya Afurika ntibyabashije kumvikana ku masezerano yo kwitandukanya n’urukiko mpanabyaha rukorera I La Haye mu Buholandi. Mbere gato y’iyi nama, amakuru yakomeje guhwihwiswa ko Afurika izahita icana umubano n’uru rukiko bitewe  ngo n’uko rudaha icyubahiro Abayobozi b’Abanyafurika. Iki kibazo cyazamuwe n’uko uru rukiko rwatangiye kuburanisha Visi Perezida wa Kenya Bwana William Ruto ku birego by’ubwicanyi bwabaye nyuma y’amatora yo mu mwaka wa 2007. Undi uteganyijwe gukurikiranwa ni Perezida Uhuru Kenyatta na we uregwa iby’ubwo bwicanyi.

Bimwe mu bihugu bya Afurika bisanga umuntu ukiri mu mirimo y’ubuyobozi atagombye gukurikiranwa, mu rwego rwo kubaha abamugiriye icyizere. Abandi bo basanga biramutse byemejwe bitya kwaba ari ukongera gushishikarira Abaperezida bakoze ibyaha kutarekura ubutegetsi. Reka dufate urugero: Mu ntambara Museveni yarwanye mbere y’uko afata ubutegetsi, yishe abantu benshi mu karere ka Luwero kugira ngo abigereke kuri leta yariho. Nyuma yaho kandi yicishije Abenegihugu bo mu majyaruguru ndetse abasahura inka zabo ashingiye ku ngengabitekerezo y’uko nta bundi bwoko bwigeze bworora inka uretse ubwo akomokamo bw’Abahima. Imyaka ibaye 27 Museveni ari ku butegetsi kandi aracyashaka gukomeza. Biramutse byemejwe ko yakurikiranwa kuri ibyo byaha, Museveni yakora uko ashoboye kose ngo atazavaho kugeza apfuye. Uru rugero umuntu yarufata no kuri Paul Kagame ufite ibyaha biruta iby’ingurube.

Tugarutse ku nama yo kuwa 12 Ukwakira, igitangira ibihugu byacitsemo ibice bibiri, igice kimwe gishyigikiye ko Afurika itakongera gukorana n’urukiko, ikindi gishyiikiye uru rukiko. Igice cyashakaga kuva mu rukiko kigizwe n’ibihugu bya Algeria, Ethiopia, Ghana,  Kenya, Malawi, Nigeria, Rwanda, South Africa, Sudan, Tanzania, Uganda na Zimbabwe.

Igihugu cya Kenya kivuga ko cyababajwe n’amagambo yavuzwe mu gihe urubanza rwa Ruto rwatangiraga. Ayo magambo yavuzwe n’umushinjacyaha yasabaga ko Kenya yashyiraho umusimbura wa Ruto kugira ngo imirimo y’urukiko itazabangamirwa. Kubera aya magambo, Kenya yasabye ibindi bihugu bya Afurika kuyishyigikira ngo kuko inkoni ikubise mukeba bayirenza urugo.

Ibi rero biragoye kubyemeza ibihugu biyoborwa n’abaperezida batagira icyo bikeka. Kuri bo ni nko guca wa mugani w’injangwe yacitse umurizo. Ngo umunsi umwe injangwe yagiye kwiba inkoko ifatwa mu mutego uyica umurizo isigarana akanifu. Kuva icyo gihe yagize ipfunwe kuko aho yanyuraga hose izindi zayisekaga. Ni uko yigira inama yo gutumiza izindi ngo zigirane ikiganiro. Mu gihe zaganiraga, izindi zari zatembagaye kubera ukuntu iyacitse umurizo yasaga. Ni uko injangwe yacitse umurizo irahaguruka iti: “Bavandimwe ndashaka kubagira inama. Burya imirizo yacu iratugora cyane rwose, cyane cyane nk’iyo tugiye kwifatira imbeba( yanze kuvuga ko ijya ifata n’inkoko) hari igihe tuzunguza umurizo maze imbeba zikamenya aho duherereye. None njye nasanze ari byiza ko nawuca kugira ngo njye mbasha gukora operation nta kibazo. Nkaba nagiraga ngo namwe munkurikize”. Izindi zarasetse cyane zikomeza kuyinnyega ziti “wavuze ko wagiza insanganya ( accident)! None urashaka kudushuka ngo natwe duce imirizo yacu kandi ntacyo idutwaye.

Umuntu agenekereje yasanga Kenya hamwe n’ibindi bihugu biyoborwa n’abicanyi byaravugaga biti: “Bavandimwe Banyafurika, ruriya rukiko ruratugora cyane rwose, cyane cyane iyo tumaze kwiyicira ibiturage ( batuka abaturage) dukurikiranye ubutegetsi cyangwa se twiyibira imitungo mu bindi bihugu. Twe ku bwacu twasanze icyemezo cyiza ari ugukuraho ruriya rukiko kugira ngo tujye twikorera ibyaha ntawe twikanga. None turagira ngo namwe mudukurikize”.

Ibihugu bivuga igifransa byo bisanga kwitandukanya n’urukiko bikwiye gukorwa igihugu ku gihugu bidakozwe mu kivunge. Byasabye umuryango w’ubumwe bw’Afurika gushyikiriza iki kibazo umuryango w’Abibumbye.

Ibihugu bya Senegal, Cote d’Ivoire, Gambia, Mali na Burkina Faso byemeza ko ruriya rukiko rufite akamaro cyane kuko umuryango w’Ubumwe bw’Afurika utajya wihutira gukemura ibibazo by’amakimbirane ku mugabane. Aha bavuze nk’ikibazo cyo mu Burasirazuba bwa Congo, ikibazo cyo muri Nigeria cya Boko Haram, n’ibibazo biheruka muri Mali aho umuryango w ‘ibihugu bya Afurika wananiwe kugira icyo ubikoraho mu maguru mashya. . Botswana nayo yunze mu ry’ibi bihugu mu kwemeza ko n’iyo abayobozi bakiri mu kazi batakorwaho, hadakwiye kubaho gushyigikira ubukozi bw’ibibi.

Umunyamabanga mukuru w’umuryango w’abibumbye yahamagaye buri mu perezida ku giti cye abasaba ko batakwitandukanya n’amasezerano ya Roma yashyizeho ruriya rukiko, anemeza ko azakora uko ashoboye ngo amasezerano asubirwemo.Twibutse ko umuryango w’ibihugu by’Afurika byahaye umuryango w’Abibumbye kugeza ku itariki ya 12 Ugushyingo ngo igisubizo kibe cyabonetse, bitaba ibyo, hagafatwa ingamba zikakaye, izi ngamba benshi bakeka ko zaba ugusezerera ruriya rukiko.

 Dukomeze tubitege amaso.

 Chaste Gahunde

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s