Category Archives: Politiki

Kagame i Vatikani: Iyo umugabo yasumbirijwe asubira ku cyo yangana !

UMUNYAGITUGU PAUL KAGAME YAHAWE UMUKORO WO GUSUBIZA UBUSITANI AHO YAHINDUYE UBUTAYU !

1.Mu gihe abanyamahanga benshi mu bamufashije kugera ku butegetsi bamaze kumutahura bakaba bakomeje kumutera utwatsi kubera inyota ye ikabije y’ubutegetsi, Umunyagitugu Paul Kagame ahisemo kugarukira Kiliziya Gatolika yari yarateye umugongo n’imijugujugu mu gihe cy’imyaka isaga 23 amaze ku butegetsi.

2.Koko rero guhera taliki ya 19 kugera kuya 20 /3/2017 Umunyagitugu Paul Kagame ari mu ruzinduko i Vatikani. Uru ruzinduko yari yararwifuje cyane muri iyi minsi ye ya nyuma: ni ubwambere yicishije bugufi akagaragaza ko akeneye cyane kuvugana n’umushumba wa Kiliziya gatolika.

3.Nk’uko twese tubyibuka, guhera mu mwaka w’1994 Umunyagitugu Paul Kagame yaranzwe no gutinya Kiliziya Gatolika, kuyiharabika, kuyitoteza bya hato na hato no kuyigirira nabi mu buryo bwinshi bunyuranye. Ntacyo atakoze ngo ayicengere, bimunaniye ashakisha uko yayibabaza bikomeye, byamushobokera akayisenya ikavaho . Yagerageje kuyica umutwe mu kwica Abepiskopi bane, afunga Musenyeri Misago , abapadiri , ababikira n’Abafurere batagira ingano kandi atorongeza abandi Bihayimana benshi.

4.N’ubwo bivugwa ko Umunyagitugu Paul Kagame yaba yarabatijwe ndetse akaba ari umuyoboke wa Kiliziya Gatolika, yakunze kwigaragaza nk’umuntu w’indakoreka, udaha agaciro na gake iyobokamana, haba mu magambo ye ndetse no mu bikorwa.

5.Ubwo rero yisubiyeho agafata icyemezo cyo kujya i Vatikani kwivuganira na Nyirubutungane Papa Francis, maze Papa nawe akamwakira nk’umubyeyi udahutaza umwana w’ikirara, turasanga iyi ntambwe itewe ikwiye gushimwa kuko ishobora kugirira Abanyarwanda bose akamaro.

6.Ibyo Paul Kagame yaganiriye n’abayobozi bakuru ba Kiliziya gatolika ni byinshi kandi ntabwo byose byavugwa mu itangazo risoza uru ruzinduko. Ikitashyizwe mu itangazamakuru ni uko yabwijwe ukuri ku byerekeye ibibazo bikomereye igihugu cyacu ndetse n’akarere k’Ibiyaga bigari, n’uruhare rukomeye abifitemo .

7.Mu mpano Umunyagitugu Paul Kagame yahawe uretse ibitabo bitatu byanditswe na Papa Francis, yashyikirijwe kandi n’UMUDARI ushushanyijeho UBUTAYU, Papa akaba yahaye Paul Kagame umukoro wo gukora ibishoboka byose akagarura UBUSITANI aho yahinduye .

8.Twese tuzi ukuntu u Rwanda ndetse n’Akarere k’Ibiyaga bigari Umunyagitugu Paul Kagame yahahinduye ubutayu. Abaturage b’u Rwanda bageze igihe “barya imbwa” kubera kwicishwa inzara, akarengane kahawe intebe, urubuga rwa politiki rufunze, ivangura mu itangwa ry’imirimo n’amashuri ryarenze igipimo…. Paul Kagame ageze n’ubwo afunga Kaminuza ya Gitwe kuko ariyo yonyine yahaga abana bose itavanguye amahirwe yo kwiga iby’ubuvuzi !

Kuba Papa atangaza ko “asaba Imana imbabazi” ku byaha bikomeye byakozwe n’abakirisitu gatolika harimo na Jenoside ntakwiye kubigayirwa kuko ari inshingano ye nk’umushumba. Umunyagitugu Paul Kagame nawe ubwe yabitangariye atangaza ku rubuga rwe rwa Twitter ko abibonamo igikorwa cy’ubutwari n’ubweramutima bukomeye .
Icyo Nyirubutungane Papa Francis yashatse kwigisha Umunyagitugu Paul Kagame ni uko umunyabyaha ukwiye gusaba imbabazi kurusha abandi ari Paul KAGAME ubwe kuko ariwe wikoreye ku mutwe we ibyaha bikomeye cyane byahemukiye benshi. Abo yapfakaje, abo yagize impfubyi,abo yagize incike ….bamutezeho guhinduka mu mutima akabasaba imbabazi ku mugaragaro. Bitabaye ibyo urugendo avuyemo i Vatikani ruzamuviramo urubanza rukarishye mu minsi itarambiranye.

Umwanzuro

Twizeye ko uruzinduko rw’Umunyagitugu Paul Kagame i Vatikani rutaje nka ya mvugo ngo: “Iyo umugabo yasumbirijwe asubira ku cyo yangaga”.

Ubwo Paul Kagame yiviriye i Vatikani twizeye ko :

1.Yemera ko Abasenyeri Visenti Nsengiyumva na Yozefu Ruzindana yishe bakaba bagicumbikiwe by’agateganyo mu gituro kimwe i Kabwayi bajya gushyingurwa mu cyubahiro muri Katedalari zabo I Kigali n’i Byumba

2.Agiye guha abasenyeri ba Kiliziya Gatolika amahoro ntazongere kubabuza uburyo abahatira gukora ibitari mu nshingano zabo

Afungura imfungwa zose zifungiye ubusa zirimo Victoire Ingabire na Deogratias Mushayidi
Akingura urubuga rwa politiki , amashyaka ya politiki akiyandikisha mu mutuzo kandi akazagira uruhare mu matora yegereje
Yihutira kuganira na Guverinoma y’u Rwanda ikorera mu buhungiro nayo iremo yitegura kujya kuganira na Nyirubutungane Papa Francis.

Harakabaho Repubulika y’u Rwanda

Harakabaho umubano mwiza hagati ya Vatikani n’u Rwanda

Padiri Thomas Nahimana,

Perezida wa Guverinoma y’u Rwanda ikorera mu buhungiro

Umukandida mu matora ya Perezida wa Repubulika yo mu 2017.

Rwanda: Impamvu 20 zatumye hashyirwaho Guverinoma y’u Rwanda ikorera mu buhungiro

Leave a reply

Tariki ya 20 Gashyantare 2017 i Paris mu Bufaransa harangiye umwiherero wahuje abanyapolitiki baturutse mu mashyaka atandukanye atavuga rumwe na FPR-Inkotanyi, abakangurambaga ba sosiyete sivile ndetse n’abandi banyarwanda bifuza impinduka mu Rwanda. Mu myanzuro bafashe harimo gushyiraho Guverinoma y’u Rwanda ikorera mu buhungiro, bayiha intego yo gusimbura Leta ya Kagame igaragaza ko icyuye igihe.

Impamvu zatumye bashyiraho iyo Guverinoma zikubiye mu ngingo 20. Izi ngingo zose iyo uzisesenguye usanga zemezwa n’amaraporo atandukanye atangazwa n’imiryango mpuzamahanga iharanira uburenganzira bw’ikiremwamuntu ndetse n’ibihugu bikomeye nka Leta Zunze Ubumwe z’Amerika (USA) ndetse n’ibihugu by’Uburayi. Dore izo ngingo:

Leta iyobowe na Paul KAGAME

Yafunze burundu urubuga rwa politiki kugirango rwikubirwe n’Ishyaka rukumbi rya FPR-Inkotanyi n’umuyobozi waryo Paul Kagame umaze imyaka isaga 23 ku butegetsi ;
Yafashe icyemezo kigayitse kandi gihonyora itegekonshinga n’andi mategeko agenga u Rwanda muri iki gihe cyo kubuza kwinjira ku butaka bw’u Rwanda abenegihugu bagize Ikipe ya Padiri Thomas Nahimana umuyobozi w’Ishyaka ISHEMA akaba n’umukandida mu matora ya Perezida wa Repubulika ateganyijwe muri Kanama 2017; bikaba byaragaragaye ko taliki ya 23/11/2016 Guverinoma ya Paul Kagame yanditse urwandiko rushyira iterabwoba ku makompanyi yose y’indege ageza abagenzi mu Rwanda ruyabuza gutwara Padiri Thomas Nahimana n’Ikipe ye bityo bakaba barasohowe mu ndege taliki ya 23/11/2016 i Nayirobi muri Kenya ndetse no ku italiki ya 23/01/2017 i Buruseli mu Bubiligi;
Yibye amajwi mu matora y’umukuru w’igihugu yo mu 2003 no mu 2010 kugira ngo Paul Kagame akomeze abe umukuru w’igihugu kandi mu by’ukuri atatowe na rubanda;
Ibinyujije muri Referendumu itekenitse yabaye mu Ukuboza 2015, yahinduye ingingo y’101 y’itegekonshinga ryo mu 2003 yateganyaga ko nta mukuru w’igihugu ugomba gutorerwa manda zirenze ebyiri, bikorwa hagamijwe guha Paul Kagame icyanzu cyo gukomeza kwiba ubutegetsi kugeza apfiriye ku ntebe y’umukuru w’igihugu;
Ifata igafunga, ikica (André RWISEREKA) cyangwa igatorongeza Abalideri b’amashyaka ya politiki ya Opozisiyo, abanyamakuru n’abakangurambaga b’amashyirahamwe aharanira iyubahirizwa ry’uburenganzira bw’ikiremwa-muntu ;
Yafunze ikanakatira gufungwa burundu Bwana Déogratias MUSHAYIDI wazize kuba aharanira impinduka nziza mu mitegekere y’igihugu cye ;
Yafunze ikanakatira imyaka 15 y’igifungo cy’akamama Madame Victoire INGABIRE UMUHOZA watashye mu Rwanda mu mwaka wa 2010imuziza gusa ko yari agamije kwandikisha Ishyaka rye no kugira uruhare mu miyoborere y’igihugu cye ;
Yafunze ku buryo bw’akamama bwana Théoneste NIYITEGEKA, ikatira igihano cy’imyaka ine bwana NTAGANDA Bernard n’abandi benshi ibaziza gusa ko bashaka impinduka mu miyoborere y’igihugu ;
Yabujije inzego z’ubutabera ubwisanzure izihindura igikoresho cyo gufunga umubare urenze urugero w ‘abaturage barimo abadafite amadosiye, abafite amadosiye afifitse (atekinitse), n’abarangije ibihano ntibafungurwe ;
Ikoresha inzego zishinzwe umutekano mu bikorwa bigayitse by’iyicarubozo, igakubita, ikica, ikanafungira abenegihugu b’inzirakarengane mu myobo n’ahandi hatazwi kandi hatagerwa ‘imiryango yabo ;
Yakunze kugaba ibitero bya gisilikari ku banyarwanda bayihunze igamije kurimbura umubare munini w’abenegihugu ibatsinze mu mashyamba ya Kongo ;
Ikomeje ingeso yo gusanga impunzi z’Abanyarwanda mu bihugu zahungiyemo hagamijwe kuzibuza uburyo, kubangamira umutekano wazo ndetse no gucuza ubuzima bamwe muri zo (Colonel. Patrick KAREGEYA) ;
Yakwirakwije abasilikari mu giturage kugira ngo itere abenegihugu guhora bahagaritse umutima kubera iterabwoba rikaze ibahozamo ;
Ishyira imbere gahunda za politiki zigamije gukenesha rubanda no kubicisha inzara nko kubasenyera amazu, kubambura ibibanza n’amasambu byabo, kubarandurira imyaka iri mu mirima no gutema intoki, kubategeka guhinga igihingwa kimwe kitabafitiye akamaro ndetse ikanabahatira kwinjira mu makoperative atabafasha ahubwo agenewe kubanyunyuza imitsi ;
Yagize uruhare rukomeye mu guteza inzara ikomeye yiswe « Nzaramba », aho gufata ingamba ziwkiye ngo itabare abaturage bari kwicwa n’iyo nzara ihitamo kubihishira no gukomeza politiki mbisha yo kujijisha no gukina rubanda ku mubyimba ngo u Rwanda nta kibazo rufite, ngo uhubwo rwageze ku iterambere ry’akataraboneka ;
Yimika ivangura mu itangwa ry’akazi no mu itangwa rya buruse zo kujya kwiga ; ubwironde mu kwita ku mfubyi n’abapfakazi no mu gutanga serivisi zikenewe mu buzima bwa buri munsi ;
Yikubira amasosiyete yose y’ubucuruzi, igakubita kandi ikarasa ku manywa y’ihangu abaturage baciye bugufi yita ABAZUNGUZAYI bagerageza kwicururiza utwo bashoboye kugira ngo baronke ikiramira urubyaro rwabo ;
Isahura ikanasesagura umutungo w’igihugu ugakoreshwa mu kwigurira indege bwite za Perezida wa Repubulika no kuzikodesha Leta ku giciro gihenze cyane muri « business » zimufitiye akamaro, we n’Agatsiko ke ;
Iteza intambara z’urudaca n’umwiryane mu bihugu duturanye, by’umwihariko muri Repubulika iharanira Demokarasi ya Kongo no mu Burundi, ibyo bikaba bibangamiye cyane inyungu z’u Rwanda rufashwe nk’igihugu kiyobowe n’abanyarugomo bahungabanya umutekano mu Karere kose k’Ibiyaga bigari, ibi bikaba byaratangiye kugira ingaruka mbi ku buzima bw’abanyarwanda muri rusange ;
N’andi mahano menshi tutakwirirwa turondora

Biragaraga koko ko Paul KAGAME amaze kunanirwa akaba akwiye gusimburwa na Guverinoma ifite icyerekezo kinogeye Abanyarwanda.

Ubuyobozi bw’urubuga.

GUVERINOMA Y’ABANYARWANDA IKORERA MU BUHUNGIRO IRAMAGANA AMARORERWA YABEREYE MU MURENGE WA BUGARAMA TARIKI YA 12 WERURWE 2017

Leave a reply

ITANGAZO No 2017/03/002 RYA GUVERINOMA Y’ABANYARWANDA IKORERA MU BUHUNGIRO KU MARORERWA YABAEREYE MU MURENGE WA BUGARAMA TARIKI YA 12 WERURWE 2017

Banyarwanda, Banyarwandakazi Baturanyi b’u Rwanda namwe nshuti z’u Rwanda.

Nk’uko mubizi tariki ya 20 Gashyantare 2017 i Paris mu Bufaransa hasojwe inama yashyizeho Guverinoma y’abanyarwanda ikorera mu buhungiro. Impamvu zatumye iyo Guverinoma ijyaho nuko byamaze kugaragara ko Guverinoma ya FRP-Inkotanyi iyobowe na Paul Kagame yamaze gutakaza icyizere abaturage bari bayifiye. Muri iyo nama hemejwe ko iyo Guverinoma itagifite uburenganzira bwo kuvugira abaturage.
Uyu munsi rero nka Ministre ushinzwe ubutegetsi bw’igihugu n’iterambere ry’umurenge, tuzinduwe no gukomeza kubagaragariza buryo ki iyo Guverinoma iyobowe na Paul Kagame ikomeje gutakaza icyizere ku buryo itagishobora guha abanyarwanda umutekano kandi biri mu nshingano zayo z’ibanze.
Duhereye ku nkuru y’inshamugongo n’agahinda k’ibyabereye mu murenge wa Bugarama akagari ka Ryankana, akarere ka Rusizi intara y’uburengerazuba ,mu ijoro ryo kuwa gatandatu rishyira iryo ku cyumweru tariki ya 12 Werurwe 2017, ubwo abaturage b’inzirakarengane bari ku irondo bahohoterwaga n’abagizi ba nabi kugeza ubu tukaba tumaze kumenya ko hapfuye babiri aribo Manirafasha Benjamin w’imyaka 31, Ntabanganyimana Jerome w’imyaka 11 ndetse na Saidi w’imyaka 27 wakomeretse ku kaboko. N’ibyakurikiyeho byo kujujubya abaturage babatwikira amazu, bakabavana mu ngo zabo shishi itabona bakabakusanyiriza ahantu hamwe ari nako babambura amaterefone yabo agendanwa, birerekana nta shiti ko mu Rwanda nta mutekano uhari.

Banyarwanda,Banyarwandakazi,baturanyi b’u Rwanda namwe nshuti z’u Rwanda,

Ibi byabereye mu murenge wa Bugarama byo kwica abaturage b’inzirakarengane si ubwambere ingabo za FPR-Inkotanyi zibikora kuko murabizi ko mu minsi ishize ingabo za FPR-Inkotanyi ziyobowe na Paul Kagame zarashe abaturage b’abarundi zikabatsinda mu kiyaga cya Rweru, iby’abayisilamu bakomeje kwicirwa muri Kigali no mu Bugarama, imfungwa ziciwe muri cachot i Mudende, iyicwa rya madame Iragena Illumine wishwe amaze gukorerwa iyica rubozo, iraswa rya Docteur Gasakure, urupfu rwa nyakwigendera Assinapaul Rwigara, imirambo yatoraguwe mu kiyaga cya Rweru mu mwaka 2014 , urutonde ni rurerure. Abanyarwanda baburiwe irengero nabo urutonde ni rurerure ntawarurangiza hano. Ikibazo cy’imfungwa zitabalika zifungiwe akamama zimwe zizira ibitekerezo byazo, izindi zifunzwe nta madossier zifite, ndetse n’izarangije ibihano ariko zikaba zidafungurwa. Ibi byose biteza umutekano muke, wabiteranya ukibaza niba u Rwanda ruri mu bihe by’intambara cyangwa niba ruri mu bihe by’amahoro.
Muri iriya nkuru y’ibyabereye mu Bugarama twamenye ko abasirikare b’Inkotanyi bamaze guhuruzwa ,aho kugira ngo baze guhumuliza abaturage ahubwo baje akaba aribo bica inzira karengane nyinshi; aha umuntu akaba yakwibaza niba izo ngabo zibereyeho kurinda abaturage cyangwa zibereyeho kwica abaturage nk’uko zabigenje hariya. Gusa kuba ziriya ngabo aho gutabara ziza zikica abaturage, aho kubalindira umutekano zikababuza epfo na ruguru ntibitangaje kuko ziba zishyira mu bikorwa amasomo ya Perezida wazo Paul Kagame wihandageje akavuga ko yababajwe no kuba atarashoboye kumarira impunzi ku icumu zikamucika zigahungira muri Congo yitwaga Zaire, akongera akavugira i Nyabihu ko ingabo ze zizajya zirasa abaturage ku manywa y’ihangu izuba riva.

Banyarwanda,banyarwandakazi,baturanyi b’u Rwanda namwe nshuti z’u Rwanda

Kuba inzego zishinzwe kurinda umutekano w’abaturage arizo ziwubabuza mu gihugu kiyobowe na FPR-Inkotanyi na Kagame ntibitangaje kuko ari ubutegetsi bwagiyeho bukoresheje iterabwoba nyuma yo guhanura indege yari itwaye abakuru b’ibihugu babibi, aribo Juvenal Habyalimana w’u Rwanda na Perezida Cyprien Ntaryamira w’u Burundi.
Ubu butegetsi bwakwirakwije abasirikare kuri buri gasozi ko mu gihugu kugirango butere abaturage ubwoba, ku buryo ibyo ubu butegetsi bubeshya ko mu gihugu hari umutekano atari byo, ahubwo mu gihugu hose hari ubwoba. Ndetse na Kagame yarabyivugiye ubwo yasozaga umushyikirano ku nshuro ya cumi na kane ubwo yavugaga ko umunyarwanda asigaye abona bukeye akiruhutsa; bisobanura ko buri joro hari abanyarwanda baba batazi ko buribucye. Ibi birerekana ko Kagame yamaze kunanirwa n’inshingano yihaye, kuko naba mbeshye mvuze ko yazihawe n’abanyarwanda kuko twese tubizi ko atigeze atsinda amatora ahubwo yayibye.
Ku byabereye mu murenge wa Bugarama biratangaje kumva ko abasirikare bavuze ko abagabye icyo gitero ku bari bari ku irondo bahungiye i Burundi. Ese ko batari bahari ahubwo baje batabajwe babwiwe n’iki ko abo bahungiye i Burundi? Abanyarwanda turambiwe ingeso mbi y’urugomo n’ubushotoranyi Leta ya Kagame na FPR bakomeje kuzana ku bihugu bituranye n’u Rwanda. Iyo bitabaye Congo uyu munsi, ejo biba byabaye u Burundi. Tumaze iminsi twumva ko bikomye n’igihugu cya Uganda ngo kubera abafaransa bariyo. Turashima ubushishozi n’ubunararibonye abategetsi b’u Burundi bakomeje kugaragaza birinda kugwa mu mutego w’ubushotoranyi bategwa n’ubutegetsi bw’inkoramaraso bwa FPR –Inkotanyi na Kagame.

Banyarwanda,banyarwandakazi baturanyi b’u Rwanda,nshuti z’u Rwanda,

Ntitwarangiza tutihanganishije abaturage bo mu Bugarama babuze ababo kandi bakaba babokomeje kubuzwa epfo na ruguru n’ubutegetsi bw’inkotanyi.
Turihanganisha kandi abanyarwanda bose bo mu turere twose no mu moko yose bahekuwe n’ubutegetsi bubi buyobowe na Kagame.
Turihanganisha abanyarwanda bose kuko twagushije ishyano ryo gutegekwa na Leta mbisha ya FPR-Inkotanyi, yewe tutibagiwe n’ibihugu bituranye n’u Rwanda kuko ubutegetsi buriho mu Rwanda butababaniye neza; cyane cyane u Burundi.
Turasaba abaterankunga ba Guverinoma iyobowe na Kagame kuyihagarikira inkunga kuko igihe gishobora kuzagera abitwaga ko bari abaterankunga bakazitwa abafatanyabyaha.

Bikorewe mu Buholandi

Taliki ya 13 Werurwe 2017

Ministre w’Ubutegetsi bw’Igihugu n’Iterambere ry’Umurenge

Daniel NDUWIMANA

Itangazo « DUSHYIZEHO GUVERINOMA Y’U RWANDA IKORERA MU BUHUNGIRO »

2 Replies

ITANGAZO RIGENEWE ITANGAZAMAKURU

« DUSHYIZEHO GUVERINOMA Y’U RWANDA IKORERA MU BUHUNGIRO »

Twebwe abahagarariye amashyaka ya politiki ya Opozisiyo iharanira Demokarasi mu Rwanda, Abakangurambaga ba sosiyete sivile n’abikorera ku giti cyabo uko turi 30 twateraniye mu mwiherero udasanzwe i Paris, mu Bufaransa guhera taliki ya 17 kugeza kuya 19 Gashyantare 2017, dushishikajwe n’uko mu Rwanda haboneka ubutegetsi bunogeye abaturage,

I.TUMAZE KUBONA KO Guverinoma y’u Rwanda iyobowe na Jenerali Paul Kagame :

Yafunze burundu urubuga rwa politiki kugirango rwikubirwe n’Ishyaka rukumbi rya FPR-Inkotanyi n’umuyobozi waryo Paul Kagame umaze imyaka isaga 23 ku butegetsi ;
Yafashe icyemezo kigayitse kandi gihonyora itegekonshinga n’andi mategeko agenga u Rwanda muri iki gihe cyo kubuza kwinjira ku butaka bw’u Rwanda abenegihugu bagize Ikipe ya Padiri Thomas Nahimana umuyobozi w’Ishyaka ISHEMA akaba n’umukandida mu matora ya Perezida wa Repubulika ateganyijwe muri Kanama 2017; bikaba byaragaragaye ko taliki ya 23/11/2016 Guverinoma ya Paul Kagame yanditse urwandiko rushyira iterabwoba ku makompanyi yose y’indege ageza abagenzi mu Rwanda ruyabuza gutwara Padiri Thomas Nahimana n’Ikipe ye bityo bakaba barasohowe mu ndege taliki ya 23/11/2016 i Nayirobi muri Kenya ndetse no ku italiki ya 23/01/2017 i Buruseli mu Bubiligi;
Yibye amajwi mu matora y’umukuru w’igihugu yo mu 2003 no mu 2010 kugira ngo Paul Kagame akomeze abe umukuru w’igihugu kandi mu by’ukuri atatowe na rubanda;
Ibinyujije muri Referendumu itekenitse yabaye mu Ukuboza 2015, yahinduye ingingo y’101 y’itegekonshinga ryo mu 2003 yateganyaga ko nta mukuru w’igihugu ugomba gutorerwa manda zirenze ebyiri, bikorwa hagamijwe guha Paul Kagame icyanzu cyo gukomeza kwiba ubutegetsi kugeza apfiriye ku ntebe y’umukuru w’igihugu;
Ifata igafunga, ikica (André RWISEREKA) cyangwa igatorongeza Abalideri b’amashyaka ya politiki ya Opozisiyo, abanyamakuru n’abakangurambaga b’amashyirahamwe aharanira iyubahirizwa ry’uburenganzira bw’ikiremwa-muntu ;
Yafunze ikanakatira gufungwa burundu Bwana Déogratias MUSHAYIDI wazize kuba aharanira impinduka nziza mu mitegekere y’igihugu cye ;
Yafunze ikanakatira imyaka 15 y’igifungo cy’akamama Madame Victoire INGABIRE UMUHOZA watashye mu Rwanda mu mwaka wa 2010imuziza gusa ko yari agamije kwandikisha Ishyaka rye no kugira uruhare mu miyoborere y’igihugu cye ;
Yafunze ku buryo bw’akamama bwana Théoneste NIYITEGEKA, ikatira igihano cy’imyaka ine bwana NTAGANDA Bernard n’abandi benshi ibaziza gusa ko bashaka impinduka mu miyoborere y’igihugu ;
Yabujije inzego z’ubutabera ubwisanzure izihindura igikoresho cyo gufunga umubare urenze urugero w ‘abaturage barimo abadafite amadosiye, abafite amadosiye afifitse (atekinitse), n’abarangije ibihano ntibafungurwe ;
Ikoresha inzego zishinzwe umutekano mu bikorwa bigayitse by’iyicarubozo, igakubita, ikica, ikanafungira abenegihugu b’inzirakarengane mu myobo n’ahandi hatazwi kandi hatagerwa ‘imiryango yabo ;
Yakunze kugaba ibitero bya gisilikari ku banyarwanda bayihunze igamije kurimbura umubare munini w’abenegihugu ibatsinze mu mashyamba ya Kongo ;
Ikomeje ingeso yo gusanga impunzi z’Abanyarwanda mu bihugu zahungiyemo hagamijwe kuzibuza uburyo, kubangamira umutekano wazo ndetse no gucuza ubuzima bamwe muri zo (Colonel. Patrick KAREGEYA) ;
Yakwirakwije abasilikari mu giturage kugira ngo itere abenegihugu guhora bahagaritse umutima kubera iterabwoba rikaze ibahozamo ;
Ishyira imbere gahunda za politiki zigamije gukenesha rubanda no kubicisha inzara nko kubasenyera amazu, kubambura ibibanza n’amasambu byabo, kubarandurira imyaka iri mu mirima no gutema intoki, kubategeka guhinga igihingwa kimwe kitabafitiye akamaro ndetse ikanabahatira kwinjira mu makoperative atabafasha ahubwo agenewe kubanyunyuza imitsi ;
Yagize uruhare rukomeye mu guteza inzara ikomeye yiswe « Nzaramba », aho gufata ingamba ziwkiye ngo itabare abaturage bari kwicwa n’iyo nzara ihitamo kubihishira no gukomeza politiki mbisha yo kujijisha no gukina rubanda ku mubyimba ngo u Rwanda nta kibazo rufite, ngo uhubwo rwageze ku iterambere ry’akataraboneka ;
Yimika ivangura mu itangwa ry’akazi no mu itangwa rya buruse zo kujya kwiga ; ubwironde mu kwita ku mfubyi n’abapfakazi no mu gutanga serivisi zikenewe mu buzima bwa buri munsi ;
Yikubira amasosiyete yose y’ubucuruzi, igakubita kandi ikarasa ku manywa y’ihangu abaturage baciye bugufi yitaABAZUNGUZAYI bagerageza kwicururiza utwo bashoboye kugira ngo baronke ikiramira urubyaro rwabo ;
Isahura ikanasesagura umutungo w’igihugu ugakoreshwa mu kwigurira indege bwite za Perezida wa Repubulika no kuzikodesha Leta ku giciro gihenze cyane muri « business » zimufitiye akamaro, we n’Agatsiko ke ;
Iteza intambara z’urudaca n’umwiryane mu bihugu duturanye, by’umwihariko muri Repubulika iharanira Demokarasi ya Kongo no mu Burundi, ibyo bikaba bibangamiye cyane inyungu z’u Rwanda rufashwe nk’igihugu kiyobowe n’abanyarugomo bahungabanya umutekano mu Karere kose k’Ibiyaga bigari, ibi bikaba byaratangiye kugira ingaruka mbi ku buzima bw’abanyarwanda muri rusange ;
N’andi mahano menshi tutakwirirwa turondora ;

II. TURASANGA

Iyi Guverinoma ya Paul Kagame yararangije gukurwaho icyizere n’Abanyarwanda kuko idakorera inyungu zabo ahubwo ikaba ibangamiye cyane umutekano wabo mu buryo bwinshi bunyuranye ;
Abaturage b’u Rwanda bakeneye inzira yo gutsinda ubwoba, kwihagararaho, no kwerekana ko batavukiye kuba abacakara b’iyi Guverinoma y’igitugu ya Paul Kagame n’agatsiko ke ;
Umuryango mpuzamahanga n’ibihugu by’incuti bifuza kwitaza no kurekera aho gufasha iyi Guverinoma y’abanyarugomo isiribanga Itegeko nshinga n’andi mategeko agenga u Rwanda, ikica rubozo abenegihugu yakagombye kurengera, ikanasuzugura masezerano mpuzamahanga yashyizeho umukono ;
Guhera kuri iyi taliki ya 20 Gashyantare 2017 natwe dukwiye gufata Guverinoma ya Paul kagame nka Guverinoma itemewe kandi idashakwa n’abaturage.

III. KUBERA IZO MPAMVU ZOSE,

Turatangariza Abanyarwanda, abaturanyi b’u Rwanda n’umuryango mpuzamahanga ibi bikurikira :

Dushyizeho « Guverinoma y’u Rwanda ikorera mu buhungiro »
Dushyizeho Inama Nkuru y’Inararibonye
Dushyizeho Inama Nkuru y’ Urubyiruko rw’ u Rwanda

IV. INSHINGANO ZIHAWE IYI GUVERINOMA

Kwitegura gusimbura Guverinoma itagishakwa n’abaturage iyobowe na Paul Kagame
Kuvuganira no gutabara impunzi z’Abanyarwanda aho ziri hose
Kuvuganira no gutabariza Abanyarwanda bari mu gihugu barenganywa na Guverinoma y’Agatsiko
Gukora ibishoboka byose kugira ngo Guverinoma y’Agatsiko ihagarike ibikorwa byose by’urugomo ikomeje gukorera abaturage no kugira ngo haveho inzitizi zose zibuza Abanyarwanda bahunze igihugu gutahuka mu mahoro
Kwitabaza ibihugu by’incuti kugira ngo bishyire igitutu ku munyagitugu Paul Kagame urangije manda ze ebyiri yemererwaga n’itegekonshinga ryo mu mwaka wa 2003 kugira ngo yegame ahe rugari abandi Banyarwanda bashaka kunga abenegihugu no kugeza u Rwanda ku iterambere risangiwe na bose.

Mu gihe Umunyagitugu Paul Kagame yaba ahisemo kunangira umutima no gukomeza ibikorwa by’urugomo guverinoma ikorera abaturage :

Gusabira ibihano mpuzamahanga Guverinoma ye itagishakwa n’abaturage
Gushishikariza abaturage kwisuganya, bagahaguruka, bagasezerera Guverinoma y’Agatsiko binyuze mu nzira ya Revolisiyo idasesa amaraso.

Hon. Nadine Claire Kasiinge

V. INAMA NKURU Y INARARIBONYE

Ifunguriwe Abenegihugu bose barengeje imyaka 35 babishaka.
Ishinzwe kwegeranya umusanzu, ibitekerezo n’inama zubaka zafasha Guverinoma y’Abaturage kugeza u Rwanda n’Abanyarwanda ku buyobozi bwiza bifuza. Ni urubuga rwabo rwo gutanga umuganda mu miyoborere y’igihugu cyababyaye.

VI. INAMA NKURU Y’URUBYIRUKO

Ifunguriwe abasore n’inkumi bose kugeza ku myaka 35 bashishikajwe no kugira uruhare mu mpinduka nziza bifuriza igihugu cyabo cy’u Rwanda.
Ni urubuga urubyiruko ruhurizamo imbaraga zarwo rukanitegura kugira uruhare mu miyoborere y’ejo hazaza y’igihugu cyabo.

VII. ABAGIZE GUVERINOMA Y’U RWANDA IKORERA MU BUHUNGIRO NI ABA BAKURIKIRA :

Perezida wa Repubulika : Padiri Thomas NAHIMANA
Minisitiri w’Intebe : Abdallah AKISHURI
Minisitiri w’Intebe wungirije : Madame Nadine Claire KASINGE
Minisitiri w’umuco, umuryango, guteza imbere umwari n’umutegarugori : Madame Victoire INGABIRE UMUHOZAuhagarariwe na Madame Nadine Claire KASINGE
Minisitiri w’ububanyi n’amahanga : Madame Immaculée KANSIIME UWIZEYE
Minisitiri w’Ubutabera : Bwana Déogratias Mushayidi uhagarariwe na Bwana Vénant NKURUNZIZA
Minisitiri w’itangazamakuru : Bwana Chaste GAHUNDE
Minisitiri w’ubutegetsi bw’igihugu n’iterambere ry’umurenge: Bwana Daniel NDUWIMANA
Minisitiri w’imari n’ubucuruzi : Madame Marine UWIMANA
Minisitiri w’Uburezi : Madame Chantal MUKAMANA MUTEGA
Minisitiri ushinzwe kurengera impunzi no gukemura ikibazo gitera ubuhunzi : Madame Virginie NAKURE
Minisitiri w’ibikorwa-remezo n’imiturire : Padiri Gaspard NTAKIRUTIMANA
Minisitiri w’ubuhinzi, ubworozi n’ubutaka : Bwana Jean Léonard SEBURANGA
Minisitiri w’ubuzima n’imibereho myiza y’abaturage : Madame Spéciose MUJAWAYEZU

Hon. Speciose Mujawayezu

VIII. Hashyizweho Komisiyo zikurikira :

Komisiyo y’ububanyi n’amahanga
Komisiyo y’ubukungu
Komisiyo y’itangazamakuru
Komisiyo y’umutekano

IX. ABAVUGIZI BA GUVERINOMA :

Bwana Chaste GAHUNDEMadame Immaculée KANSIIME UWIZEYE
Madame Marine UWIMANA

Hon. Jean Léonard Seburanga

X.HASHYIZWEHO ABAJYANAMA BAKURU BATANDATU (6)

Guverinoma y’u Rwanda ikorera mu buhungiro izashyiraho izindi nzego uko zizagenda zikenerwa.

UMWANZURO

XII. ICYO DUSABA Guverinoma itagishakwa n’abaturage ya Paul Kagame kugira ngo impinduka nziza rubanda ikeneye zigerweho nta nduru kandi zigirire bose akamaro :

Kwemera no kwihutira kuganira naGuverinoma y’u Rwanda ikorera mu buhungiro.

Gufungura amarembo bitarenze tariki ya 23/03/2017, abanyarwanda bose bari hanze y’u Rwanda babyifuza bagataha mu mahoro, imfungwa za politiki zigafungurwa, amashyaka ya opozisiyo ashaka kugira uruhare mu matora ateganyijwe mu kwezi kwa Kanama 2017 akandikwa nta mananiza.

Mu gihe byarenga tariki ya 23/03/2017 nta gikozwe :

Kwimura gahunda y’amatora ya Perezida wa Repubulika yari ateganyijwe muri Kanama 2017 agashyirwa muri Kanama 2019, naho amatora y’intumwa zarubanda agashyirwa mu Ugushyingo 2019.
Gushyiraho Guverinoma y’inzibacyuho ihuriweho n’amashyaka menshi, igahabwa manda y’amezi 24, akaba ariyo itegura amatora y’umukuru w’igihugu n’ay’intumwa za rubanda mu buryo bunyuze mu mucyo.

Tuributsa kandi ko, uretse impuha zikwirakwizwa n’abadasobanukiwe, ingingo y’101 n’iy’172 z’Itegekonshinga ry’u Rwanda nk’uko ryavuguruwe mu Ukuboza 2015 zitemerera Perezida ucyuye igihe ariwe Paul KAGAME kwiyamamariza manda ya gatatu.

Bikorewe i Paris, taliki ya 20/02/2017

Minisitiri w’Itangazamakuru

Umuvugizi wa Guverinoma y’u Rwanda ikorera mu buhungiro

Chaste GAHUNDE

Itangazo rigenewe itangazamakuru : IMYITEGURO YO GUSHYIRAHO GUVERINOMA Y’U RWANDA IKORERA MU BUHUNGIRO IRAKOMEJE .

Leave a reply

Banyarwandakazi, Banyarwanda

Baturanyi namwe nshuti z’Abanyarwanda,

1.Taliki ya 23 Mutarama 2017, twari twateganyije gufata indege ku ncuro ya kabiri tukerekeza i Kigali tugamije kwandikisha Ishyaka ISHEMA ry’u Rwanda kugira ngo turonke uburenganzira bwo kugira uruhare rugaragara muri politiki yubaka igihugu cyacu. Ibyo ntitwabiterwaga n’inyota y’ibyubahiro cyangwa irari ry’imyanya y’ubutegetsi. Kwitanga tukajya gukorera politiki mu Rwanda twabitewe n’uko tuzi neza kandi tukaba tubabazwa n’akaga abaturage b’u Rwanda barimo biturutse ku butegetsi bw’igitugu bwa Perezida Paul Kagame n’Agatsiko ke kigaruriye ishyaka FPR-Inkotanyi,

ubu butegetsi bukaba bwarahisemo kwimika ikinyoma, iterabwoba, ivangura n’ukwikubira ibyiza byose by’igihugu. Nibyo byaduteye kubaka umushinga unoze dushaka gushyikiriza Abanyarwanda, umushinga witwa « Kunga abenegihugu kugirango dufatanye kwiyubakira u Rwanda rujya mbere ».

2.Nk’uko byagaragariye bose rero, Umunyagitugu Paul Kagame n’abambari be bahiye ubwoba kuko bazi neza ko rubanda yiteguye kudushyigikira bityo tugatsinda amatora y’umukuru w’igihugu ateganyijwe mu kwezi kwa Kanama 2017. Niyo mpamvu bahisemo kurenga umurongo utukura , bakora amarorerwa, biha ububasha burenze ubwo bahabwa n’Itegekonshinga rigenga u Rwanda muri iki gihe, bafata icyemezo kigayitse cyo » kuducira ishyanga » mu gutegeka Kompanyi zose z’indege ko nta n’imwe yemerewe kudutwara ngo itugeze iwacu mu Rwanda .

3.Nyuma yo kwibonera n’amaso yacu urwo rwandiko Leta ya Paul Kagame yanditse itwambura uburenganzira bwacu nk’abenegihugu twafashe imyanzuro ibiri y’ingenzi. Uwambere ni uko twitabaje ubutabera. Uwakabiri ni uko twiyemeje kuganira bwangu n’abenegihugu bifuza impinduka nziza mu Rwanda tukareba uko hashyirwaho « Guverinoma y’u Rwanda ikorera mu buhungiro » ifite inshingano yo guharanira ko ingoma y’igitugu iyogoje u Rwanda yasezererwa mu maguru mashya hakajyaho ubutegetsi bwa rubanda , bushyizweho na rubanda kandi bukorera inyungu za rubanda. Reka twibutse ko twari twihaye igihe cy’iminsi 15 yo kuganira n’ababyifuza.

4.Uyu munsi nzinduwe no kubamenyesha ko ibiganiro byagenze neza : hari abashyigikiye igitekerezo cyo gushyiraho Guverinoma y’u Rwanda ikorera mu buhungiro ndetse batera intambwe yo kwiyemeza kuyigiramo uruhare. Hari abagaragaje ko igitekerezo bacyemera ariko batiteguye kugira uruhare rugaragara muri iyo Guverinoma. Hari n’abatugaragarije ko basanga ibya Guverinoma atari igitekerezo bashima ko kubera iyo mpamvu batagishyigikiye na gato. Hari n’abifuje ko imishyikarano yakomeza , bakazafata icyemezo bamaze kubona ko iyi Guverinoma ikora neza. Uko byamera kose, muri demokarasi, igetekerezo cya buri wese gikwiye kubahirizwa.

5.Icyo twese duhurizaho ni uko imbaga y’abanyarwanda ibangamiwe cyane n’ubutegetsi bw’igitugu bwa Paul Kagame uherutse guhindura itegekonshinga kugira ngo azapfire ku butegetsi . Niyo mpamvu gukomeza kwituramira byasa no gutererana igihugu mu gihe ahubwo gikeneye kurushaho kugobokwa n’ubwenge bwacu n’amaboko y’abana bacyo.

Mboneyeho rero akanya ko kumenyesha Abenegihugu bose b’u Rwanda kimwe n’abaturanyi bacu n’umuryango mpuzamahanga ko guhera ku mugoroba w’italiki ya 17 kugeza ku ya 19 Gashyantare 2017, i Paris ho mu Bufaransa hazateranira inama idasanzwe izahuza abashyigikiye « umushinga » wo gushyiraho « Guverinoma y’u Rwanda ikorera mu buhungiro ». Amazina y’abagize iyo Guverinoma na gahunda yayo y’ibikorwa bizatangazwa ku wa mbere taliki ya 20 Gashyantare 2017.

7.Ndasaba Abanyarwanda b’umutima mwiza kuduha icyizere, kudushyigikira no gutera inkunga yose ishoboka iki gikorwa cy’ingirakamaro. Baca umugani mu kinyarwanda ngo « Ak’imuhana kaza imvura ihise ».

Nta wundi rero ubitubereyemo .

Harakabaho Repubulika y’u Rwanda,

Harakabaho igihugu giha abana bacyo bose amahirwe angana

Padiri Thomas NAHIMANA,

Umuyobozi w’Ishyaka ISHEMA,

Umukandida mu matora y’umukuru w’igihugu yo mu 2017.

IBIGANIRO BIRAKOMEJE MBERE YO GUSHYIRAHO « GUVERINOMA Y’U RWANDA IKORERA MU BUHUNGIRO ».

Leave a reply

ISHEMA PARTY : ITANGAZO RIGENEWE ABANYAMAKURU

IBIGANIRO BIRAKOMEJE MBERE YO GUSHYIRAHO « GUVERINOMA Y’U RWANDA IKORERA MU BUHUNGIRO ».

Ku itariki ya 23/11/2016, Guverinoma y ‘u Rwanda iyobowe na Paul Kagame yashyize igitsure ku makompanyi atwara abantu, iyategeka kudatwara Padiri Thomas NAHIMANA n’ikipe ye bari bajyanye kwandikisha ishyaka ISHEMA ry’u Rwanda mu rwego rwo kwitegura amatora ya Perezida wa Repubulika ateganyijwe mu kwezi kwa munani 2017. Tuributsa ko Padiri NAHIMANA Thomas ari we mukandida ishyaka Ishema ryahisemo kuzarihagararira mu matora ya Perezida wa Repubulika ndetse agashyigikirwa n’abagize impuzamashyaka ya Nouvelle Génération.

Ku itariki ya 11/12/2016, itangazamakuru ryo mu Rwanda ryatangaje ko Perezida Paul KAGAME yamaganye igitekerezo cyo guheza abanyarwanda ishyanga, natwe dutekereza ko ahari yaba yamaze gusubiza ubwenge ku gihe, agasobanukirwa ko uburenganzira bw’abenegihugu budakinishwa. Ni muri urwo rwego twongeye kujya kuri Ambasade zibishinzwe ngo ziduhe ibyangombwa by’inzira bihabwa Abanyarwanda twari twarasabye. Twasanze ibyo Kagame yavuze byari ibinyoma ahubwo akaba yarakekaga ko iterabwoba rye rizatugamburuza ku mugambi wo kujya gukorera politiki mu Rwanda.

Ku itariki ya 23/01/2017, Leta y’u Rwanda ibinyujije ku muyobozi ushinzwe abinjira n’abasohoka, yongeye gutegeka indege zose zigwa mu Rwanda kudatwara Padiri Thomas NAHIMANA n’abo bari kumwe. Tumaze kwerekwa no gutangaza ibikubiye mu ibaruwa iteye isoni uwo muyobozi yandikiye Amakompanyi y’izo ndege, nibwo u Rwanda rwasohoye itangazo ryuzuyemo gucurikiranya utugambo, ariko mu by’ukuri ryekana neza ko Paul KAGAME arenze umurongo utukura mu kugarura wa muco wo ku ngoma ya cyami wo « gucira » abenegihugu bamwe ishyanga. Reka twibutse ko icyemezo nk’iki na Perezida wa Repubulika adafite ububasha bwo kugifata kuko kivuguruza Itegekonshinga n’andi mategeko agenga igihugu cy’u Rwanda.

Mu rwego rwo guhangana n’aka gasuzuguro k’umunyagitugu Paul KAGAME ndetse no gufasha Abanyarwanda , ari abahejejwe ishyanga ari n’abakomeje gusuzugurirwa mu gihugu, guharanira uburenganzira bwabo ku buryo bufite ingufu kurushaho, twatanze igitekerezo cyo gushyiraho Guverinoma y’u Rwanda ikorera mu buhungiro kandi ihuje abanyarwanda b’ingeri zose.

Komisiyo ishinzwe gutegura no kunoza ishyirwaho ry’iyo guverinoma ikomeje kugirana ibiganiro n’abanyarwanda batandukanye baba abasanzwe mu mashyaka ya opozisiyo, sosiyete sivile n’abantu ku giti cyabo. Turashima abakomeje kutugezaho ibitekerezo n’ibyifuzo by’uko babona iyo guverinoma ikwiye kuzaba imeze n’icyo yakorera abanyarwanda bari mu buhungiro n’abari mu gihugu.

Kugeza ubu ibisubizo bitangwa birimo ibice bine : Icyambere kigizwe n’abavuga ko bifitiye UBWOBA bwinshi, ngo baratinya ko baramutse bagize uruhare muri iyo Guverinoma, Paul KAGAME yabamarira ku icumu ! Icyakabiri kigizwe n’abashyigikiye kandi biteguye kujya muri iyo Guverinoma. Icyagatatu kigizwe n’abantu basanzwe bavuga ko batavuga rumwe na Leta y’u Rwanda ariko bakemeza ko ibya Guverinoma ikorera mu buhungiro batabyitayeho ko ahubwo bafite indi imishinga yihutirwa ibashishikaje ! Icyakane kigizwe n’abavuga ko iyo Guverinoma bazayijyamo ari uko imaze kujyaho bakareba uko izakora…. Muri demokarasi duharanira, twubaha ibitekerezo bya buri wese.

Inama ya Komite Nyobozi y’ishyaka ISHEMA ry’u Rwanda yateranye kuwa 29/01/2017 yashimye uko ibiganiro birimo kugenda, ishima abiteguye kugira uruhare muri iyi Guverinoma kuko izaba ari intambwe ikomeye itewe nyuma y’imyaka irenga 23 hakorwa politiki isa n’aho yibanda ku kuvuga ibibazo bitsikamiye Abanyarwanda ariko hakabura ibisubizo na gahunda zifatika ziganisha kuri ibyo bisubizo. Inama kandi iragaya abavuga ko bifitiye izindi nyungu bashyize imbere zitari izo gufasha abanyarwanda guhanga ibitekerezo bishya byabafasha kubona umuti w‘ikibazo cy’ingoma y’igitugu imaze gutagangaza Abenegihugu.

Turasaba Abanyarwanda bose batishimiye ubutegetsi bubi bw’umunyagitugu Jenerali Paul Kagame gukanguka, bakabyutsa umutwe, bagahaguruka bagashyigikira ku buryo bugaragara iyi « Guverinoma y’u Rwanda ikorera mu buhungiro » igiye kujyaho.

Harakabaho Abanyarwanda bunze ubumwe

Harakabaho u Rwanda ruha abana barwo bose amahirwe angana

Chaste Gahunde,

Umunyamabanga Nshingwabikorwa w’Ishyaka ISHEMA ry’u Rwanda

Ashinzwe Itangazamakuru.

Tél : 0033 643 60 13 11

Email : chaste.gahunde@gmail.com

TWIZIHIZE ISABUKURU YA REPUBULIKA TURWANYA UBWIKANYIZE BWA PEREZIDA W’UMUNYAGITUGU!

Leave a reply

IJAMBO ry’umuyobozi w’Ishyaka Ishema ku isabukuru ya Repubulika:

Twizihize Isabukuru ya Repubulika turwanya ubwikanyize bwa Perezida w’umunyagitugu!

Banyarwandakazi, Banyarwanda,

Baturanyi namwe ncuti z’Abanyarwanda,

1.Uyu munsi Abanyarwanda baribukana icyubahiro umunsi muhire w’iya 28 Mutarama, umunsi Abenegihugu bahagurutseho baturutse mu mpande zose z’u Rwanda bagahurira i Gitarama, bagafata icyemezo kidasubirwaho cyo gusezerera ingoma ya cyami na gihake, igasimbuzwa Repubulika ishingiye ku mahame ya Demokarasi . Kugeza n’uyu munsi u Rwanda ni Repubulika. Ushaka guhinyuza yasoma itegekonshinga u Rwanda rugenderaho , mu ngingo yaryo ya mbere :

« Leta y’u Rwanda ni Repubulika yigenga kandi ubutegetsi bwose niyo buturukaho, ishingiye kuri demokarasi kandi igamije guteza imbere abaturage kandi ntishingiye ku idini.

Ishingiro rya Repubulika ni ubutegetsi bwa rubanda, butangwa na rubanda kandi bukorera rubanda« .

2.Reka twibutse ko ingengabitekerezo ya cyami yari yaracengeje mu mitwe y’abenegihugu ko ubutegetsi atari ubwabose, ko ahubwo ari ubwabamwe, ko gutegeka bivukanwa, ko bitangwa mu maraso, ko hari bake bavukiye gutegeka, abandi benshi bakavukira kubabera abagaragu. Ko ubutegetsi bubereyeho gukorera inyungu z’abategetsi mbere na mbere.

3.Niyo mpamvu abaturage babagaho babereyeho guhakirizwa, gutanga imisoro, amakoro n’amahoro by’urudaca. Abaturage baberagaho gukorera umwami n’ibyegera bye , ubuzima bwite bw’ingo n’imiryango yabo nta kandi gaciro bwagiraga ! Umuturage warambirwaga ako gahato akihagararaho akanga kuyoboka yakubitwaga ikiboko akamugazwa, yaricwaga cyangwa agacirwa ishyanga !

4.Italiki ya 28 Mutarama 1960 niyo yahinduye iyo miterere y’ubutegetsi : niyo mpamvu ibyabaye icyo gihe byiswe« Revolisiyo ya Rubanda ». Mu kwemeza ko u Rwanda rubaye Repubulika, ko Kalinga iciwe n’izayo zose, ko ubwiru burangiye…. imiterere y’ubutegetsi yari ihindutse bidasubirwaho, kuko bwari busubijwe mu maboko ya bene bwo : kuva uwo munsi byumvikanye ko « ubutegetsi ari ubwa rubanda, rubanda ikaburagiza abo yishakiye binyuze mu matora adafifitse ». Icyo nicyo duhimbaza uyu munsi ku ncuro ya 57 !

Gusa rero iyi sabukuru tuyihimbaje mu gihe gisa n’ikidasanzwe.

5.Tubabajwe no kuyihimbaza mu gihe umwami wa nyuma w’u Rwanda, Kigeli V Ndahindurwa aherutse kwitaba Imana ariko n’ubu tukaba tutazi neza aho ashyinguye kugira ngo ababyifuza babe bajya kumwunamira . Nk’uwabaye umukuru w’igihugu , Kigali V Ndahindurwa , yakagombye kuba yarashyinguwe agahabwa icyubahiro kimukwiye, nyamara siko byagenze. Ubu rubanda iribaza niba mu by’ukuri umugogo w’umwami wacu ushyinguye muri Porotugali cyangwa i Mwima ya Nyanza . Ninde uvugisha ukuri, ninde ubeshya Abanyarwanda hagati ya Paul Kagame n’abakunzi ba Kigeli? Politiki yo kurindagiza Abanyarwanda izarangira ryari ! Dukeneye ko iki kibazo gisobanuka .

6.Tuboneyeho akanya ko gusuhuza « Yuhi VI » wimiye ishyanga bitari bikwiye . N’ubwo ari umwami udategeka ahubwo akaba ari umwami w’umuco nk’uko byasobanuwe, tumwifurije ishya n’ihirwe , Imana imukomeze kandi izamuhe ubushishozi n’imbaraga zo gutanga umuganda we mu gukemura ibibazo bikomereye Abanyarwanda muri iki gihe, bityo na we azagire amahirwe kandi aterwe ishema no gutaha mu Rwamubyaye yemye.

7.Nanone ariko mu gihe duhimbaza iyi sabukuru ya Repubulika ishingiye ku mahame ya demokarasi, turamagana twivuye inyuma imikorere y’umunyagitugu Paul Kagame wagaruye muri Repubulika y’u Rwanda bwa butegetsi bwubakiye ku muntu wishuka ko « yavukanye imbuto, ngo akaba ari we wenyine ushoboye gutegeka u Rwanda « .Dore bigeze n’aho arenga umurongo utukura akadukana ibyo « gucira ishyanga » abandi benegihugu bifuza kugira uruhare mu micungire myiza y’igihugu cyabo , binyuze mu kwitabira amatora . Ubu bubasha Paul Kagame yihaye bugaragaza neza uko yumva ibintu mu mutwe we : yiyumva nk’umwami, u Rwanda rukaba rutakiri Repubulika , ahubwo rwarasubiye kuba akarima k’abibwira ko bavukanye imbuto !

8.N’ubwo Abanyarwanda benshi (Abatutsi, Abahutu n’Abatwa) bashyira mu gaciro babibona , bakababara mu mutima wabo ariko bagahitamo kwicecekera, twebweho rwose ntabwo dushobora kwemera kuripfana : ibi bintu ni amahano. Paul Kagame arananiwe. Akwiye kurangiza manda ye ya kabiri ubundi akegama, akareka abaturage bakihitiramo abayobozi bashaka muri aya matora yegereje. Ntabwo dukwiye kwemera ko asubiza ighugu cyacu mu kaduruvayo no mu ntambara z’urudaca ku nyungu ze bwite n’umuryango we!

8.Niyo mpamvu twifuza dukomeje ko hashyirwaho « Leta y’u Rwanda ikorera mu buhungiro » mu gihe kitarambiranye, bityo ikibazo cy’Umunyagitugu ushaka gukomeza kugira Abanyarwanda bose ingaruzwamuheto kigashakirwa umuti mu maguru mashya.

9. Ntitwasoza iri jambo tutunamiye abenegihugu b’intwari bahanze Repubulika, tugashima by’umwihariko Mbonyumutwa, Gitera , Kayibanda n’abo bafatanyije. Ndasaba imiryango yabo ko idakwiye kwemera gukomeza guhatirwa kubaho mu ipfunwe, ahubwo ko igomba kubyutsa umutwe, ikagira uruhare rugaragara mu kugoboka Repubulika ; igihe kizagera isubizwe ishema kandi ihabwe ingororano ikwiye abitangiye igihugu.

10.Twifurije Abataripfana bose umunsi mwiza kuri iyi taliki bizihizaho ishingwa ry’Ishyaka ryabo « ISHEMA ry’u Rwanda » riharanira « Kunga abenegihugu kugira ngo bafatanye kwiyubakira u Rwanda rujya mbere kandi ruha abana barwo bose amahirwe angana ».

Harakabaho Repubulika y’u Rwanda

Harakabaho abenegihugu batewe ishema no guharanira ko demokarasi ishinga imizi mu Rwanda.

Padiri Thomas NAHIMANA, Umuyobozi w’Ishyaka Ishema,

Umukandinda mu matora y’Umukuru w’igihugu yo mu 2017

ISHEMA : Hagiye gushyirwaho « Guverinoma y’ u Rwanda ikorera mu buhungiro ».

Leave a reply

UKURI – UBUTWARI – UGUSARANGANYA

ITANGAZO RIGENEWE ITANGAZAMAKURU

« NTIDUCOGORA NGO DUTERERE IYO… »

Banyarwandakazi, banyarwanda, nshuti z’u Rwanda,

Ibintu birashyize birasobanutse. Kuri uyu wa mbere tariki ya 23 Mutarama 2017, guverinoma y’u Rwanda iyobowe na Pawulo Kagame yafashe icyemezo kigayitse kandi kinyuranyije n’amategeko, cyo kubuza umukandida w’ishyaka ISHEMA mu matora y’umukuru w’igihugu ya 2017 n’ikipe ye kurira indege yagombaga kubavana ku kibuga mpuzamahanga cy’indege cya Zaventem i Buruseli mu Bubirigi mu rugendo rwabo bagana i Kigali.
Tuributsa ko iyo guverinoma ya Pawulo Kagame, yongeye kugaragaza ko idaha abenegihugu agaciro bakwiye, ntiyubahe itegeko nshinga ry’u Rwanda n’andi mategeko y’igihugu, habe no kubahiriza amasezerano mpuzamahanga n’ayo mu Karere k’ibiyaga bigari u Rwanda rwashyizeho umukono, ari ubugira kabiri ibuza Padiri Thomas Nahimana n’ikipe ye gutaha mu rwababyaye kuko mu mpera z’umwaka ushize yategetse ko babuzwa kwinjira mu ndege yari kubageza mu Rwanda ibakuye ku kibuga mpuzamahanga cy’indege cya Jomo Kenyatta i Nairobi, hari ku itariki ya 23 Ugushyingo 2016. Icyo gihe, Perezida Pawulo Kagame yari yagerageje kwisobanura nuko anenga mu ruhame abategetsi bari bafashe icyo cyemezo kigayitse cyo kubuza abenegihugu gutaha mu rwababyaye. Twari twibwiye ko ibyo perezida yabikoranye umutima utaryarya. Burya koko iminsi iba myinshi igahimwa n’umwe, ukuri kwe kwagiye ahabona kandi kugaragaje mu buryo budasubirwaho ko twari twamugiriye icyizere adakwiye.

Kubera impamvu zavuzwe haruguru, turatangariza abanyarwanda n’umuryango mpuzamahanga ibi bikurikira :

4.Kubera ko bigaragaye neza ko Umunyagitugu Pawulo Kagame afite ubwoba bukabije bwo gupiganwa muri demokarasi kandi ko, kubera ubwo bwoba, byagaragaye ko yiyemeje kuniga, gufunga, cyangwa gukumira umukandida utavuga rumwe nawe wese abona ko afite amahirwe menshi yo kumwanikira mu matora, ntiduteze kugamburura ngo tuyoboke inzira yo kwituramira, ahubwo tuzakaza umurego ngo turwanye igitugu cye twivuye inyuma.

5.Kubera ko, mu kuboza kwa 2015, Umunyagitugu Pawulo Kagame, yateguye « kamarampaka ififitse » yari igamije kumukuriraho inzitizi zo mu rwego rw’amategeko zateganywaga n’ingingo y’101 y’itegeko nshinga ryo mu mwaka wa 2003 yishakira kugundira ubutegetsi ku nyungu ze bwite, ntidushobora gucika intege ngo dutererane imbaga y’abanyarwanda ngo tubarekere mu maboko y’umunyagitugu wigize indakoreka, utegekesha urugomo n’ubugome butagira rutangira kandi udaterwa ikimwaro no gutindahaza nkana abanegihugu. Kuva ubu, ntituzongera kumuha icyubahiro gikwiye umukuru w’igihugu mwiza kandi ntutuzatinya kwamagana ubushobozi bwe buke bwo kuyobora igihugu nk’uko bimaze kugaragarira bose.

6.Kubera ko Perezida Pawulo Kagame yatatiye ubumwe bw’abanyarwanda yari ashinzwe kubungabunga no guteza imbere, akavangura bamwe abandi akabacira ishyanga, bityo akaba yongeye gushyira u Rwanda mu kaga ko kuba rwagwirirwa n’intamabara zishyamiranya abenegihugu, ntiducitse intege ahubwo turahamagarira abanyarwanda aho bari hose guhagurukira rimwe maze bagategura neza « ingamba ziboneye zo kwibohora no gusubiza Repubulika mu maboko y’abenegihugu ».

NI YO MPAMVU :

7. Twiyemeje, mu gihe kitarenze ibyumweru bibiri, kujya inama n’amashyaka atavuga rumwe na leta, amashyirahamwe aharanira uburenganzira bwa kiremwa muntu ndetse n’abantu ku giti cyabo ngo turebere hamwe uko tuzashyiraho « Guverinoma y’u Rwanda ikorera mu buhungiro » izaba ifite inshingano zo gutegura izo ngamba no kuvuganira abanyarwanda no gusobanura neza ikibazo cyabo imbere y’Umuryango mpuzamahanga n’imbere y’ibihugu bisanzwe bifite inyungu mu Rwanda.

8. Tuzagirana ikiganiro n’abanyamakuru kuri uyu wa gatatu tariki ya 25 mutarama 2017 i Buruseli tuzasobanuramo mu buryo burambuye imigambi dufite kandi dushyire ku karubanda « amayeri » ya guverinoma ya Pawulo Kagame agamije kwimakaza ingoma y’igitugu no kuburizamo ibikorwa by’abanyarwanda benshi bifuza ko mu Rwanda abategetsi bajya basimburana mu buryo bwa demokarasi no mu mahoro .

9. Turahamagarira abanyarwanda, cyane cyane abarwanashyaka n’inshuti z’ishyaka ISHEMA batuye mu Rwanda bari badutegereje ngo batwakirane ubwuzu kudashya ubwoba no kudaha urwaho uwabashotora, cyane cyane turabasaba kwirinda igikorwa icyo ari cyo cyose cy’urugomo bakorera abandi bantu cyangwa ibyabo.

10. Turashishikariza umuryango mpuzamahanga, by’umwihariko ibihugu bisanzwe bitera inkunga umunyagitugu Pawulo Kagame, ko, ku nyungu z’abanyarwanda n’iz’akarere k’ibiyaga bigari by’Afurika u Rwanda ruherereyemo, bavugurura amasezerano bafitanye na we bakazakomeza kumutera inkunga gusa ari uko afunguye urubuga rwa politiki mu Rwanda kandi akubahiriza amahame ya demokarasi.

Harakabaho Repubulika;

Harakaza amahinduka ya kidemokarasi mu Rwanda.

Bikorewe i Buruseli, kuri iyi tariki ya 23 mutarama 2017

Padiri Thomas Nahimana,

Umuyobozi mukuru w’Ishyaka ISHEMA ry’u Rwanda

Umukandida mu matora y’umukuru w’igihugu ya 2017

Rwanda : Paul Kagame aux trousses d’un opposant ” fantôme”

1 Reply

L’opposant rwandais Thomas Nahimana a été empêché de prendre son vol à Bruxelles (Belgique), ce lundi 23 décembre à destination de Kigali (Rwanda). En novembre dernier, l’opposant, a été aussi refoulé à l’aéroport de Nairobi (Kenya),en partance pour Kigali. Vu la répétition de ces déconvenues, M. Nahimana serait-il un élément gênant pour les autorités de Kigali ?

Thomas Nahimana a été empêché ce lundi 23 janvier, de prendre son vol en partance de Bruxelles en Belgique pour Kigali, la capitale rwandaise. Au moment où M. Nahimana s’apprêtait à embarquer sur un vol de la compagnie aérienne Brussels Airlines, des employés de cette compagnie sont venus lui notifier l’interdiction de voyage signée des autorités de Kigali.

Il faut souligner que l’opposant rwandais n’en est pas à sa première déconvenue avec le pouvoir de Paul Kagame. En novembre 2016, M. Nahimana, exilé en France depuis 2005, a voulu regagner Kigali via Nairobi. Mais une fois à l’aéroport au Kenya, il a été notifié au Rwandais qu’il ne pouvait pas prendre le vol.

Plus tard ce lundi 23 janvier, les services d’immigration rwandais ont dévoilé les motifs de ces refoulements incessants. Il est reproché à l’opposant de ne pas avoir déclaré sa binationalité et de voyager avec un passeport rwandais expiré. De son côté l’opposant indique que la demande de renouvellement de son passeport adressée à l’ambassade rwandaise à Paris est restée sans suite.

En réalité, cette guerre que livre Kigali à M. Nahimana semble être d’ordre politique. En effet, Thomas Nahimana, exilé en France depuis 2005, compte rentrer au pays pour se présenter à la présidentielle de 2017 contre le président Paul Kagame, qui brigue un troisième septennat à la tête de ce petit pays d’Afrique de l’Est. Par ces manières, le chef de l’Etat montre qu’il a peur d’être concurrencé dans la course à la magistrature suprême. Il est alors prêt à empêcher tout autre prétendant sérieux à se présenter.

M. Nahimana, étant certainement l’une des personnalités dont la candidature allait déranger M. Kagame, celui-ci a simplement préféré ne pas lui permettre de mettre pieds au pays.

Christophe SESSOU-beninmondeinfos.comSource : beninmondeinfos.com

2017, umwaka wo kubyutsa umutwe, tugaharanira ISHEMA ryacu.

Leave a reply

Banyarwandakazi,
Banyarwanda,
Baturanyi namwe nshuti z’Abanyarwanda,

Dore umwaka wa 2016 urashize uwa 2017 uratashye.

1.Uwampa ububasha bwo kwita izina uyu mwaka mushya uje, nawita « Umwaka wo kubyutsa umutwe » no guharanira ishema rya buri mwene gihugu.
2.Nk’uko twese twabibonye kandi tukaba dukomeje kubizirikana mu mitima yacu, umwaka wa 2016 wabayemo ibyiza bitari bike byaduhaye icyizere cyo gukomeza kubaho ariko wanabayemo byinshi byagoye Abanyarwanda. Muri make habonetse ibibazo byinshi ,ibisubizo bike cyane.

Ushojwe :

(1) rubanda icyibuka « itekinika » rigayitse ryagaragaye muri gahunda yo guhindura ingingo y’101 Itegekonshinga ryo mu 2003 mu rwego rwo kuniga demokarasi burundu.
(2) havugwa inzara yiswe « NZARAMBA » ikomeje guca ibintu mu turere twose tw’igihugu, ikaba ahanini yaratewe na politiki mbi yo kurandura imyaka y’abaturage, kubambura imirima y’ibishanga no kubabuza guhinga ibyo bashaka kandi bibafitiye akamaro.
(3) hari urubyiruko rutagira ingano rukomeje gutaka no guta icyizere cy’ejo hazaza, rukaba ruremerewe cyane n’ivangura rukorerwa, ubushomeri no kubuzwa ukwishyira ukizana.
(4) hari abaturage barira ayo kwarika kuko Leta yabasenyeye amazu hakaba n’abo yambuye amasambu yabo ntibahabwe ingurane ikwiye.
(5) hariho abenegihugu benshi baraswa n’ inzego zakagombye kubarindira umutekano.
(6) hagaragara iterabwoba rikaze mu Turere, mu Mirenge no mu Tugari riherekejwe no kweguzwa ku ngufu kw’abayobozi benshi b’inzego z’ibanze abasivili bagasimbuzwa abasilikari ku mpamvu zifitanye isano n’amatora yegereje .
(7) haganje ruswa, ivangura n’akarengane mu nzego zinyuranye.
(8) haradutse « inkongi z’imiriro » zibasiye amagereza n’amazu y’ubucuruzi y’abatari abatoni b’Ishyaka riri ku butegetsi.
(9) hari ukurebana ayingwe n’ukwiteranya n’ibihugu by’abaturanyi gushobora gukurura intambara zisenya.
(10) N’ibindi bitari bike bibangamiye ubumwe n’ubwiyunge bw’abanyarwanda.

3.Ku buryo bw’umwihariko ntitwabura kwibutsa uko uyu mwaka wa 2016 urangiye hagaragaye ikosa rikomeye kuri Leta iriho ryo kubangamira bikomeye uburenganzira bw’Abanyarwanda bari mu mahanga bifuza gutaha mu gihugu cyabo batubitse umutwe, ahubwo bafite ubushake bwiza bwo kugira uruhare rugaragara mu micungire iboneye y’ubuzima bw’igihugu no gutanga umuganda wabo mu gushyikiriza Abanyarwanda ubuyobozi bubanyuze.

4.Niyo mpamvu twifuriza Abanyarwanda ko umwaka mushya wa 2017 wababera muhire.

Umwaka mwiza wa 2017 ndawifuriza Abalideri bose ba politiki bifuriza igihugu cyacu impinduka nziza kimwe n’impirimbanyi za demokarasi zose bafatanyije.

Ndanawifuriza Perezida wa Repubulika , Imana izawumuheremo ubushishozi bukomeye , azashobore gukiranura Abanyarwanda nk’uko abifite mu nshingano .

Umwaka mwiza wa 2017 ndawifuriza Abanyarwanda bose muri rusange , cyane cyane abashavuye kubera impamvu zinyuranye. Uzababere umwaka w’ubutwari bubahagurukiriza guharanira uburenganzira bwabo mu bwitonzi no mu mutuzo .

5.Koko rero uyu mwaka wa 2017 uje ni umwaka udasanzwe . Turifuza ko waba umwaka w’impinduka zikomeye ariko nziza.

Umwihariko w’uyu mwaka wa 2017 ni uko uzaha abenegihugu ICYANZU cyo kwipakurura ubutegetsi bw’igitugu bakitorera Umukuru w’igihugu uzabubaha, akabakunda, akabafasha kurushaho kwiyunga no kwiyubakira iterambere rirambye kandi risaranganyijwe.

6.Ndasaba Abanyarwanda aho bari hose, mu mahanga cyangwa mu gihugu, KUBYUTSA UMUTWE , bakiyemeza kwitabira amatora y’umukuru w’igihugu ateganyijwe taliki ya 3 n’iya 4 Kanama (8) 2017, batitaye ku iterabwoba batazabura gushyirwaho . Nibimenyekane neza ko « Guhunga amatora » ari ubundi buryo buhambaye bwo « guhitamo gushyigikira ubutegetsi bw’igitugu » buriho .
Gusa nanone nibyumvikane ko kugira ngo amatora ari imbere azagenda neza kandi azane impinduka ikenewe, bizaba ngombwa ko abenegihugu biyemeza gutsinda ubwoba , bakayitegura , bakayitabira, bagakurikirana uko amajwi abarurwa n’uko atangazwa.

7.Guhitamo kwituramira no kwiturira mu gice cy’abanyabwoba na bantibindeba nta musaruro bitanga kuko bitabuza akarengane gusagamba no kuzagera kuri buri wese umunsi umwe .

8. Ibibazo nyakuri Abanyarwanda bafite twese turabizi. N’ibisubizo byatanga amahoro kuri bose , nta munyarwanda ubiyobewe.
Abanyarwanda barambiwe « politiki y’ibipindi » y’ishyaka rukumbi rya FPR-Inkotanyi, politiki yo kubashinyagurira ngo bavuye mu bukene kandi inzara yenda kumarira abana babo ku icumu ! Ngo u Rwanda ni intagereranywa mu miyoborere myiza kandi iterabwoba rivuza ubuhuha, abaturage b’inzirakarengane bakomeje kuraswa ku manywa y’ihangu! Ngo demokarasi yashinze imizi mu Rwanda kandi urubuga rwa politiki rudanangiye , imfungwa za politiki nka Victoire INGABIRE , Deogratias MUSHAYIDI, Kizito MIHIGO, Padiri Édouard NTULIYE, Padiri MATEGEKO Aimé n’abandi …batarenganurwa kandi aribyo bikwiye .

9.Nyamara twese tuzi neza ko icyo Abanyarwanda bakeneye mbere na mbere ari ukwicarana nk’abareshya, bakaganira nta buhendanyi, bakumvikana ku nzira zo guca burundu ivangura rishingiye ku irondakoko , gusaranganya neza ibyiza by’igihugu no gufatanya kurwanya akarengane aho katuruka hose .

10.Nk’umuyobozi mukuru w’ISHYAKA ISHEMA ry’u Rwanda nkaba n’umukandida waryo mu matora y’umukuru w’igihugu ateganyijwe, nongeye kwizeza Abanyarwanda bose ko twiteguye gutaha mu mahoro mu gihugu cyatwibarutse taliki ya 23 Mutarama 2017 kugira ngo twandikishe ishyaka ryacu nk’uko biteganywa n’amategeko, twitabire amatora bityo tuzabone uko dutanga umuganda wacu mu kubaka igihugu gitekanye kandi giha abana bacyo bose « AMAHIRWE ANGANA ».

11.Sinasoza ntongeye gushimira mbikuye ku mutima Abanyarwanda benshi badutabaye, bakatwereka urukundo mu bihe bikomeye, ubwo guhera taliki ya 23 Ugushyingo 2016 twari nk’imfungwa mu kibuga cy’indege cya Nairobi, twambuwe uburenganzira bwacu bwo kwinjira ku butaka bw’uRwatubyaye . Igihe kirageze ngo twese duhagurukire guharanira ko hatazongera kugira undi mwenegihugu ukorerwa igikorwa nk’icyo cy’urugomo n’agasuzuguro.

Mbifurije mwese Umwaka w’ibyiza gusa , « Umwaka wo kubyutsa umutwe tugaharanira ishema ryacu ».
Harakabaho Repubulika y’u Rwanda
Harakabaho Abenegihugu batewe ishema no kwitwa Abanyarwanda .

Padiri Thomas Nahimana , Umuyobozi w’Ishyaka ISHEMA
Umukandida mu matora y’umukuru w’igihugu ateganyijwe muri 2017