Uburezi bw’u Rwanda: Igifaransa kigiye kongera guhabwa agaciro.

Dr-Joyce-Musabeumuyobozi-wungirije-ushinzwe-integanyanyigisho-mu-kigo-gishinzwe-uburezi-mu-Rwanda-REBDr Joyce Musabe yungirije ushinzwe integanyanyigisho mu kigo gishinzwe guteza imbere uburezi-REB

Iyo witegereje umurongo wa politiki y’uburezi mu Rwanda nta gushidikanya uhita ubona impinduka za buri munsi zitwa ko ari ukujyana n’ibihe. Nyamara iyo ubisesenguye neza usanga ari ukujarajara no gutagaguza amafranga ava mu misoro y’abenegihugu kubera ko nta bushishozi bukoreshwa mu gufata ibyemezo.

Nyuma ya jenoside yo mu mwaka wa 1994, politiki y’uburezi yihatiye guhuza systems zitandukanye zari mu Rwanda bitewe n’aho abahungutse baje baturuka. Wasangaga hari system y’icyongereza yizwemo n’abakuriye mu bihugu bya Uganda na Tanzania ndetse na Kenya, na system y’igifaransa yizwemo n’abakuriye mu Rwanda, Burundi ndetse na Congo( Zaire). Wasangaga kandi no muri izi systems ubwazo harimo amatandukaniro. Urugero abize muri Tanzania wasangaga hari aho batandukaniye n’abize muri Uganda ndetse abize mu Rwanda, Burundi na Zaire nabo babaga bafite itandukaniro. Kuri ibi hiyongeragaho n’uko system y’ubuyobozi mu Rwanda yari isanzwe ikoresha indimi ebyiri, Igifransa n’ikinyarwanda kandi amategeko akaba yari yanditswe muri izo ndimi zombi.

Mu rwego rwo gukemura icyo kibazo hafashwe icyemezo cyo guhuza systems zombi maze igihugu kikinjira mu rugaga rw’ibihugu bikoresha indimi ebyiri z’amahanga (igifaransa n’icyongereza) hakiyoneraho n’ururimi gakondo rw’ikinyarwanda. Nko kwinjira muri kaminuza, umunyeshuri wakuriye muri system y’icyongereza yagombaga kumara umwaka wose yihugura byihuse mu rurimi rw’igifaransa kugira ngo azabashe gukurikira amasomo ye mu gihe habonetse umwarimu ukoresha urwo rurimi. Uwakuriye muri system y’igifaransa na we yagombaga gukora umwaka wose yihugura mu cyiongereza. Uwo mwaka w’indimi wiswe EPLM( Etudes preliminaires en Langues Modernes). Muri icyo gihe hari abanyeshuri baturutse muri Uganda bamaganye iyo system atari uko yari mbi, ahubwo kuko bari bamaze gutsindwa igifaransa. Leta yabasabye kwiga bagatsinda ariko bahisemo guhunga na bo biyita impunzi za politiki.

Ibintu byakomeje kugenda gutyo  ndetse abantu benshi baturutse muri system y’icyongereza biga igifaransa. Paul Kagame na we yaracyize ndetse mu  ijambo rye arahira nyuma y’amatora( afifitse) ya 2003 yavuze agace gatoya mu rurimi rw’igifaransa. Ariko guhera mu mwaka wa 2004, ibibazo bikomeye U Rwanda rwari rufitanye n’Ubufaransa byakomeje gukaza umurego maze igifaransa gitangira kwigizwayo. Nyuma yaho u Rwanda rwatangaje ko rushaka kwinjira mu muryango wa EAC (ibihugu by’afurika y’uburasirazuba) rukava mu muryango wa CEEAC w’ibihugu by’afurika yo hagati. Iyi miryango ikoresha indimi zitandukanye: EAC ikoresha icyongereza naho CEEAC igakoresha igifaransa, cyakora nta gihugu gihezwa bitewe n’ururimi gikoresha kuko iyi miryango ishingiye cyane ku miterere y’akarere ( geography). Nyuma y’aho U Rwanda rwasabye kandi rwemererwa kwinjira mu muryango wa Commonwealth ugizwe n’ibihugu byakolonijwe n’u Bwongereza.

Mu mwaka wa 2009, u Rwanda rwaraye ruvuga igifaransa n’icyongereza bucya rutakivuga igifaransa. Havugwa ko Paul Kagame yaciye igifaransa akavuga ko buri munyarwanda agomba kuvuga icyongereza. Nta tegeko cyangwa ibwirizwa ryanditse ryigeze rishyirwa ahagaragara. Iyo bijya kubaho, byari kuba binyuranyije n’itegeko nshinga ry’u Rwanda ryemera ndetse rigakoresha indimi eshatu twavuze haruguru (igifransa, icyingereza n’ikinyarwanda). Guhera icyo gihe wabaye umwanya wo kwigiriza nkana ku bantu batavugaga icyongereza. Ministeri y’uburezi yazanye abarimu b’icyongereza bavuye muri Uganda bikaba byaravuzwe ko bamwe bakoreshaga impamyabumenyi z’impimbano kugira ngo bibonere umugati bakaza kuroga ngo barigisha abana b’u Rwanda. Nta genzura ryigeze rikorwa ngo iki kibazo gikemurwe kuko wasangaga Leta isa n’aho ishaka gukura mu burezi abatavuga icyongereza. Cyakora benshi bihatiye kucyiga n’utacyizi yitoza kujya avuga utujambo nka so, serious n’utundi dukoreshwa n’abayobozi baturutse Uganda. Izi mpinduka zagize ingaruka zikomeye ku burezi bw’u Rwanda kugeza aho kaminuza y’u Rwanda isubiye inyuma ho imyanya yegera 1000 ku rutonde rwa za kaminuza zo ku isi.

Mu nama yabaye ku matariki ya25 na 26 Ugushyingo 2013 noneho hemejwe ko amasaha yo kwigisha igifaransa yongerwa ngo mu rwego rwo gutegura umunyeshuri ufite ubumenyi bwahangana n’isoko. Ibi ntibyagombye kuba byarabayeho iyo system y’indimi ebyiri yari yatangijwe ikomeza. Usanga u Rwanda rufatwa nk’igihugu kivuga igifaransa kuri bamwe ariko abandi nabo bagakeka ko u Rwanda ruvuga icyiongereza. Bake cyane nibo bazi ko higeze kubaho gahunda yo kugira indimi zombi.

Uretse igifaransa cyongeye guhabwa agaciro ku buryo butunguranye,nk’uko bitangazwa na Dr Joyce Musabe, ururimi rw’ikinyarwanda na rwo ruzahabwa agaciro ku buryo amasaha yo kucyiga azongerwa. Igifaransa kizongera kujya gikorwamo ibizamini. Ibi bije bikurikira ikomanyirizwa ryari rimaze iminsi rikorerwa abanyeshuri barangije mu mashuri y’u Rwanda, aho basubizwaga inyuma mu gihe babaga bashaka gukomeza muri zimwe muri kaminuza z’Uburayi cyangwa se America na Canada. Aho batasabwaga gusubiramo ibyo bize, basabwaga kugira amanota arenze cyane ayo bagenzi babo baturutse mu Burundi cyangwa Congo babaga basabwa kugira.

Iki cyemezo ni cyiza ariko kugifata bitwaye umwanya n’amafranga ava mu misoro y’abaturage yagombaga gukoreshwa mu bindi iyo gahunda yariho yo kuvuga indimi ebyiri z’amahanga idahungabanywa. Tujye twigira ku byo tubona.

Chaste Gahunde

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s