Kuki Ubushinjacyaha bw’u Rwanda buhishira abanyereza umutungo uva mu misoro ya rubanda?

Tumaze gusoma inkuru yasohotse mu kinyamakuru igihe .com kuri uyu wa 15 Ukuboza 2013, igira itiIkoreshwa nabi ry’umutungo wa Leta, miliyari 136 ntiziragaruzwa  ,  twibajije impamvu amafranga angana na miliyari 136 yose aburirwa irengero nyamara nyuma y’iperereza ubushinjacyaha bukanga gutangaza abakekwaho icyo cyaha. Ikintu cyonyine ubushinjacyaha buvuga ni uko ngo bamwe ari abasirikare bityo amadosiye akaba yarashyikirijwe ubushinjacyaha bwa gisirikare.

Nk’uko amwe mu mashyaka atavuga rumwe na Leta y’agatsiko ka FPR akunze kubivuga, cyane cyane ishyaka ISHEMA ry’u Rwanda, ubutegetsi bw’abasirikare bwagiye bubaho mu Rwanda nta cyiza bwazanye uretse kwikanyiza no kunyunyuza imitsi ya rubanda, ariko byageze kuri FPR yo isya itanzitse. Uku guhishira abanyereza umutungo wa leta bivuga ko amakuru aba yerekanye ko abariye aya mafranga ari ba babandi bo mu nda y’ingoma bityo bikaba ” atari ngombwa ko bashyirwa ahagaragara”!!!.

Kuba imicungire mibi igaragara muri leta ya FPR ni ikimenyetso gifatika cy’uko amafranga yakwa abaturage hatabanje kwerekanwa uko azacungwa aba ari agacuzo. Urugero ikigega cyiswe Agaciro Development Fund kikajyaho nta mategeko azwi akigenga, nta we ugishinzwe uzwi, none amafranga arimo kubura ubushinjacyaha bukinumira ngo si ngombwa kuvuga amazina yabo? Koko? These people are not serious!

Nta n’uwabura gukeka ko aya mafranga aba yafashwe na Kagame ubwe , dore ko itangazamakuru riherutse kumutera imboni aho yari arimo kugura umutamenwa muri Leta zunze ubumwe z’Amerika mu gihe abandi ba  perezida bari mu muhango wo gusezera kuri Mandela.

Nawe isomere iyo nkuru ya Deus ugire icyo ubivugaho:

Ikoreshwa nabi ry’umutungo wa Leta, miliyari 136 ntiziragaruzwa

 

Ubushinjacyaha bukuru bwashyize ahagaragara raporo y’ibyo bwakozwe kuri raporo y’Umugenzuzi Mukuru w’imari ya Leta y’umwaka w’ingengo y’imari 2010-2011 bugaragaza ko muri miliyari 160 zaburiwe irengero hagarujwemo miliyari 24.

Ubushinjacyaha bwagiranye ikiganiro n’abanyamakuru ku itariki ya 12 Ukuboza 2013, bugaragaza ko dosiye zimwe z’abakekwaho kugira uruhare mu gucunga nabi umutungo zashyikirijwe inkiko.

Miliyoni 160 yaburiwe irengero ku buryo budasobanutse kuva Umugenzuzi Mukuru w’Imari ya leta yatangira kugenzura ikoreshwa ry’amafaranga yayo.

Ubushinjacyaha bukuru mu guhangana n’iki kibazo cy’icunga nabi ry’uyu mutungo wa rubanda, bukurikirana ibyaha birimo ibiboneka mu micungire mibi y’imari ya leta nko kunyuranya n’itegeko n’amabwiriza bigenga amasoko ya leta, gusonera no kunyereza imisoro mu buryo bunyuranyije n’amategeko, ubuhemu, gutangira ubusa ibya leta n’ubujura.

Ikurikiranwa ry’amadosiye

Muri iyi raporo, Ubushinjacyaha bwagaragaje ko ibigo 107 byagenzuwe, 90 muri byo byakorewe iperereza, 2 muri byo raporo zabyo zoherezwa mu Bushinjacyaha bwa gisirikare kuko zarimo abasirikari.

Amadosiye 93 yagombaga kwigwa, 35 aregewe muri yo yaregewe inkiko, 56 arashyingurwa, abiri yo yoherejwe mu Bushinjacyaha bwa gisirikari.

Amafaranga yaburiye mu itangwa ry’amasoko ya Leta

Mu masoko ya leta yatanzwe nabi akubiye muri miliyari zisaga 7, gusa ngo si ukuvuga ko aya mafaranga ashobora kuba atarageze mu isanduku ya leta, ahubwo ngo hari zimwe mu ngingo zagiye zirengagizwa mu gutanga aya masoko, aho abakekwaho uruhare bagiye bashyikirizwa inzego zibishinzwe.

Muri aya mafaranga harimo abakozi 37 baciwe ihazabu ingana na miliyoni 14 n’ibihumbi 200, hakabamo n’abandi bakozi ba leta 34 basubije umusoro n’andi mafaranga ategetswe angana na miliyoni 11 n’ibihumbi 266. Bose hamwe aba bakozi bakaba ari 47 basubije amafaranga y’u Rwanda asaga miliyoni 25.

Mu yagarujwe, harimo ayari yarakoreshejwe nabi n’abayobozi bakuru muri leta, ni ukuvuga kuva ku rwego rwa Minisitiri kuzamura, hakabamo n’abatarakurikije inzira zisabwa mu kwishyura imisoro isabwa ku kintu runaka.

Ubushinjacyaha bwagaragaje ko ubusanzwe abayobozi bakuru hari amafaranga babwa nyuma bakazerekana uko bayakoresheje mu gihe baba bari mu butumwa mu mahanga.

Muri abo, Umushinjacyaha mukuru, Muhumuza Richard, yabibwiye abanyamakuru ko hari bamwe muri bo batabashije kwerekana ku gihe ibyo bakoresheje aya mafaranga, bategekwa kuyagarura mu isanduku ya leta.

Umushinjacyaha mukuru, Muhumuza Richard (hagati) mu kiganiro n’abanyamakuru

Amatsiko y’abanyamakuru yarapfukiranwe

Muri aba bayobozi ngo harimo abakuru, ubwo abanyamakuru babazaga mazina yabo, umushinjacyaha mukuru Muhumuza Richard yavuze ko atari ngombwa gutangaza amazina yabo ahubwo ko icya ngombwa ariko abagaruye aya mafaranga.

Muhumuza yagize ati “Dusanga atari ngombwa ko ikigo runaka gishyirwa ahagaragara kuvuga ngo bigaragare mu itangazamakuru, bibaye ngombwa twabigaragaa ariko tubona ntacyo byakongera kuri makuru tuba twatanze cyane ko barimo gukurikiranwa”.
Yakomeje avuga ko n’abagize amakosa muri iki kibazo barimo abayobozi nabo bagiye bayagarura.

Abanyamakuru bakomeje kubaza impamvu aba bayobozi badatangarizwa abanyamakuru ndetse n’abakozi mu bigo bya leta baterekwa itangazamakuru bikozwe n’Ubushinjacyaha nk’uko urwo rwego rujya ruubikora ku bayobozi bo mu nzego z’ibanze nko ku Kagari, Umurenge n’Akarere.

Umwe muri aba banyamakuru yagize ati “ Mwatubwiye aba bayobozi tukabamenye, kuki baterekwa itangazamakuru nk’uko Ubushinjacyaha bujya burihamagara abayobozi runaka b’inzego z’ibanze hari ibyaha bakekwaho, yaba ruswa n’ibindi.”

Abanyamakuru basaga icya kabiri cy’abari bitabiriye inama yo kumurikirwa iyi raporo bakomeje babaza impamvu aba bayobozi badashyirwa ku karubanda.

Kuri iki kibazo bakomeje kubwirwa ko atari ngomba kuko bayasubiza, gusa ngo baba bagaragajwe muri rusange.

Urwego rw’Ubushinjacyaha bukuru buvuga ko ibi byaha bihangayikishije kuko akenshi usanga amafaranga aba akoreshwa ari ay’abaturage.

Muri rusange ngo amakosa yagiye akorwa yaragabanutse kuko mbere yo gutangaza iyi raporo hari hari abantu 192 bakoze ayo mu rwego rw’akazi barahanwa, ariko ubu muri raporo iheruka babaye 42 ikibazo cyabo cyashyikirijwe ibiro bya Minisitiri w’intebe yasabye ko bahanwa ku rwego rw’akazi.

Hashingiwe kuri iyi raporo, ibigo n’imishinga 35 byaregewe inkiko, 78 baregerwa inkiko ku rwego rw’igihugu, ku rwego rw’uturere baba 80, abarezwe bose hamwe baba 158 bagaragaye muri iyi micungire mibi. Kuri ubu ngo imanza zikaba zaratangiye.

Itsinda rikurikirana imari ya leta ryashyizweho n’icyemezo cyo mu mwaka wa 2007 ni itsinda rigizwe n’abashinjacyaha 19 rigamije gukurikirana imari ya leta.

Ubushinjacyaha bwagaragaje ko kunyuranya n’itegeko n’amabwiriza bigenga amasoko ya leta ni byo byagaragaye cyane ko biri ku kigero cya 55,9% ugereranyije n’ibindi mu kumunga ubukungu bw’igihgu.

deus@igihe.com

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s