Paul Kagame akomeje kwikanga ubutabera mpuzamahanga

kagame-2-ed

Mu ijambo umukuru w’igihugu cy’u Rwanda yavuze kuwa 15 Ukwakira uyu mwaka, Kagame yongeye kwikoma ibihugu by’ibihangange bikoresha imbaraga bifite, kugira ngo bibashe kugenzura ibihugu bikennye cyane cyane ibyo ku mugabane wa Afurika hakoreshejwe ubutabera mpuzamahanga. Hari benshi babibona batyo nanjye ndimo. Gusa rero na none biratangaje kumva bivugwa na Paul Kagame. Muti kuki?  Reka nze ndabasubiza mu mwanya nze gusoza ngira inama Paul Kagame.

Paul Kagame yagaragaje rwose ko afata Thomas Lubanga wakatiwe n’urukiko mpuzamahanga nk’intwari. Ngo yashyiraga abana mu gisirikare mu gihe hari ababicaga, cyakora Kagame ntiyavuze abo babicaga abo ari bo. Kagame yagaye uwahoze ari Perezida wa Cote d’Ivoire Laurent Gbagbo ngo niwe wizize kuko yemeye gusinyira urukiko mpuzamahanga mpanabyaha rukorera I La Haye mu Buholandi rwarangiza rukamufata. Bityo Kagame akaba ashima kuba u Rwanda rutarasinyiye ruriya rukiko, ni nk’aho yavuze ngo “njye nanze gusinya kugira ngo ntazaba nka Gbagbo”! Reka tugaruke ku mpamvu Kagame Atari we wari ukwiye kwikoma ibihugu by’ibihangange.

  1. 1.       Uburyo yageze ku butegetsi.

Nta banga rikibirimo ko Kagame yageze ku butegetsi ashyigikiwe n’ibyo bihugu by’ibihangange ubu arimo kwikoma, kandi uburyo bwakoreshejwe ari ukwigizayo abayoboraga igihugu cy’u Rwanda. Ababikurikiranira hafi bazi ko igihugu cya Leta zunze ubumwe z’Amerika cyashyigikiye FPR na Kagame kugira ngo abashe gufata ubutegetsi. Impano ya mbere yahawe FPR ni ugufatira embargo leta y’u Rwanda yari imaze kwitwa iy’abicanyi (aba genocidaires). Iyi embargo imaze gufatwa Guverinoma ntiyari igishoboye kugura intwaro ukundi. Munyumve neza. Ikoreshwa ry’amagambo nk’aya ya genocide ribaho iyo rihawe umugisha n’igihugu cy’igihangange kandi ryakoreshwa k’uwo ari we wese igihe ibi bihugu bishatse kumwigizayo.  Ikindi si ngombwa ko umuntu ashinjwa genocide kugira ngo akurikiranwe n’ubutabera mpuzamahanga. Urugero ni Charles Taylor uheruka gukatirwa imyaka 50 y’uburoko nyamara mu byaha aregwa nta genocide irimo.

Ni ukuvuga ko n’uwakoze ibindi byaha byibasiye inyoko muntu ashobora kubiryozwa. Iyo ibi bitabayeho, uwabikoze akibwira ko ibihugu by’ibihangange bimwihoreye nta nyungu bibifitemo, ubwenge bwe bwaba bufite ikibazo cyo kutagira amakenga. Byaba bitangaje rero niba Kagame atarabonye ko Abanyamerika bari bafite inyungu bakurikiranye igihe bamwemerera guhanura indege ya Habyarimana na Ntaryamira bigakurura genocide bakamwihorera kugeza n’ubu. Ibyo kandi byakozwe hashize imyaka igera kuri ine itegeko ryo gukubura “(Fagiya washenzi)” ritangiwe mu Mutara.

  1. 2.       Uburyo ubutegetsi bwe bwahawe imbaraga

Impano ya kabiri yahawe ubutegetsi bwa Kagame ni ishyirwaho ry’urukiko mpuzamahanga rwa Arusha ngo ruburanishe abakekwaho kugira uruhare mu bwicanyi bwabaye mu Rwanda kuva tariki ya mbere Mutarama kugeza kuya 31 Ukuboza umwaka wa 1994. Umwanzuro w’inama y’umuryango w’abibumbye No 955 ushyiraho uru rukiko urasobanutse: uru rukiko rwari rugamije gukurikirana abakekwaho genocide n’ibyaha mpuzamahanga bindi byakorewe mu Rwanda no mu bihugu bituranye. Kugira ngo impano ibe ya nyayo, uru rukiko rwakurikiranye abantu bose bari bahanganye na Kagame akiri mu ntambara. Igihe cyose amadosiye y’abafatanyacyaha ba Kagame yabaye nk’akorwaho, ibihugu by’ibihangange byahitaga bigira icyo bikora kugira ngo Kagame atahasebera.

Ikintu gitangaje ni ukuntu bose bemeza ko indege yari itwaye Habyarimana yahanuwe ariyo yabaye imbarutso ya genocide. Umuntu akibaza impamvu hakurikiranwa abaregwa genocide gusa ntihakurikiranwe abaregwa guhanura indege. None His Excellency arimo gusetsa imikara atwigisha universal jurisdiction! Hahahahaha

  1. 3.       Uruhare rwe mu bwicanyi

Ukurikije ubushakashatsi bwimbitse bwakozwe n’abantu batandukanye, usanga His Excellency aregwa ibyaha by’indengakamere. Bityo rero ibyo yavuga byose arengera abicanyi bizajya bifatwa nk’aho arimo kwiteganyiriza. Mbese ni nko gushyira mu isanduku y’ubwiteganyirize bw’abakozi, ya yindi umuntu agenda ashyiramo igice cy’umushahara ngo namara kugera mu zabukuru izamugoboke. Ubu buvugizi bwo kwamagana ubutabera mpuzamahanga ndetse Kagame abusangiye na Museveni, aba bagabo bombi bakaba barashyigikiye ibikonyozi mu bwicanyi bwabaye muri Congo. Museveni yashyigikiye Thomas Lubanga ubu wamaze gukatirwa, Kagame ashyigikira Kirimbuzi general Ntaganda Bosco, ubu nawe wamaze kugezwa muri urwo rukiko. Abo bombi bihwihwiswa ko baba baratanze amakuru nyayo agaragaza uko Kagame na Kaguta babaye ingirakamaro mu kurimbura imbaga y’Abanyekongo.

Iyaba ubu buvugize bwakorwaga na Mandela, cyangwa se Kikwete, cyangwa se undi mu perezida udafite icyo akekwaho byari kurushaho kugira ireme. Ibi ntibivuze ko wenda koko aba ba perezida b’abicanyi badafite ukuri mu byo bavuga. Ariko rero hari ikibazo batarashobora gusubiza: Reka twemere ko uru rukiko rwibasira Abanyafurika, ese rufata Abaziranenge?

Inama kuri HE Paul Kagame.

Iyi nama yahabwa n’undi wese uteganya guhatanira ubutegetsi.

Your Excellency, burya igihe wari ushishikajwe no kurasa Abenegihugu ngo uzafate ubutegetsi, ibyo bihugu by’ibihangange nta musonga byariho. Byari bizi icyo bishaka. Wowe wagize intege nkeya ureba hafi cyane wibwira ko abo murwana ari abanzi bawe ugomba kurimbura, nyamara bari abavandimwe mwashoboraga kwicara mukaganira mugakemura ibibazo by’u Rwanda. Iryo terambere bagushima uzarebe uko barishimye uwakubanjirije HE Habyarimana. Muri icyo gihe na bwo u Rwanda rwafatwaga nk’icyitegererezo mu gucunga neza ubukungu.

Igihe urukiko rwa Arusha rucira imanza abo mwari muhanganye ntiwigeze ugira imbaraga zo gutekereza  ko universal jurisdiction yagombye gukora kuri bose. Na none wagize intege nkeya cyane zo kwibwira ko ibyo bihugu by’ibihangange bigukunze. Yego nturi mubi ku isura ariko rero waba waribeshye ko bakubengutswemo umugeni.

Gahunda nyinshi zabayeho mu Rwanda ziswe iz’ubutabera zatewe inkunga n’ibyo bihugu by’ibihangange wagombye kuba wari uzi ko nta cy’ubu cy’ubusa. Nubikurikirana neza urasanga imanza nyinshi zaciwe zari zigamije kumvisha abo mwahanganye kugira ngo batazigera barota kugaruka ku butegetsi. Aha naho warebye hafi kuko uwagira ubutegetsi wese aramutse yubaha Abenegihugu ndetse akagiteza imbere ntacyo twaba duhombye ari jye ari nawe. Nyamara ibihugu by’ibihangange ntibishaka ko iki kibaho. Byashakaga kukugira igikoresho bigukoresha amakosa ngo nibirangize bizaguteze Abanyarwanda, ndetse bijye biguhoza ku nkeke ngo utibeshya bikagushyikiriza ubutabera mpuzamahanga.

N’ubwo u Rwanda rutasinye amasezerano ashyiraho urukiko rwa La Haye, ibyaha uregwa ntibisaza. Byafata umunota umwe gusa kugira ngo bagushyireho igitutu wegure umere nka mugenzi wawe Charles Taylor. Ubufaransa bwagufata, Espagne yagufata, yewe n’u Rwanda ubwarwo rwakwifatira. Sadam Hussein se yigeze ajyanwa I La Haye? Uko byagenze ibara umupfu.

Ikintu cyonyine cyakugirira akamaro ni ukubungabunga ubumwe bw’Abanyarwanda. Jya imbere ubasabe imbabazi ugamije gukiranuka n’umutimanama wawe. Funguza imfungwa z’Abanyarwanda zinyanagiye ku isi yose zaciriwe imanza n’ubwo butabera utemera. Emera ibiganiro bihuza Abanyarwanda bose tuvuge amateka, dukore gacaca nyagacaca, dufate ingamba zo kwerekeza imbere. Fungura Abanyapolitiki wafunze ubarenganya ngo aha banga igihugu kandi wikanga baringa. Subiza inkota mu rwubati, tanga ihumure Abanyarwanda bahumeke. Hagarika ingabo zawe zinyanyagiye mu mashyamba ya Congo zisahura umutungo zikica uwo zihuye na we wese.

Ibi nuramuka umaze kubikora, n’ubwo wacyura igihe ibyo bihugu by’ibihangange bikagukuraho icyizere bishaka kugukurikirana, twe Abanyarwanda tuzakurwanira ishyaka. Nitutabasha kukurasanira, ntacyo uzajya mu ijuru roho yawe iruhukire mu mahoro, kandi ndabikwijeje izabana neza na roho z’abo wishe cyangwa wicishije.

Chaste Gahunde

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s