PDP-Imanzi vs FPR -Inkotanyi: Intambara ni nk’indi.

pdp-imanzi-rwanda-memoire-ibukaimages

                                                                                                                                                                                                                                                                                                                                                                                                                                                                                                                                                       Mu gihe Ishyaka PDP Imanzi rya Nyakubahwa Mushayidi Deogratias ryari rimaze iminsi ryemerewe gukora congres iritangiza ku mugaragaro, Kagame yategetse ko ubwo burenganzira bukurwaho. Ibi rero bitandukanye n’ibyo Kagame yari aherutse kuvuga ubwo yaganiraga n’urubyiruko mu mbwirwaruhamwe benshi bise Kirimbuzi, aho yategekaga abana b’Abahutu gusaba imbabazi z’ibyaha ba se na ba sekuru bakoze babishaka cyangwa batabishaka. Muri iyi mbwirwaruhame Kagame yavuze ko nta mpamvu yo kwangira ishyaka rya politiki kwiyandikisha, ariko yongeraho ko uzibeshya akavuga ibyo FPR idashaka kumva atazamenya ikimukubise. Ryari iterabwoba asanganywe, ariko Abanyarwanda ntibajya bafata bikino ikintu Kagame avuze kubera ko ibyaha by’ubwicanyi bw’urukozasoni yagiye akora byamuhaye igitinyiro nk’umuntu utagira umutima wa kimuntu. Ngo “ntawe utinya ijoro ahubwo atinya icyo barihuriyemo”.

Iri shyaka PDP-Imanzi ryashinzwe na Deo Mushayidi ryigaragaje ko ryavumbuye hakiri kare ko Kagame atigeze akunda Abatutsi kuva urugamba rwa FPR rwatangira. Uretse kubarasa no kubakubita agafuni kugira ngo abishinje ingabo za Leta ya Habyarimana (na zo ubwazo zanyuzagamo zikamerera nabi Abatutsi), Kagame ntiyigeze agaragaza kwita ku Batutsi babaga mu Rwanda. Kagame icyo yari yimirije imbere kwari ugufata ubutegetsi bwose akabugira ubwe, kandi yari aziko nta ntsinzi itagira ibitambo. “A vaincre sans périr, on triomphe sans gloire”( Uramutse utsinze utagize icyo utakaza, nta gaciro intsinzi iba ifite). Hari benshi bemeza ko Kagame  na we ajya avuga ko utarya umureti (omelette) utabanje kumena amagi.

Kagame akimara gufata ubutegetsi kubyina intsinzi byarushije kunamira abapfuye. Ibi na byo bikagaragaza ko atababajwe n’urupfu Abatutsi bapfuye. Ikindi cyiyongereyeho ni uko iyo witegereje usanga icyo Kagame yamariye abacitse ku icumu ari nta gaciro. Reka dufate urugero ku muntu wacitse ku icumu, aho gushishikarizwa kujya mu ishuri no gukora amahugurwa mu myuga izatuma abasha kubona akazi, ahubwo agahora yibutswa ko nta cyo ari cyo, ko nta cyo yakwimarira( n’ubwo yaba afite amaboko n’ubwenge byo gukora ). Aho kwigishwa kuroba ifi, ahubwo atozwa kwasama ngo Kagame asukemo umufa dore ko umunopfu uba wamaze kugera mu gifu cya nyakubahwa.

Mu myaka yakurikiye genocide wasangaga hirya no hino Abatutsi bahabwa imyanya y’ubuyobozi badashoboye. Aho kugira ngo habeho formule yo kubigisha ngo bagire competitivité, bakomeje kubeshywa ko ubutegetsi ari ubwabo, cyakora bagasabwa gupfukama bagasenga Kagame wabarokoye akabavana mu menyo y’Abahutu. N’uwarokowe n’umuhutu akigishwa ko yakijijwe n’Imana. Ibi nta wabihakana, ariko rero Imana ikoresha abantu. Ibi hari Abatutsi babyemeye ariko Deo Mushayidi ntibyigeze bimubuza kureba kure.

Hamaze igihe gitoya, Abatutsi batangiye kubona ibyiza by’igihugu bigenda byikubirwa n’Abatutsi baturutse muri UGANDA bazwi ku kabyiniriro k’Abasajja. Ubundi ijambo Omusajja mu rurimi rw’ Uruganda risobanura umugabo. Nuko abari barahawe imyanya barayamburwa basigara badafite icyo bimariye ubu abenshi birirwa basabiriza urwagwa none n’urutoki Kagame yararuciye. Tutirengagije ibyo tubona mu Rwanda ntawe utabona ko Abatutsi babaga mu Rwanda mbere y’umwaduko w’Inkotanyi babayeho nabi cyane mu byerekeye no kwiyumvamo ubushobozi n’icyizere cy’ejo hazaza.

Umuntu ashobora kubaho akennye cyangwa akeneshejwe ariko akaba  azi ubwenge azi kandi abona ko ibintu bishobora guhinduka isaha iyo ariyo yose akabaho neza bumuha imbaraga zo guhangana n’ibibazo ahura na byo. Abatutsi barokotse jenoside bo bahinduwe ibiburabwenge n’imburamumaro mu gihe badapfukamye ngo basenge FPR. Kubera icyunamo kidashira bahozwamo binjujijwe mu miryango nka IBUKA, AVEGA, AERG, CNLG, FARG n’izindi gahunda zinyuranye zikorerwa abacitse ku icumu gusa, aba bantu bahora mu ihahamuka, gutera imbere ntibishoboka kuko kuri bo buri munsi aba ari muri 1994. Muri make buri munsi bahora bapfushije. Abazi iby’ubuzima bwo mu mutwe (mental health) bemeza ko gahunda nk’izi Kagame na FPR ye bashyiriyeho Abatutsi barokotse jenoside zifite ingaruka mbi cyane kuko zigabanya ubushobozi bw’ubwonko kandi ibi bishobora no kugera ku bana bazabakomokaho.

Noneho igiherutse kwiyongeraho ni uko umwana w’umuhutu wese ngo agomba gusaba imbabazi. Madame Kagame na we yongeyeho gahunda ngo yitwa “Ndi Umunyarwanda” ngo igamijeko abantu bavuga amateka yabo. Wareba ugasanga abategekwa kuvuga ari Abahutu kandi ubutumwa batanga bukaba bugomba kwerekana ko Leta y’Abahutu ariyo yatumye mu Rwanda inka zidakamwa ayera. Nta wemerewa kuvuga uko FPR yamurasiye abayeyi muri Congo, nta wemerewe kuvuga uko umubyeyi we yafunzwe imyaka myinshi abeshyerwa, nta wemerewe kuvuga ko yavuye mu ishuri kuko atabasha kubona umwanya w’ishuri kuko ahorana indo ku mutwe agemuriye Nyirasenge ufunzwe aregwa kutavuga rumwe na Kagame,… Nategereje ko muri izi gahunda za Madame Jeannette zavugirwamo n’amateka mabi yaranze ingoma zabanjirije iz’Abahutu, amateka ya FPR agafuni n’akandoyi, ubwicanyi Kagame yakoze ndetse n’ubwo abandi batutsi bakoze ku mirenge hirya no hino haba mu gihe cya jenoside na nyuma yayo. Ibi na none bigirira nabi Abatutsi kuko batangira kwishyiramo ko koko nta ho bahuriye n’Abahutu kimwe n’ababakomokaho. PDP Imanzi yo ishaka ko Umuhtu n’Umututsi baganira amashirakinyoma, barangiza bagasurana bagaturana, bagasabana bagatabarana.

download (2)

Deo Mushayidi yahanishijwe igihano cyo gufungwa burundu kuko yashatse gufungura amaso y’Abatutsi

Kuba PDP Imanzi yarashinzwe n’Umututsi wabaga mu Rwanda kandi akagaragaza amayeri Kagame akoresha kugira ngo yigarurire Abatutsi bacitse ku icumu, ni impamvu ikomeye yatuma iri shyaka ridahabwa uburenganzira bwo gukora. Riramutse ryemerewe gukora mu bwisanzure, Abatutsi bose basobanukirwa uburyo FPR ariyo nyirabayanzana w’amabi yagwiriye u Rwanda, kandi ko Umuhutu n’Umututsi bashobora kubana buzuzanya ako kubana baryana. Birasaba ubushishozi bwinshi kugira ngo Umututsi warokotse jenoside yumve ko ashobora kubaho FPR itariho, nyamara ni ukuri. Cyane cyane muri iyi minsi ya nyuma ya FPR, ni ngombwa ko buri wese ahitamo inzira nyayo ikwiye, kuko bimaze kugaragara ko kuba muri iri shyaka ryiyita umuryango ari nk’uwabona igiti bagitema akacyurira ngo arahunga urupfu kuko agumye hasi cyamugwira. Uyu arutwa n’inyoni kuko ngo izizi ubwenge iyo zibonye ibyo biba zitangira kwigurukira.

Uko byagenda kose PDP iramutse idatatiye umurongo wayo yazahangana na FPR kugeza Yesu agarutse ku isi.

Chaste Gahunde

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s