“Nyuma ya M23, hagiye kurwanywa FDLR”: Ambasaderi w’Ubufaransa muri L’ONU.

download (3)

Ambassadeur Gérard Araud

Leta ya Uganda iratangaza ko yafashe umuyobozi wa gisirikare wa M23 n’abafasha be ba hafi. Uyu muyobozi Sultani Makenga nta makuru amwerekeye yari azwi kuva aho M23 itangarije ko irangije ibikorwa byo kwigomeka ku butegetsi bwa Repubulika iharanira demokarasi ya Congo, ibi bikaba byatumaga benshi bakeka ko arimo kongera gusuganya ingabo ze ngo yongere agabe ibitero.

Abakora ubusesenguzi basanga intsinzi y’ingabo za Congo nta wayizera kuko icya ngombwa gikenewe ari amahoro kandi hakaba hari indi mitwe myinshi iyabangamiye.

Umusirikare mukuru wa Uganda utashatse kwivuga izina yatangarije ibiro ntaramakuru Reuters ko kuwa gatatu tariki ya 6 Ugushyingo 2013 Makenga yishyikirije ingabo za Uganda ari kumwe na bamwe mu ba commanda be. Uyu musirikare yongeyeho ko aho izi nyeshyamba za M23 zicumbikiwe hazakomeza kugirwa ibanga kugeza imishyikirano y’amahoro hagati ya Leta ya Congo na M23 izaba imaze gushyirwaho umukono.

Abakurikiranira hafi ibibera muri aka karere basanga iki cyemezo cya Leta ya Uganda gifitanye isano n’ibyo Umunyamabanga wa Department ya Leta zunze ubumwe z’Amerika John Kerry aherutse gutangaza mu ijwi ry’umuvugizi ndetse bigasubirwamo n’intumwa ye yihariye mu karere k’ibiyaga bigari Russ Feingold. Bavuze ko inyeshyamba za M23 zakoze ibyaha by’intambara n’ibyaha byibasira inyokomuntu zigomba gukanirwa uruzikwiye. Bwana Feingold yatangaje kuwa gatatu tariki ya 6 Ugushyingo ko amasezerano adahana abanyabyaha atazashyigikirwa na Leta zunze ubumwe z’Amerika ndetse n’abahagarariye umuryango w’ibihugu by’u Burayi kandi ko na Congo itazayashyiraho umukono.

Umuvugizi w’ingabo za Uganda Captain Ronald Kakurungu, we atangaza ko abarwanyi ba M23 bagera ku 1500 bahungiye ku butaka bwa Uganda, uyu mubare ukaba ari munini ugereranyije n’ibyo bamwe bakekaga ko M23 yashize urusorongo. Ibi bikaba bigaragaza ko imirwano hagati ya M23 na Leta ya Congo, koko yaranzwe no kwiruka kuri M23 aho guhangana no kurwana kugeza kuwa nyuma nk’uko Makenga yari yarabivuze.

FDLR ishobora guterwa

Umuvugizi w’umuryango w’abibumbye we yavuze ko ingabo z’uwo muryango ziri muri Congo zahaye gasopo indi mitwe iri mu burasirazuba bwa Congo cyane cyane FDLR. Mu ijambo yagejeje ku  kanama gashinzwe umutekano, uhagarariye Ubufaransa mu muryango w’abibumbye Bwana Gerard Araud yavuze ko Inyeshyamba za FDLR arizo zigiye gukurikizwaho nyuma yo kurwanya no gutsinsura M23. Cyakora umukuru w’ingabo za Monusco we yavuze ko bazarinda umupaka w’u Rwanda na Congo kugira ngo FDLR itinjirana intwaro mu Rwanda, uhagarariye u Rwanda we agasanga FDLR yari ikwiye kurwanywa nk’uko M23 bayirwanyije.  Twibutse ko kurwanya FDLR byarakozwe kuva mu myaka 17 ishize ndetse byageze aho Congo yemerera u Rwanda kohereza ingabo muri Congo ku mugaragaro ngo zifatanye n’iza Congo guhiga FDLR cyakora byarananiranye.

Leta y’u Rwanda ivuga ko Ingabo za Congo zifitanye umubano na FDLR cyakora na FDLR sindumva ibihakana. Biramutse ari byo, nta cyo byamara cyane mu gihe brigade ya MONUSCO yaba ishaka kurasa mu birindiro bya FDLR kuko umuryango w’abibumbye kimwe n’ibihugu by’ibihangange ari byo bitegeka igikorwa. Hagati aho Leta zunze ubumwe z’Amerika ziratangaza ko ziteguye kongera gufasha u Rwanda mu bya gisirikare mu gihe ruzaba rutagifasha M23.

Kubera uburyo Abanyarwanda benshi bababaye muri iki gihe bakaba bashaka uwabakiza ubutegetsi bw’agatsiko ka FPR, uku gutsindwa kwa M23 kwavugishije amagambo menshi. Bamwe baravuga ko ari FDLR yarwanyije M23 ifatanyije na Brigade d’intervention ya MONUSCO, ndetse bakongeraho ko FDLR irahita ikomeza mu Rwanda. Aya makuru njye nsanga nta shingiro afite nkaba nsaba Abanyarwanda kwitondera ibihuha n’ubwo byaba bitanga moral.

Ba rusahuriramunduru bo batangiye kwirara mu mpunzi z’Abanyarwanda muri Uganda basaba amafranga ngo yo gushyigikira ingabo zihuriweho na FDLR ifatanyije na RNC. Twibutse ko RNC ari ishyaka ryashinzwe na Nyamwasa na bagenzi be bavuye muri FPR. Abahagarariye iyi mitwe (FDLR na RNC) bakwiye gushyira ahagaragara iby’uwo mutwe w’ingabo FDLR/RNC, cyakora abakunze kuvuga ibya FDLR bambwiye ko uwo mutwe w’ingabo (FDLR/RNC) utabaho ahubwo ko ari Leta ya Kagame ishaka kubyinjiza mu myemerere mpuzamahanga.

Tubitege amaso twitonze ari na ko dushishoza, kuko ukuri kuryana kuruta ikinyoma gitanga moral. Ibi binyibutsa umunyamakuru watubwiraga ngo Inyenzi 200 zateye twicamo 300 izisigaye zikwira imishwaro, maze abantu bakabyina ngo Inyenzi zatsinzwe. Abantu bagiraga moral ntibabashe no kwibaza ukuntu maganabiri ukuramo magatatu hakagira n’izisigara?! Uko byarangiye twarabibonye.

Chaste Gahunde

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s