Koko se? ICYUNAMO MURI MUTARAMA : INDAKI Kagame yihishemo kugira ngo yungikanye ibikorwa by’iterabwoba n’ubugizibwanabi !?


kooooo

Mu by’ukuri, uretse Paul Kagame n’Agatsiko ke , ntawe utabona ko «  Stratégie » yo kwihisha inyuma ya « jenoside yakorewe Abatutsi bonyine » hagamijwe kumena no gutesha agaciro amaraso y’abandi benegihugu itakijyanye n’igihe ! Niyo mpamvu benshi bibaza bati : Iki cyunamo gishyizwe igitaraganya muri kwezi kwa Mutarama gisobanura iki ? Gihishe iki ? Gihuriye he n’urupfu rwa koloneli Patrick Karegeya wanigishijwe ikiziriko taliki ya mbere Mutarama 2014 ?

I. Twibukiranye

Twari tumaze kumenyera ko buri mwaka icyunamo cyo kwibuka« jenoside yakorewe Abatutsi bonyine » gitangira mu kwezi kwa Mata ! Kandi kubera ko hashize imyaka hafi makumyabiri ibyo bikorwa, twagize igihe gihagije cyo kwitegereza no kumva neza icyo « iki cyunamo kidashira » gisobanura !

N’ubwo Loni yemeje ko mu Rwanda hakozwe « ibikorwa bya jenoside », ikanashyiraho Urukiko Mpuzamahanga Mpanabyaha (TPIR) rukorera Arusha rushinzwe gukirikirana no guhana ibyo byaha, ntabwo Loni yigeze ivuga ko ari Abatutsi bonyine bakorewe “jenoside” , nta n’ubwo Loni yigeze ivuga ko ari Abahutu bonyine bayikoze. Nyuma y’ukwivuguruza kwinshi, Leta ya FPR niyo yafashe icyemezo cyo :

*kuvangura abishwe : ivuga ko Abatutsi aribo bonyine bakwiye kuririrwa, kunamirwa no kwibukwa kuko aribo bakorewe jenoside ; naho abahutu bo bishwe bakaba ari ibikoko bityo, uretse no kwibukwa no kuririrwa, bakaba nta n’uburenganzira bafite bwo gushyingurwa mu cyubahiro gikwiye abantu .

*kuvangura abicanyi : ivuga ko umwicanyi ukomoka mu bwoko bw’Abahutu ari we mubi, bityo akaba akwiye kuryozwa ibyaha bye n’ibya se n’ibya sekuru , hakiyongeraho ko n’abana babo b’ibitambambuga badafite aho bahuriye n’ubwo bwicanyi bagomba kuzasoza ubuzima bwabo bapfukamye basaba imbabazi Abatutsi ; mu gihe umwicanyi ukomoka mu bwoko bw’Abatutsi we agomba gufatwa nk’ INTWARI y’igihugu, akagororerwa. Nyamara anketi na raporo zakozwe na LONI ku bwicanyi bwakozwe n’ingabo za Kagame muri Kongo zerekana ko bashobora kuzakurikiranwa n’inkiko ku cyaha cya « Jenoside yakorewe abahutu ».

Iyo ikora ibyo ,Leta ya FPR iba igamije iki ?

(1) Intego ni uguhishira uruhare FPR yagize mu kurimbura Abanyarwanda guhera taliki ya 1/10/1990 kugeza ubu, baba Abahutu , baba Abatutsi .

(2)Twibuke ubuhamya bw’Inkotanyi Abdoul Joshuwa Ruzibiza, wagiraga ati «  Ushaka kumva uko jenoside yateguwe ikanashyirwa mu bikorwa ntakarebe gusa ibyo Leta ya Habyarimana yakoze  ajye abanza arebe n’ibyaha by’indengakamere FPR yakoze » kuko mu by’ukuri ariyo « yigishije Interahamwe kwica urubozo », iyo zabonaga ibyo FPR yakoreraga Abanyabyumba n’Abanyaruhengeri !

Icyitonderwa :

Ikibazo gikomeye cyane kiriho ubungubu gituma nta butabera nyakuri bushobora kubaho mu Rwanda, ni uko abaryozwa ibyakoze ari uruhande rumwe gusa rw’Abahutu, Abatutsi bayoboraga FPR bo ntibagire icyo bakurikiranwaho kandi barabigizemo uruhare rukomeye cyane ! Ndetse ahubwo FPR ikagaruka ikigira umucamanza mu rubanza yakagombye kuregwamo , ibyo bikaba binyuranyije cyane n’IHAME ubucamanza bwubakiyeho rigira riti « Kirazira kuba umucamanza mu rubanza uregwamo »(«  Nul n’est juge dans sa propre cause »°.

Kuki FPR imaze imyaka 20 yose yarigize umucamanza mu rubanza iregwamo ?

Ni ukugira ngo abayobozi bakuru ba FPR bakingirwe ikibaba, batabazwa ibyo bakoze. Ahubwo n’ibyo bakoze bakagaruka bakabyegeka ku Bahutu akaba aribo babibazwa bonyine: kugira ngo byinjizwe mu mitwe n’imitima(conscience collective) y’abanyarwanda cyane cyane urubyiruko ko UMUHUTU wese ari mubi, ari umwicanyi, UMUTUTSI akaba umwere nka Malayika w’Imana . Iyo akaba ari nayo mpamvu mu gihe cy’icyunamo abambari ba FPR-Inkotanyi bakaza umurego, hirya no hino mu Mirenge, Abahutu bagafatwa, bagashyirwa ku ngoyi, bagakubitwa, bagacunaguzwa, bagafungwa, bagatorongezwa , abandi bakicwa…Mu Rwanda haracyari uturere abaturage bahunga mu cyunamo,bakigira i Burundi cyangwa i Bugande,  bakazagaruka kirangiye . Nigeze kujya ku Gikongoro mu cyunamo, ndebye iterabwoba abaturage bashyirwaho ndumirwa ! Ibyo bikaba buri mwaka, imyaka igashira indi igataha. Burya koko akabi kamenyerwa nk’akeza ! None nyuma y’imyaka 20, nk’aho ibyo byose bidahagije bati noneho reka icyunamo tugitangire ku ya 7 Mutarama ! Aho ubutaha ntituzabwirwa ko kizajya gitangira ku italiki ya 1 Mutarama kigasozwa ku ya 31 Ukuboza ?!

II. Icyunamo cyo muri Mutarama 2014 gihuriye he n’urupfu rwa Koloneli Patrick Karegeya ?

karegeya

Iki cyunamo kidasanzwe cyo kwibuka « jenoside yakorewe abatutsi bonyine » gishyizwe muri Mutarama 2014 gifite ibyo gihishe. Paul Kagame muzamugaye ibindi, nta mahano akora atabanje gutanga integuza ! Twibuke ko mu gusoza umwaka w’2013 , Perezida Paul Kagame yakoze disikuru ibwira ingabo ze ko hateganyijwe ibikomeye mu muri uyu mwaka w’2014 , kandi ko bagomba kwitegura ko uyu mwaka uzabagora cyane. Hatarashira iminsi ibiri , Koloneri Patrick Karegeya wabarirwaga mu barwanya ubutegetsi bubi bwa FPR aba yishwe anigishijwe ikiziriko, ibimenyetso byinshi bikaba bigaragaza ko Agatsiko ka Paul Kagame ariko kagiye kubazwa iby’urwo rupfu. Gusa nk’uko dusanzwe tuzi FPR, bakora ibyaha barangiza bakaba abambere mu guhinda imishyitsi ko biri bubakoreho . Bizabakoraho nyine ! None se inkunguzi y’ibikoba ntiyirahira amakara mu kibuno ?

Nk’ubu bazi neza ukuntu kugerageza kwicira Kayumba Nyamwasa muri Afurika y’Epfo byateranyije u Rwanda n’igihugu cya Afurika y’Epfo cyari gisanzwe gifasha u Rwanda muri byinshi. Twibuke nanone ko icyo gihugu cya Afurika y’Epfo gifatanyije na Tanzaniya muri Brigade d’Intervention aribyo biherutse kugamburuza Paul Kagame muri politiki ye ya mpatsibihugu, ubwo byashwanyaguzaga M 23 , Umutwe wabicanyi yiremeye akaba yawukoreshaga mu bwicanyi ndengakamere no mu busahuzi bw’amabuye y’agaciro mu burasirazuba bwa Congo .

Birumvikana ko Afurika y’Epfo itazituramira gusa nimara gukora anketi za ngombwa igasanga abicanyi baturutse i Kigali aribo bongeye kuvogera ubutaka bwayo, bakajya kuhicira Patrick Karegeya wari warahahawe ubuhungiro. Ibi Kagame n’abambari be bazi neza ko bishobora kubakoraho , n’ubwo kenshi batekereza ariko barangije gukora ibara, bagahora bibuka ibitereko basheshe.Birababaje.

Icyunamo cyo muri Mutarama nk’Indaki .

Kugira ngo bikingire ingaruka z’igikorwa cy’iterabwoba bamaze gukora muri Afurika y’Epfo n’ibindi binyuranye bateganya gukora muri uyu mwaka w’2014 , Kagame n’Agatsiko ke bibutse ko bashobora guhungira no kwikinga inyuma « y’Icyunamo kidasanzwe cyo kwibuka jenoside yakorewe abatutsi bonyine » ! Aka wa mugani ngo akaboko wicishije inkware uhora ukabangaritse !

Ikigamijwe ni ukugira ngo :

(1)Kagame n’Agatsiko ke bihishe inyuma y’amarira, bongere batere imbabazi, barerembure amaso, bereka amahanga ko bo batazi kwica , ko hica Abahutu bonyine, ko Abatutsi bahora ari ba“Victimes gusa” kubera ko aribo bishwe bonyine muri jenoside mu 1994 ; bityo bakaba bizeye ko amahanga yagira impuhwe , agatinya kubashinja urupfu rwa Patrick Karegeya  kandi bari mu cyunamo ! Barateganya ko Afurika y’Epfo nibirengaho ikabashinja urupfu rwa Patrick Karegeya nabo bazayihindisha imishyitsi bakayishinja gupfobya no guhakana jenoside yakorewe Abatutsi mu 1994!

(2) Kagame agamije kurangaza abakuru mu ngabo ze kugira ngo batabona igihe cyo gutekereza ku iyicwa ry’uwahoze ari mugenzi wabo, kandi ko bamwe muri bo aribo baraye bari bwicwe. Koko rero Kagame atabarangaje byatuma bafata umwanya wo kwisuganya bakiga icyakorwa kugira ngo ejo nabo batazapfa urwa Karegeya !

(3)Hagamijwe kurangaza Abanyarwanda ngo batabona umwanya wo gukurikira amakuru ngo bamenye uko ubutegetsi bwa FPR bukomeje gukora nk’umutwe w’iterabwoba wica Abanyarwanda mu gihugu ukanabasanga iyo bahungiye ukabatsindayo .

Umwanzuro

Kagame yemeje ko uyu mwaka w’2014 uzaba ugoye cyane, kandi iyo abibwiye ingabo aba azumvisha ko zigomba kwitegura izindi ntambara. Birahwihwiswa ko aya mezi adasanzwe y’icyunamo Kagame ateganya kuyicamo abandi bantu benshi akeka ko barwanya ubutegetsi bwe, muri bo hakaba harimo na Perezida Mrisho KIKWETE wa Tanzaniya , Joseph Kabila wa Congo na Petero Nkurunziza w’U Burundi .

Nta kindi gisobanuro twaha iki cyunamo cyo muri Mutarama uretse kugifata nk’INDAKI KAGAME yihishemo kugira ngo yungikanye ibikorwa by’ubugizibwanabi n’iterabwoba .

Abatavuga rumwe n’ubutegetsi bw’igitugu bwa Kagame bararye ari menge, uyu mwaka w’2014 ntuzaborohera, ariko ibyo sibyo byatuma bacika intege , ahubwo bakwiye kwihutira gushyira imbaraga hamwe kugira ngo FPR igaragazwe uko iri : Umutwe w’iterabwoba ukwiye gushyirishwa ku rutonde rw’indi mitwe nk’iyo, ugahagurukirwa n’amahanga, ugaseswa, Abanyarwanda n’abaturanyi b’u Rwanda bakiruhutsa .

Umwaka mwiza ku bifuza impinduka nziza bose.

Padiri Thomas Nahimana.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s