Njye ndaburanira Shitani: impamvu icyenda (9) Col Patrick Karegeya yagombaga kwicwa.

Mu gihe turimo kuririra Colonel Karegeya Patrick watuvuyemo imburagihe ndetse akagenda atarangije ikivi yatangiye cyo guhirika ubutegetsi bw’igitugu mu Rwanda,hashobora kuba hari n’abandi babona ko byari bikwiye ko yicwa.Urugero ni nk’abamwishe kimwe n’abamwicishije. Aba barimo ibice byinshi: hari abateguye umugambi, abawusohoje n’abatanze amafranga yo kuwushyira mu bikorwa babizi cyangwa batabizi. Ni ukuvuga ko niba ari Leta y’u Rwanda yahitanye Karegeya buri Munyarwanda wese utanga imisoro yagize uruhare mu iyicwa rya Karegeya atabishaka! Inyandiko ikurikira ni ubuvanganzo bukoresha imvugo izimiza ariko igasigira umusomyi igitekerezo. Kuyisobanukirwa bisaba ubushishozi. Amazina akoreshwamo ni amahimbano uretse irya Karegeya ryonyine.  

Ubwanditsi

Njye ndaburanira Shitani: impamvu icyenda (9) Col Patrick Karegeya yagombaga kwicwa.

devils-advocate

Mutwararumuri III ni umuyobozi w’abunganizi mu bucamanza ba Shitani.

Nyakubahwa Perezida w’urukiko, banyakubahwa bacamanza,

Mpagaze imbere yanyu n’icyubahiro cyinshi kugira ngo nsobanure impamvu uyu mugabo nako iki kigarasha murimo kuririra cyagombaga kwicwa, ahubwo njye mbona twese muri iki gihugu cy’i Rwahanda twari dukwiye gukora umunsi mukuru.

Sinshaka gutinda mu magambo adafite injyana reka mpite njya ku mpamvu uko zakabaye.

1.      Colonel Karegeya yarize ndetse araminuza:

Nyakubahwa Perezida w’urukiko, banyakubahwa bacamanza,

Mwese muzi ko muri iki gihugu cyacu twamaze kwemeranywaho ko injiji ari izize. Mwese muzi ko ariyo mpamvu dukomeza kwemera ko abatazi gusoma bagirwa ibikomerezwa bamwe tubagira aba general abandi bafite udushuri dukeya ba bandi bize mu Kibeho ikigoroba tukabagira Abajyanama ba Perezida wa Repubulika.Abagize ibyago byo kwiga bagomba guceceka abafite za dogitora bakaba nk’abatararikandagiyemo. Iri hame rwose nta n’umwe uriviguruza hano i Rwahanda mu myanya myinshi y’ubuyobozi niko bimeze.

Tugendeye ku byo mvuze haruguru, Nyakubahwa Perezida w’urukiko, banyakubahwa bacamanza,

Byari ngombwa ko Karegeya yicwa kuko amashuri yize ariyo yamushutse yirengagiza amategeko tugenderaho aho kwitwara nk’injiji ngo ajye ahora acecetse yazanye ivogonyo ndetse yiha kuvuguruza ibyo abenegihugu bihitiyemo.

2.      Colonel Karegeya yavuze ibyo atekereza n’ibyo atemera:

Nyakubahwa Perezida w’urukiko, banyakubahwa bacamanza,

Amategeko tugenderaho muri iki gihugu cy’I Rwahanda cyane cyane ingingo ibanza y’itegeko rigenga ubutegetsi bw’igitugu ivuga ko twese tugomba kubaha “kirazira”. Kirazira kuvuga ikikuri ku mutima cyane cyane iyo kidahuye n’ibyo ubuyobozi bushaka. Uyu mugabo Patrick Karegeya afatanyije n’ibindi bigarasha n’amasazi nka we banditse inyandiko bavuga ko ubutegetsi bw’I Rwahanda bugomba kugendera kuri demokarasi kandi nk’uko dukunze kubigezwaho n’abayobozi bacu demokarasi twarayamaganye, kuko ariyo yatumye iki gihugu gipfa kuva mu myaka 50 irenga ishize.

3.      Colonel Karegeya yari azi amakuru menshi:

Nyakubahwa Perezida w’urukiko, banyakubahwa bacamanza,

Uyu mugabo yari azi byinshi cyane cyane imigambi mibisha yose twagiye dutegura niwe wabanzaga kudushakira amakuru no kuturangira aho abo duhitana baherereye. Uyu mugabo igihugu cyacu Rwahanda cyaramugaburiye kiramwizera kimushinga kugenzura inzego z’ubutasi ariko mwabonye uko yatwituye. Yatorotse gereza arangije atangira kumena aya mabanga. Nyakubahwa Perezida w’urukiko, banyakubahwa bacamanza, ese ubwo ko mwiha kwiriza ngo yapfuye, mwari muzi ko aherutse kuvugana n’ibigarasha bitukura byo mu Bufaranswa akavuga ko azi aho misile twakoresheje twirenza Gisunzu zaturutse? Ndetse amakuru dufite mu biro bikuru by’abunganizi ba Shitani yemeza ko Karegeya yavuze n’ibindi byinshi birimo ukuntu twirengeje aba Spanyoli. Njye ndasanga iyo adapfa yari gukomeza kunyanyagiza amakuru aho adakwiye.

4.      Colonel Karegeya yari umu mafia:

Nyakubahwa Perezida w’urukiko, banyakubahwa bacamanza, Colonel Karegeya yari azi neza ko kwitandukanya n’umutwe wacu wa Mafia bizamugiraho ingaruka. Mu ndahiro umuntu wese winjiye muri uyu mutwe wa Mafia akora, harimo aho tuvuga ngo “nimpemuka nzafatwe nk’umwanzi nzakanirwe urunkwiye nk’umwanzi uwo ari we wese”, kandi uko Mafia ifata umwanzi ni ukumwohereza mu kiruhuko kidashira mwe mwita urupfu. Ahubwo Nyakubahwa Perezida w’urukiko, banyakubahwa bacamanza, ndabasaba nkomeje ko n’umurambo wa Karegeya ucibwa urubanza mukamukatira urwo gupfa rwa kabiri kuko we nk’umuyobozi mukuru muri Mafia yarengereye cyane.

5.      Colonel Karegeya yari impunzi yifashije:

Nyakubahwa Perezida w’urukiko, banyakubahwa bacamanza,

Nyuma y’aho bitunaniriye kwica impunzi ngo tuzimare mu kivunge, mu nama twakoreye muri Hotel Umulindi ku itariki ya 32 Ukwezi kwa 12 umwaka wa 2003, twemeje ko tuzajya twirenza umwe umwe mu bagomba kujya mu kiruhuko gihoraho ariko tukibanda ku baduhunze bakaba bifashije. Twemeje ko abafite amashuri yabahesha akazi keza, abafite akazi gatuma bagaragara mu rwego mpuzamahanga aribo tuzajya duturitsa. Karegeya rero yari ari muri abo. Nkaba nsanga rwose yari akwiye kwicwa.

6.      Colonel Karegeya yashakaga ubutegetsi:

Nyakubahwa Perezida w’urukiko, banyakubahwa bacamanza,

Uyu mugabo nako iki kigarasha, cyashakaga kuza gutegeka iki gihugu kandi ngo kigafatanya n’ibipinga. Abandi babigerageje Nyakubahwa Perezida w’urukiko, banyakubahwa bacamanza, mwarabafunze twe tukabona bitabaca intege kuko uko mufunze umwe havuka abandi icumi. Niyo mpamvu mu rwego rwo kubagabanyiriza imirimo twatekereje ko iyicwa rya Karegeya rizatuma abasigaye bose bahurwa kongera gushyugumbwa ngo barashaka kuyobora iki gihugu twitoraguriye mu giteme.

7.      Colonel Karegeya yashakaga kudusubiza muri jenoside:

Nyakubahwa Perezida w’urukiko, banyakubahwa bacamanza,

Colonel Karegeya ubwo yashakaga kuyobora iki gihugu bisobanura ko yashakaga kudusubiza muri jenoside yo muri 1944. Jenoside yarabaye kandi yadufashije kugera ku butegetsi nta yindi dushaka kuko ibaye yaba ariyo kubutwambura. Muri igi gihugu cy’i Rwahanda, umuntu umwe gusa niwe wabashije guhagarika jenoside akaba ariyo mpamvu mwese mwamaze kwemeza ko azatuyobora ubuziraherezo.Nta wundi ufite ubwenge n’ubushobozi bwo kutugeza aheza kuko n’abana twohereza mu mashuri mwabonye ko tubapfunyikira amazi bagasohoka za kaminuza nta kintu biyiziye. Niyo mpamvu muri iyi myaka yose tumaze ku butegetsi nta wundi washobora kuyobora iri hanga ry’I Rwahanda kuko twakomeje kwimakaza ihame ry’uko uwize agomba kuba injiji.

8.      Colonel Karegeya ntaruta abandi bose

Nyakubahwa Perezida w’urukiko, banyakubahwa bacamanza, ndagira ngo mbabwire uko uru rubanza mubyukije nta shingiro rufite kuko mutigeze mudu hamagara mu manza igihe Seti Sendashonga  cyangwa Lizinde Theoneste bicwaga. Ntimwigeze mudutera hejuru igihe Buduli Ruzibiza twamwoherezaga mu kiruhuko. Ni uko se twakoresheje uburyo mutasobanukiwe? Mpereye ku ihame rya “Stare decisis” na precedent, ubwo mutigeze mudushora mu manza ubwo twahitanaga abandi, ntabwo mukwiye kudushora mu manza ubu, nta ho byabaye.

9.      Ibindi byaha by’urusobe bya Karegeya

Nyakubahwa Perezida w’urukiko, banyakubahwa bacamanza,

Tudatinze mu makorosi reka nsoze mbashimira ubushishozi muza gucana uru rubanza kuko mu by’ukuri ari urucabana. Siniriwe ngaruka ku bindi byaha bikomeye cyane Karegeya yakoze birimo nko kunywa inzoga, gusangira n’Abahutu, kurya inyama, no kwifuza abagore kandi abagore bose ari ab’umwami.

Murakoze murakarama

Mutwararumuri III

Umuyobozi w’abunganizi ku ruhande rw’uregwa Shitani.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s