HABYARIMANA YAZANYE AMAJYAMBERE : AMATEKA Y’AMAJYAMBERE Y’U RWANDA N’ABABIGIZEMO URUHARE.

 Par:Jean de Dieu Musemakweli

Intego nyamukuru y’ingoma ya Habyarimana (1973-1994) yari amajyambere. Ishyaka rye rimwe rukumbi ryari Muvoma revolisiyonei iharanira amajyambere y’u Rwanda (MRND). Intego ishinga amategeko yitwaga Inama y’igihugu iharanira amajyambere (Conseil National de développement – CND -). Ministeri y’ubutegetsi bw’igihugu yari kandi na ministeri y’amajyambere ya komini (intérieur et développement communal). Ikigega cyari gihuriweho n’amakomini, kikagoboka arushije andi kugira ibibazo cyitwaga “isandugu mpuzamakomini igamije amajyambere” (Caisse intercommunale de développement – CID -). Uko buri mwaka utangiye, umukuru w’igihugu yabwiraga Abanyarwanda intego izitabwaho kurusha izindi mu rwego rwo gutsura amajyambere (gutura heza, ubuhinzi n’ubworozi, amazi meza mu cyaro  -hydrolique rurale- …..). Habaga kandi mu cyi rya buri mwaka icyumweru cyo gutaha no gutangiza imishinga. Hari ubwo icyo cyumweru cyamaraga iminsi 15 cyangwa 21.

Ntibyari amagambo cyangwa indirimbo gusa, ku ngoma ya Habyarimana amajyambere mu Rwanda yariyongereye koko ku buryo bugaragara cyane cyane ayo mu cyaro. Impamvu zatumye ayo majyambere agerwaho ni nyinshi, ariko twavuga nk’eshatu : ubushake (volonté politique), umuganda (Travaux communautaires de développement), imfashanyo z’amahanga n’imishinga y’amajyambere y’icyaro (projets de développement rural). “Ntawe ushimwa na bose”, ibyo birasanzwe, hari n’abatanyurwa na rimwe. Umuntu ntiyabura icyo anegura ku umuganda. Na FPR yawuvugaga nabi yarawugaruye. Ntawabura icyo anenga ku micungire (gestion financière) y’imishinga y’amajyambere yaterwaga inkunga n’imfashanyo z’amahanga ; ariko muri rusange amajyambere yariyongereye cyane mu Rwanda ku ngoma ya Habyarimana, amajyambere y’icyaro utaretse n’ayo mu migi.

Hari uwaherako atera hejuru ngo “naho se ku ngoma ya Kagame na FPR amajyambere ntari kwiyongera ?” Ari kwiyongera, ariko ntabwo ari kimwe. Amajyambere yo ku ngoma ya Kagame ni ibintu by’inkaburamatsiko, biturutse hejuru, ndetse uwashaka yanavuga ko biturutse hanze (exogène). Bizafata igihe kirekire ngo bizagere ku muturage, bishobora no kutazamugeraho na rimwe. Amajyambere yo ku ngoma ya Habyarimana yari amajyambere ahereye hasi (endogène). Yego, no ku ngoma ya Habyarimana u Rwanda rwari igihugu gikennye, ariko mu cyaro hari amafaranga aruta ahari ubungubu. Ubu mu cyaro nta n’ifaranga rihari, abaturage “bararirira mu myotsi”. Impamvu nyamukuru ibitera ni ikinyuranyo kiri hagati ya Habyarimana na Kagame, n’uburyo bwabo bunyuranye bwo gutegeka no gukora umurimo wa politiki.

Abakurambere barabivuze koko ngo “Ntayima nyina akabara” bakongera bati “isuku igira isoko, …..”. Habyarimana yari mwene Rubanda. Ise yari umwarimu wa gatigisimu. Yari azi ubukene buba mu cyaro, akamenya ko umuhinzi mworozi abona icyo kurya yiyushye akuya. Kagame we akomoka mu muryango w’Abatutsi bahunze kubera ko batashakaga gutegekwa n’Abahutu. Kuri bo u Rwanda n’ibyiza byarwo byose byari umwihariko w’Abatutsi ; Abahutu n’Abatwa bakagomba kubabera abagaragu n’abacakara.Yakuriye mu nkambi z’impunzi, bamucengezamo umunsi n’ijoro (endoctrinement) ko Abahutu bigobotoye ingoma  ya cyami, gihake na gikolonize ari abantu babi, kandi ko mu cyaro cyo mu Rwanda abahatuye benshi, hafi 98%  ari Abahutu. Ngibyo nguko, “impamvu ingana ururo”.

Abo bagabo bombi (Habyarimana na Kagame) banyuranye nanone mu buryo bwo kumva imitegekere y’igihugu n’icyo umurimo wa politiki ugamije. Nta gushidikanya, bombi bakunda ubutegetsi. Iyo intambara idatera, ntawamenya igihe Habyarimana yari kuzasezerera. Ubu Kagame nawe arahomereye, ubanza ahari ntakizamuvana mu Urugwiro. Icyo bataniyeho ni iki : igihe cyose utabaga ubangamiye ubutegetsi bwe, Habyarimana yarakurekaga ukikorera ku giti cyawe. N’Abatutsi bavuga ngo barakandamizwaga ku ngoma ya Habyarimana, yabahaga rugari bakicururiza, bagashinga nabo inganda nini, iziciriritse n’intoya. Kagame we si uko abyumva. We agendera ku ihame rivuga ko “iyo umuntu afite ubutegetsi, ashaka n’amafaranga ; yaba afite amafaranga, agashaka n’ubutegetsi”. Kubera rero ko amafaranga atuma uyafite ashaka ubutegetsi, kandi koko akaba yamufasha kubugeraho, birakwiye gukora ibishoboka byose kugirango Abahutu batagira amafaranga.

Umuturage yakuraga ifaranga mu bihingwa ngandurarugo. Politiki yo guhuza ubutaka n’iy’igihingwa kimwe rukumbi yasubije Abanyarwanda inyuma cyane. Kugirango bazaveyo bizafata igihe. Hejuru y’ibyo kandi, abaturage benshi bambuwe amasambu yabo, aha ngo ni politiki yo gusaranganya. Ko tudasaranganya se imiturirwa, imishahara, amamodoka n’ibindi byose abantu bo mu gatsiko n’abambari babo bafite ? Umuturage yavanaga ifaranga mu buhinzi bw’ibihingwa ngengabukungu (ikawa, icyayi, ikinini, pireteri n’ibindi). FPR yamaze imyaka myinshi ica intege abaturage ngo badakomeza kubihinga. Kugirango bizongere kugoboka umuhinzi nk’uko byamugobokaga ku ngoma ya Habyarimana bizafata imyaka myinshi. Umuturage yavanaga ifaranga mu bushoramari. Ubu abacuruzi boroherezwa mu kugurizwa n’amabanki, mu gutumiza ibintu no kubicuruza, ahanini ni abantu bo mu gatsiko cyangwa abemeye kujya mu kwaha kwako. Abandi bo bamburwa ubucuruzi bwabo, bagahombywa, ndetse bamwe bakahasiga n’ubuzima bwabo. Umuturage yakuraga ifaranga ku umwana we wize, akabona akazi, akagira icyo yimarira, akakimarira n’umuryango we. Ubu kugirango umwana w’umuhutu azabone amafaranga y’ishuri ni ingorabahizi. Niba abashije kwiga, kugirango azabone akazi biragoye, azira gusa “icyaha cy’inkomoko” (kuberako akomoka mu bwoko bw’Abahutu).

Umwanzuro

Hari umugani wa kinyarwanda uvuga ngo “gutwara (gutegeka) ntawe byananiye kireka uwo batabihaye”. Gutwara Abanyarwanda ntibyagombye kuba ikintu gikomeye, kuko nta kindi basaba kitari uko ubareka bakikorera imirimo ibateza imbere. Kandi amajyambere nyakuri ni ahereye hasi mu baturage, igihugu kikagenda kizamuka buhoro buhoro. Habyarimana muri rusange yarabarekaga bakikorera, hafi buri wese agatungwa mu mahoro n’utwo yiyuhiye akuya. Ingoma ya Kagame yo ihoza Abanyarwanda, cyane abo mu bwoko bw’Abahutu ku nkeke. Ikabita abicanyi, ibisambo, ibipinga n’ibindi bitutsi byinshi. Nta burenganzira bafite bwo gutera imbere kubera ko, uko Kagame abyumva, “iyo umuntu afite ubutegetsi, ashaka n’amafaranga ; yaba afite amafaranga, agashaka n’ubutegetsi”.

Twagereranije amajyambere yo ku gihe cya Habyarimana n’ayo kuri iyi ngoma ya Kagame na FPR. Kayibanda se we nta majyambere yazanye ? Ingoma ya cyami se yo nta mayambere yasize ? Abakoloni se bo nta majyambere bazanye ?

Niba Abakoloni se barazanye amajyambere, kuki ibihugu byahoze bikolonijwe byifuje kwigenga ? Niba ingoma ya cyami yarazanye amajyambere, kuki Abanyarwanda bahisemo repubulika ? Kuki se havugwa amajyambere Habyarimana yazanye, ayo ku ngoma ya Kayibanda ntavugwe cyane ?  Kuki Kagame na FPR ye birirwa bavuza iya bahanda ngo mu Rwanda hari amajyambere, ariko mu cyaro (ndetse no mu migi) inzara ikaba ivuza ubuhuha, abaturage ibihumbi mirongo na mirongo bakaburirwa irengero, mu kiyaga cya Rweru hakaboneka imirambo y’abantu 40 bishwe (na leta ?) baboheye amaboko inyuma kandi  bazingiye mu mifuka ? Mu rwego rwo gusubiza ibyo bibazo, tuzatangira kubagezaho ubutaha icyo twakwita “Amateka y’amajyambere mu Rwanda kuva ku mwaduko w’Abazungu kugeza ubu”.

 

Banyarwanda, Banyarwandakazi, basomyi namwe bakunzi b’urubuga Umuhanuzi-leprophete, mugire amahoro kandi Imana y’i Rwanda ikomeze ibarinde.

BIRACYAZA….

 

Jean de Dieu Musemakweli

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s