Kizito Mihigo si umuntu usanzwe, ni icyamamare(Star). Imana yamwihereye ingabire yo guhanga indirimbo nziza, kuziririmba biryoheye amatwi no kuzicuranga binyuze umutima. Afite abantu batagira ingano bamwikundira, ubu bose bari mu gahinda n’icyunamo kubera ifungwa rye risa n’iridasobanutse ! Nyamara ariko rifite igisobanuro.
Reka tubanze twibutse ko Kizito Mihigo atakomotse i Bugande: yavukiye i Kibeho(Gikongoro), taliki ya 25/7/981, ubu afite imyaka 33! Se umubyara yitwaga Augustin Buguzi, yazize jenoside mu 1994. Nyina yitwa Placidia IRIBAGIZA.
Kizito Mihigo yatangiye kuririmba afite imyaka 9 gusa. Ageze mu Seminari nto ya Karubanda, ntiyashoboye kuyirangiza kuko igihe kinini yakimaraga mu ndirimbo ntabone umwanya uhagije wo kwiga andi masomo. Yahimbye indirimbo zirenga 200 za liturujiya zakunzwe n’abakirisitu bo mu maparuwasi menshi y’u Rwanda.
Kizito Mihigo yamenyekanye kurushaho mu ndirimbo zinyuranye zo kwibuka cyane cyane iyitwa “ Amateka” yaririmbye mu mihango yo kwibuka ku ncuro ya 17 n’iyo yaririmbiye u Rwanda yitwa “Imbimburirakubarusha” yahimbye mu gihe cy’amatora yo mu 2003.
Kizito Mihigo ari mu benegihugu bake bakunzwe cyane n’abanyarwanda benshi b’amoko yombi. Ari nabyo nyine bimukwegeye ingorane arimo ubu.
II. Icyaha gikomeye Kizito yaba yarakoze kimuviriyemo gufungwa ni ikihe?
Kumva ko Kizito yaburiwe irengero byonyine byari byahagaritse umutima w’abakunzi be. Kumenya ko ari mu maboko ya polisi y’u Rwanda byateye benshi amakenga dore ko FPR yari imaze iminsi imushakaho akamunani nyuma y’uko ahimbye indirimbo yise “Igisobanuro cy’urupfu? Requiem reconciliateur”. Iyi ndirimbo nayo ikaba yarakunzwe ku buryo budasanzwe,cyane cyane ko yaje ifite ubutumwa busonzewe na benshi bwo kwamagana ivangura rikorerwa abapfuye n’abapfushije. Muri iyi ndirimbo Kizito aremeza ko urupfu ari rubi kuri bose, icyo rwaba ruturutseho cyose, yaba jenoside, kwihorera, indwara, impanuka…Aremeza ko upfushije wese ababara kandi akaba afite uburenganzira busesuye bwo kwibuka no gutabarwa. Arahamya ko dukwiye gusabira abacu bose bapfuye, nta vangura .
Ubwo butumwa nibwo butanyuze abambari ba FPR-Inkotanyi bazobereye muri politiki ruvumwa yo guca abanyarwanda mo ibice. Ba Tom Ndahiro , Umujyanama mukuru wa Perezida Paul Kagame, n’abandi Bashinjabinyoma babigize umwuga bahise bamera amababa , bitwikira akababaro ngo k’ ” Abacitsekwicumu” da, baterera Kizito Mihigo ku munigo, bamushyiraho itarebwoba n’ihagarikamutima rirenze urugero, baramupfukamisha ngo nasabe imbabazi, bamwandikisha inzandiko zo kwemera no gusaba imbabazi z’ibyaha atakoze …ari nazo nyine zizakoreshwa mu kumushinja imbere y’urukiko mu rubanza rwe ruzatangira mu minsi mike iri imbere aha !
Polisi yo ngo iramushinja iki ?
Nk’uko byasohotse mu binyamakuru binyuranye bisanzwe bivugira Leta y’Agatsiko, itangazo rya Polisi riravuga ko Kizito Mihigo akekwaho gukorana na FDLR n’ubuyobozi bukuru bwa RNC ngo kandi iyo mitwe yombi ari iy’iterabwoba. Arashinjwa kandi gutegura ibitero bihungabanya umutekano w’igihugu, GUHIRIKA LETA, kwica bamwe mu bategetsi b’igihugu barimo Abaministri…..Ejo mu gitondo bazaba bamwongereyeho no kwiba amafaranga mu ma Banki bityo bamwabure umutumgo yari amaze kwihahira, bamuharabike bamuhindanye he kugira n’uzongera kumucira akari urutega.
Kuko tumaze kumenyera umuco mubisha wa FPR wo gutekinika amadosiye, ntawe utabona ko ibi byaha byose ari ibihimbano bya nyirarureshwa, kereka kimwe : Guhirika Leta ! Reka tubisesengure.
II. Kuki Kizito ashinjwa guhirika Leta kandi atari umunyapolitiki?
Ibanga ni aha riri. Mu by’ukuri FPR-Inkotanyi yifatiye ubutegetsi ku ngufu nyuma y’intambara yarimbuye Abanyarwanda basaga miliyoni 2,Abahutu n’Abatutsi. Ariko kugira ngo iyi Leta irambe ku butegetsi yashyize imbere “jenoside yakorewe Abatutsi”, ishuka Abatutsi barokotse ko aribo ikorera, ko aribo yarwaniriye, ko intambara yatangije taliki ya 1/10/1990 yari igamije guhagarika jenoside ! Kagame ntacyo atakoze ngo abumvishe ko ari we Muremyi w’Abatutsi n’Umukiza wabo ku buryo atariho batabaho; ko navaho kazaba kababayeho; bityo rero bakaba bagomba kumwemera, kumusenga, kumusingiza, kumuramya no kumukirikira nk’amatungo kabone n’iyo yaba abajyanye mu ibagiro babireba, babibona. Benshi mu Batutsi babaye nk’abarabyemera kubera akababaro gakomeye bari bavuyemo. Nta wahakana ko nyuma ya 1994 benshi mu Batutsi barokotse batashyizwe ku ibere bakanafashwa muri byinshi, ugereranyije n’uko Abahutu bahinduwe rubebe, ibipinga, abajenosideri, “Nothing”… Gusa icyo bamwe mu Batutsi bahoze mu Rwanda batazi, ni uko: “ uko gufashwa, ubwo burenganzira bafite, ubwo bwigenge n’ubwisanzure bahawe na FPR….bifite aho bigarukira”. Mbese bariho nk’ihene iri ku kiziriko, ishobora kubanza kwibwira ko yigenga nyamara ikarisha gusa aho ikiziriko kigarukira! Ishobora guhabwa ikiziriko kirekire ndetse cyane, ariko ni ikiziriko. Ntikirenga.
(1)Abatutsi bahoze mu Rwanda, (ubundi FPR yajyaga yita ko ntaho bataniye n’Abahutu), bemerewe kubaho gusa igihe cyose batabangamiye inyungu za Paul Kagame n’Agatsiko ke. Iyo bazamuye akajosi karatemwa cyangwa kagashyirwamo umugozi. Niba ushidikanya, ibuka ba Aciel Kabera, wongereho Rwisereka n’abandi benshi nawe waba uzi.
(2)Abatutsi bose(harimo n’abahoze mu Gatasiko!) ntibemerewe “gukora politiki” yagira icyo ivuguruzaho amahano yakozwe kandi agikorwa na FPR-Inkotanyi. Iyo hagize uhirahira ngo arashinga umutwe wa politiki udakorera mu kwaha kw’Icyama, arafatwa, agakubitwa, akandagazwa, atahambwa abona agakatirwa igihano gisumba icy’Abahutu bakoze icyaha kimwe. Niba utari ubizi uzasobanuze impamvu Deogratias Mushayidi yakatiwe burundu kandi yarabanje gufasha FPR bikomeye! Ugize se ngo hari ikindi Koloneli Patrick Karegeya yazize, Kayumba Nyamwasa we akarusimbuka hamana ?!
(3)Abatutsi bahoze mu Rwanda ntibemerewe gukira cyane, kumenyeka, kugira “influence”, gukundwa n’Abahutu …igihe cyose FPR itabafiteho ijambo risesuye, ngo ibe ibagenzura 100%. Ugerageje gushyira mu gaciro, akanenga ibitagenda agamije ko byakosorwa ngo akarengane kagabanuke, ivangura ricogore, igihugu kirusheho kugira amahoro, uwo aburirwa irengero, ibye bikarangira bityo.
(4) Twibuke abana benshi b’urubyiruko b’Abatutsi barokotse jenoside ubu bakaba basigaye ari ba nyakamwe batagira imiryango ibarengera: nibo FPR ifata ku ngufu, ikabanyereza, ikabajyana mu ngando za rwihishwa batorezwamo ibikorwa by’ubugizi bwa nabi, ibi tubona bikorerwa rubanda mu gihugu no hanze yacyo. Bene abo bana , FPR yabahinduye nk’amatungo yayo: ibica umusubizo kandi ikabanigira igihe ishakiye ntawe ubaza ibyabo . Iyo hagize uwiha ibyo gushyira mu gaciro agashaka gusohoka muri ubwo buzima budashobotse, iyo atabaye inyaryenge ngo ahunge igihugu hakiri kare, aricwa nta kabuza. Bene abo bana b’abatutsi bakubitwa agafuni buri munsi, ntibagira ingano, kandi ntawe ubavugira. Ubuhamya bunyuranye twahawe kuri icyo kibazo tuzabushyira ahagaragara mu minsi iri imbere.
III. Dore icyo Kizito Mihigo azira!
Kizito ni umwe muri ba Batutsi bake bazamutse batabikesheje kuba abana b’Agatsiko. Kizito Mihigo yamenyekanye ku bw’impano ye. Birumvikana ko Agatsiko ka Kagame katabuze kumushyigikira, bigatuma atera imbere ku buryo bwihuse. Gusa nk’abandi Batutsi barokotse,bibaye ngombwa nyine ko agera aho agonga cya kiziriko ! Hari aho atagombaga kurenga.
Kizito arazira “ibyaha” bibiri gusa ibindi ni amashyengo matindi ya FPR.
(1)Kizito arazira ko yashoboye kwigeza aheza ku mbaraga ze gusa ( Il est victime de sa réussite). Iyo umuntu amaze kuba icyamamare ahinduka Uvugarikijyana(Leader). Kubera ko Kizito Mihigo yagize abantu benshi bamukunda kandi bamwumva, byatumye FPR imufata nka DANGER. Icyo gihe yatangiye kumuhozaho ijisho,ikagenzura ibyo avuga n’ibyo akora. Yamwemereye kubaho igihe cyose ubwamamare bwe bwatezaga imbere inyungu z’Agatsiko. Kuva ku munsi byagaragaye ko ashaka guca ku ruhande gato, yari agatoye. Nicyo cyaha cya kabiri cya Kizito.
(2)Kizito Mihigo arazira icyaha gikomeye cyane mu maso ya FPR cyitwa « Gushyira mu gaciro ».
Kizito Mihigo ni umwana wahawe uburere bwa gikristu, mu muryango we no mu Seminari, kandi kuva akiri muto akaba yaratojwe kubana n’abantu bose. N’ubwo jenoside yamugize imfubyi, Kizito ntayobewe inkuru y’ibihumbi byinshi by’Abahutu batikiriye hariya avuka i Kibeho bikozwe n’Inkotanyi Jenerali Ibingira n’abicanyi be, ku itegeko rya Paul Kagame.
Kugira ngo Kizito akomeze afunge amaso, yemere kandi yigishe ko Abahutu bo atari abantu byagomba kugira aho bizarangirira . Kugira ngo Kizito akomeze amiragure bunguri ibinyoma nka « Ndumunyarwanda », kandi bigaragara ko abayigisha bataraba n’abantu, ahubwo ari babandi bahora bivuga ibigwi by’ubunyamaswa bwabaranze kandi n’ubu bukibaranga…byari kuzagera aho bikamugiraho ingaruka mu mutwe n’umutima ukamuhagararana.
Ng’uko uko Kizito yageze aho afata icyemezo cyo kwigarukamo, «ashyira mu gaciro », maze yiyemeza gushyigikira gahunda ya Leta y’Ubumwe n’ubwiyunge. Yibwiraga ko abavuga ubumwe(to stay together !) baba bavuga ubw’Abenegihugu bose, atazi ko biba bivuga ubumwe bw’abagize Agatsiko-Sajya n’imiryango yabo yonyine, n’inyungu zabo gusa ! Intamenya ntibwira umugenzi.Ng’uko uko Kizito yaba Mugo, ayoberwa amakata y’Abamene, agwa mu ruzi arwita ikiziba!
Dufate iki , tureke iki ?
Kizito ntabwo yanga Paul Kagame, nta n’ubwo arwanya ubutegetsi bwe. Ntabwo Kizito yateganyaga guhungabanya umutekano w’igihugu mu bikorwa by’urugomo, kubimushinja ni ukumutobera amateka !
Twizere ko bariya bagenzi be 2 babambanywe nka bya bisambo byo ku musaraba wa Yezu,(umwe iburyo, undi ibumoso) atari abateguriwe kumushinja cyangwa kumunekera iyo mu ibohero ! Ibyabo tuzabigarukaho ubutaha.
Kizito Mihigo arazira ibyo rubanda idakeka : Arazira ko ari icyamamare, ko afite amafaranga, ko ashobora kugira « influence’’ …ariko akaba atagishaka kumvira no gukurikira butama politiki y’urwango, akarengane, irondakoko n’iterabwoba rya FPR-Inkotanyi. Ngicyo icyaha kigiye kumucisha umutwe.Ubu rwose umwana w’umusore nk’uyu wari utangiye kuzamuka, uteye ubwuzu, wendaga gushinga urugo, FPR igiye kumucamo kabiri (casser), imutindahaze, imuhindure rubebe, imugaragaze nk’Ikigarasha(Nothing) cyangwa imwabure n’ubuzima, abamukundaga bituramire, birangire bityo, isi ikomeze izenguruke.
Nimutohoza neza, ntimuzatungurwe no gusanga biriya birego by’iterabwoba Leta ya Kagame igeretse kuri Kizito Mihigo ari byo yenda FPR ubwayo yashakaga kumushoramo kugira ngo ahindurwe igikoresho cyo kugirira nabi “abanzi bayo” bari hanze y’igihugu….Kizito yabangira bakiyemeza kumwihimura muri buriya buryo . Birabe ibyuya!
Abatutsi bose barokotse bashatse bahera aha, bakarekera aho kwipfuka intoki mu maso nk’abana, bakamenya neza isura nyakuri ya FPR Inkotanyi(Umutwe w’iterabwoba ukwiye kongerwa ku rutonde rw’indi iteye nkawo, ukarwanywa) ; bagasubiza amaso inyuma bakareba amateka, bakitegereza uko FPR iyagoreka nkana yishyira aheza ; bakongera bagaterera ijisho ku byabaye mu 1994,bakiyumvisha neza n’uruhare rukomeye FPR yabigizemo ; bagasoza bareba ejo hazaza n’urwobo FPR ibaganishamo nanone, mu gihe ikomeje kubakoresha ngo basenye bidasubirwaho abavandimwe babo b’Abahutu kandi bigaragara neza ko FPR igeze mu marembera !
Batutsi b’i Rwanda, muzakomeza kuzirikwa ku kiziriko nk’ihene kugeza ryari ? Ishema ryo kugirwa igikoresho n’umugizi wa nabi riri he ?
Umwanzuro
Abakunzi ba Kizito Mihigo, « mobilisez-vous », izi nkenya z’Inkotanyi zizaduhekura kugeza ryari ? Harya ngo Kizito Mihigo arashinjwa umugambi wo guhirika Leta y’Inkotanyi ? Leta irenganya inzirakarengane bigeze aha, Leta ikora itya, ni nde utatanga umuganda wo kuyihirika uretse ikigwari! Uwampa amaboko ngo nkwereke uko nyirimburana n’imizi ntazuyaje ! Trop c’est trop. Banyarwanda, Banyarwandakazi, Batutsi-Batwa-Bahutu : Revolisiyo iri mu biganza byacu.Ni wo muti.
Padiri Thomas Nahimana
GAHUNDE 