Category Archives: ISHEMA Party

Imyigaragambyo yamagana Paul Kagame i Buruseli mu Bubiligi.

Paul Kagame akomeje iterabwoba ku banyarwanda bamuhunze !

Kuri uyu wa 18 kamena 2019, abanyarwanda batagira ingano bahuriye i Bruxelles mu Bubiligi
Kwamagana umunyagitugu Paul Kagame wari witabiriye inama ya EUROPEAN DEVELOPMENT DAYS(EDD) yateranye ku nshuro yayo ya 13.
Insanganyamatsiko y’iyi nama iragira iti “Addressing inequalities, building a world which leaves no one behind” ngenekereje mu Kinyarwanda “kurwanya ubusumbane, kubaka isi itagira uwo isiga inyuma”
Iyi nsanganyamatsiko yatumye nibaza icyo Umunyagitugu Paul Kagame aba aje gusangiza abandi mu gihe mu Rwanda harangwa ubusumbane mu mfuruka zose z’igihugu; muri serivise no mu buzima bwa buri munsi ! si icyo gusa kandi PAUL KAGAME icyo Arusha abandi nuko agerekaho gukenesha rubanda; kuburabuza; kwica umuntu wese ugerageje kugaragaza ko mu Rwanda ubusumbane bwahawe intebe!
Ni muri urwo rwego abanyarwanda baturutse imihanda yose y’isi, bakitabira imyigaragambyo bamaganira kure kandi bagaragariza amahanga uburyo umunyagitugu Paul Kagame adasiba kugarika ingogo haba mu Rwanda ndetse no hanze yarwo.
Intero y’abitabiriye imyigaragambyo yagiraga iti:”Paul Kagame umwicanyi, yishe Rwisereka, yica Anselme Mutuyimana, yica abanyarwanda, yica abanyekongo, yica abanyamulenge, yica abafaransa, yica ababiligi,……….Paul Kagame agomba gufatwa akajyanwa i La Haye” ayo niyo mashyi n’impundu yakirijwe umukuru w’igihugu cy’u Rwanda.
Igihe imyigaragambyo yari irimbanyije, intore za Kagame zibasiye imodoka za bamwe mu bari bitabiriye imyigaragambyo zizimena ibirahure! Izi modoka zari ziparitse kure gato y’ahaberaga imyigaragambyo.

Abigaragambya bakimara kubona ibyabaye bitabaje Police dore ko yari ibacungiye umutekano! Police yahise itangira iperereza kuko izo ntore zitahise zifatwa.
Abanyapolitike ndetse n’abahagarariye imiryango ya société civile bari aho, bavuzeko bagiyegukora rapport y’ibyabaye maze bagahamagarira abanyarwanda n’abanyamahanga cyane cyane abatuye i Bulayi mu myigaragambyo karundura yamagana iterabwoba umunyagitugu Paul Kagame akomeje gukorera abanyarwanda, haba mu Rwanda ndetse no hanze yarwo.
Mu ijambo ryo gusoza imyigaragambyo , umuhuzabikorwa wa société civile (CLIIR) Joseph Matata, yabwiye abitabiriye imyigaragambyo ati:”Kagame mwaramuhagurukiye, ntabwo ari igiparu aravaho! Indi nkuru nziza nuko intore ze yazitoje kwicana, twebwe twabatoje kuba libre no kwerekena uburenganzira bwanyu no gutinyuka. Muri abagabo!” Akomeza agira ati “umudigitateri yigiza nkana kuberako aba abona abantu bamwihoreye, ariko iyo bamuhagurukiye!!! Umudigitateri afite utuboko tubiri, akagira utuguru tubiri, akagira agatwe kamwe, akagira amatwi abiri, akagira umunwa umwe, akagira amaso abiri, ni nk’umuturage uwo ariwe wese! Ni ukuvuga ko imbaraga umudigitateri afite nimwe muzimutiza, muzimwambuye yakwirukanka akamera nk’inkoko ikwamiye mu nkike! Ubwo rero murabyumva ni ahanyu, mumwambure amaboko ahasigaye ak’umwicanyi kazaba gashobotse!”
“Kurwanya ubusumbane, kubaka isi itagira uwo isiga inyuma” bigomba guhera mu Rwanda , umunyagitugu Paul Kagame nta mwanya akwiye mu ruhando mpuzamahanga!

Ijisho ry’umutaripfana
Rugaravu Protais

Jeanne Mukamurenzi arahamagarira abategarugori revolisiyo ihereye mu mbere

Leave a reply

ABANYARWANDAKAZI TUGOMBA GUTANGIRA IBIKORWA BY’AMAHORO DUHEREYE KU BAGABO N’ABASORE B’ABANYARWANDA.

Intambara iteka zateye ibibazo mu bana b’u Rwanda birakara kuva kubw’Umwami Ruganzu wa Kabili Ndoli,ngiyo Rucunshu… kugeza ubu mu 2019.

A.Mu kwitabira ibikorwa by’amahoro,abanyarwandakazi bose kuva kuwa 01 Nyakanga 2019,itariki u Rwanda rwigengeyeho niba twumva uburemere bwabyo,dusabwe gufatira ibihano abagabo n’abasore bigize ntibindeba n’intakoreka mu rugamba rw’amahoro duhagarika kubumbulira amaguru ibigwali by’abagabo n’abasore.

B.Ntibyumvikana ukuntu hari ababyeyi nkatwe bamaze imyaka 25 mu Magereza abandi 28 babungera bazira ubusa,abiruka mu mashyamba boshye ibikoko banafatwa ku ngufu,abicuruza kubera ubukene bigeretseho n’ibikorwa biteye isoni biba ku mugaragaro mu Rwanda bikorerwa abo duhuje uko Nyagasani yaturemye;uburyo twakomeza gutetesha ibigwari tutabifatira ibihano.Ari Umuhutu,Umututsi n’Umutwa mu Rwanda no mu mashyamba bambuwe ubumuntu na FPR.Abacu bishwe bagizwe ibicuruzwa.Imisoro,imisanzu,amashuri,ubuvuzi,ubuhinzi n’ubworozi …byose byahindutse isayo yamize rubanda.Harya ngo umusonga wundi ntukubuza gusinzira! Iby’iwacu birarenze usinzira ntacyo yibajije ni umurwayi ukwiye kujya mu baganga bita ku ndwara z’ihungabana ritagaragara.

C.Hari abambwiye ngo basaza bacu baduta bakajya ahandi;bizamenywa ku isi kuko nta mwari n’umubyeyi uzakingurira ibigwari yewe n’abicuruza bazabimenya !!!Yaba uwubatse,umupfakazi,uwatandukanye n’utarashaka ubu butumwa burabareba. Muduhe ibitekerezo kandi ntibushingiye ku ishyaka,umuryango runaka,ni igikorwa kireba buri mubyeyi n’umwari ushyira mu gaciro.Ibiducamo ibice tubyirinde tube nka « Mouvement » ya ba « Jilets Jaunes » mu Bufaransa.

D.Ntituruta Victoire Ingabire uheruka kubaka urugo akiri i Burayi .Yashoboraga kuhaguma ubuzima bugakomeza kurusha benshi muri twe.Ese abagabo bo bibaza bene wabo nka ba Mushayidi Déogratias,Docteur Niyitegeka Théoneste none hikubiseho n’umusore Sankara Callixte uri mu mazi abira naho abandi bari gukina kuri Watsapu mu bazungu no mu bihugu bya Afurika, Aziya na Austaliya.

E.Tugomba kwiga uko twigaragambya i Bruxelles,Genève, New York, Paris, Moscou, Ottawa, Pretoria, Sydney, Lyon,Washington , Oslo n’ahandi.Abanyepolitiki bacu bameze nk’Abajenerali batagira ingabo.Bashyira hamwe gute abayoboka amashyaka ari ntabo ngo babotse igitutu.Njye sinabagaya babuze abanyarwanda bari mu mahanga. Ntacyo amahanga ataduhaye nitwe twinaniwe.

F.Nidutinyuke tuzambare imyenda ihisha imyanya y’ibanga murebe ku isi itumva umubyeyi n’umwari w’i Rwanda.N’ubundi ku mapiscines niko dukora nta kibi kirimo kimwe n’imyambarire runaka.

G.Noneho icy’ingenzi tuzabikora tugamije gutabara atari ukwinezeza no kwiyerekana. Abakuru b’ibihugu bazadutumaho naho nituguma mu bikoni,amakwe,iminsi mikuru, amazimwe n’ibindi ni ukuri tuzabazwa amaraso y’abanyarwanda bari mu Rwanda no mu Mashyamba.Ibikorwa by’amahoro bikozwe na benshi biruta intwaro Amerika itunze.

H.Abagabo n’abasore batinya gutabara mu mahoro no gufata umuheto koko twabita iki?Murantuka kahave ariko simbura abanshyigikira. Kurya, Kunywa,Kugura Amazu, Gukora cyane cyangwa kunebwa cyane,Gukwiza Impuha, Inzangano, Gusuzugurana mu mago,mu bubari no ku materefoni mutava aho muri mwibwira kw’agatsiko kabyitayeho ka bariya bicanyi b’i Kigali bica ururo n’icyatsi.

I.Abagabo n’Abasore ntibitabira imyigarambyo ikozwe mu mahoro kandi intwaro ya mbere ni iyo izindi zikaza nyuma zirimo itangazamakuru, ibitabo,ibiganiro mbwirwaruhame,Sitini,Kwigisha abo mu Rwanda gukomanyiriza agatsiko mu mayeri mu rwego rw’ubukungu…Abagabo n’Abasore ntibasobanura ikibazo cy’u Rwanda mu turere babamo mu mahanga .Abagabo n’Abasore bacu babuzemo ba Matata Joseph n’abandi banyapolitike babyimeje nk’igihumbi barwanira hirya no hino.

J.Umuntu nka Sezibera wamaze abantu akabatera ubwoba.Niba mudahagurutse mu bikorwa by’amahoro indege zirajya zibamena i Kigali buri munsi guhera umwaka utaha muzira ubusa.Ubwenegihugu bw’amahanga mwiratana,agatsiko kabugize ubusa kanyuze mu Bayahudi bamwe n’abazungu.Maze musange abo mwanze kurengera mu mahoro buzuye ibigo by’iyicarubozo mutinya kubi.Bamwe mwanabibayemo nayo mashyamba.

K.Ibi ntibireba abari n’abategarugoli bo mu Rwanda no mu Mashyamba.N’ubundi abagabo n’abasore baho nabo ubwabo bifitiye ibibazo byuwo mukino ukinwa n’abijuse.Abo mu gatsiko nibo bijuse nk’Abatutsi n’Abahutu bari hanze aha. Abatwa ni mbarwa.

L.Twungurane ibitekerezo maze kuwa 1 Nyakanga 2019 ibigwari by’abagabo n’abasore bikanirwe ibirukwiye kandi bazabone duseruka nka Ndabaga turi benshi.Ibikorwa biruta amagambo. Nibitunanira tuzitwa Ibigwarikazi.Njye nizeye umubyeyi n’umwari w’i Rwanda.

Tubiture Imana y’ i Rwanda.

Jeanne Mukamurenzi,
Norvège.

One thought on “Jeanne Mukamurenzi arahamagarira abategarugori gutangiza Revolisiyo ihereye mu mbere !”

Olivier dit :

8 mai 2019 à 08:32

Mukamurenzi ko mbona bitoroshye ibyo uvuga?Ahubwo byo,nimuhaguruke turabajya inyuma. Alla ntiyurukanye Bashir se kureba?Gusa ndakumva pe.Ibyabo iyo bije no intambara ni mwe bisenya cyane. Ni ngombwa rwose gukanguka.Ariko kutatubumburira amaguru,Sinzi niba Hari icyo byatwara kariya gatsiko ahubwo nimuduhate ubushake muhaguruke.Humura kdi Hari benshi barikuza bagera ikirenge my cya Ingabire ,wowe,ba leonila ba Diani…Njye ndagushyikiye cyane kuri icyo cyo guhaguruka pe tukajya mu muhanda no ku rugamba, ariko ntimuterwe NGO namwe mwitere .Igihe cyo kirimo kiregereza.

Répondre

Laisser un commentaire

Votre adresse de messagerie ne sera pas publiée.

Commentaire

Nom

Adresse de messagerie

Site web

Prévenez-moi de tous les nouveaux articles par e-mail.

Ce site utilise Akismet pour réduire les indésirables. En savoir plus sur comment les données de vos commentaires sont utilisées.

Ishema Party : Tugiye gukorera politiki mu RWANDA.

Leave a reply

Itangazo No 2019/05/001

Itangazo rigenewe itangazamakuru

« KUJYA GUKORERA POLITIKI MU RWANDA NI IHAME RIDAKUKA »

Hashingiwe ku ngingo 50, 51 na 52 y’Itegeko -Shingiro rigenga Ishyaka ISHEMA ry ‘ u RWANDA,

ABATARIPFANA bayobowe na Madame Nadine Claire KASINGE, Perezida w ‘Ishyaka, bateraniye muri KONGERE IDASANZWE yabereye i Paris kuri iki cyumweru taliki ya 5 Gicurasi 2019.

Tumaze kuzirikana uko abaturage b’ igihugu cy’u Rwanda barushaho kuzahazwa n’ingaruka z’ubutegetsi bw’igitugu bukomeje no gufunga urubuga rwa politiki,

Tumaze gusubiza amaso inyuma no gusuzumana ubushishozi intambwe zatewe mbere n’Ishyaka no kwicengezamo isomo ry’ibyadukomye mu nkokora :

I. Kongere idasanzwe yafashe ibyemezo bikurikira :

Yongeye gushimangira umurongo Ishyaka Ishema ry’u Rwanda risanganywe : Kujya gukorera politiki mu Rwanda ni ihame ridakuka.
Yatoye kandi igena Umutaripfana Padiri Thomas NAHIMANA nk’Umukandida uzahagararira Ishyaka Ishema ry’u Rwanda mu matora ya Perezida wa Repubulika ateganyijwe mu mwaka wa 2024
Yagennye abagize Ikipe bazafatanya.

II. Yahaye Umukandida n’Ikipe ye izi nshingano zikurikira:

Gukora ibishoboka byose bakagera mu Rwanda bitarenze taliki ya 1 /11/2019
Kwandikisha ishyaka Ishema ry’u Rwanda
Kwitegura no kwitabira amatora y’Inzego z’ibanze ateganyijwe mu mwaka wa 2020
Gutegura no kwitabira amatora y’abagize Inteko Nshingamategeko ateganyijwe muri 2023
Gutegura no kwitabira itora rya Perezida wa Repubulika rizaba mu mwaka wa 2024

III. Icyo dushishikariza Perezida Paul Kagame na Leta ye :

Gufungura amarembo Abanyarwanda bifuza gusubira mu gihugu cyabo bagataha nta nkomyi
Guha urwandiko rw’inzira (Pasiporo) abagize Ikipe y’Ishyaka Ishema ry’u Rwanda biyemeje gusubira mu gihugu cyabo no kutababangamira mu burenganzira bugenewe buri mwenegihugu.

IV. Icyo dusaba Abanyarwanda muri rusange :

Gushyigikira Ishyaka Ishema ry’u Rwanda n’Umukandida waryo mu bikorwa byose bijyanye n’iyi gahunda yo kujya gukorera politiki mu Rwanda hagamijwe kugira uruhare mu gufungura urubuga rwa politiki no kugeza ku benegihugu ubutabera, ubwisanzure busesuye n’imibereho myiza basonzeye.

V. Icyo dusaba abanyarwanda bari mu buhungiro :

Turasaba Impunzi z’abanyarwanda guhaguruka tugafatanya urugendo rwo gusubira mu gihugu cyacu.

U Rwanda ni igihugu cyacu twese , nta Nkotanyi n’imwe ifite uburenganzira bwo kwiyitirira u Rwanda no kuduheeza mu Urwatubyaye.

Bikorewe i Paris,

Taliki ya 6/5/2019

Nadine Claire KASINGE,

Perezida w’Ishyaka Ishema ry’u Rwanda

TUGIYE GUTANGIZA « MARCHE DE LA REVOLUTION »

Leave a reply

Itangazo rigenewe itangazamakuru

TUGIYE GUTANGIZA « MARCHE DE LA REVOLUTION »

Nyuma y’ifungurwa rya Madamu Victoire Ingabire UMUHOZA ryo ku itariki ya 14/09/2018, Ishyaka Ishema ry’u Rwanda ryishimiye gutangariza Abanyarwanda inshuti z’u Rwanda n’imiryango mpuzamahanga ibi bikurikira :

1. Twishimiye ko Madamu Victoire INGABIRE UMUHOZA yafunguwe akavanwa mu buroko yari amazemo imyaka umunani azira akamama. Gusa ibi byishimo ntibikuraho icyaha gikomeye uyu mutegarugori yakorewe cyo kwamburwa uburenganzira bwe bwo guhatanira amatora ya Perezida wa Repubulika mu mwaka w’2010. Birakwiye ko abagize uruhare mu kugambanira, gushinja ibinyoma no guca urubanza rwo kubamba Ingabire Victoire UMUHOZA bagenerwa ibihano ntangarugero kugira ngo umuco wo kurenganya abenegihugu uranga ubutegetsi bwa FPR Inkotanyi ucike burundu.
2. Dushyigikiye byimazeyo umugambi wo gukorera politiki imbere mu gihugu kugirango hafungurwe urubuga rwa politiki kandi haboneke inzira ihamye yo kubohoza rubandigoka, imaze guhindurwa inkomamashyi n’abagererwa, nk’uko byahozeho mbere ya Revolution ya Rubanda yo muri 1959.

3. Tuributsa ko umugambi wo gucira INGABIRE Victoire ishyanga Kagame yashyize ahagaragara tariki ya 19 /09/2018 yawugeragereje ku ikipe y’Abataripfana yari igizwe na Padiri Thomas NAHIMANA, Madamu Claire Nadine KASINGE, Bwana Venant NKURURNZIZA na Bwana Skyler KEJO ku matariki tariki ya 23/11/2016, na 22/02/2017. Mu gihe aba Bataripfana biyemezaga kujya gukorera politiki mu gihugu gakondo cy’abasogukuruza babo, KAGAME yanze ko binjira ku mbibi z’u Rwanda. Politiki yo kwishongora ya Bwana Paul Kagame no gucira ishyanga abanyarwanda batavuga rumwe na we, ni amahano ku benegihugu twese, tukaba tugomba kuyirwanya no kuyamaganira kure.
4. Mu rwego rwo guca iyi « politiki ya mucirishyanga » yadukanywe na Paul Kagame n’agatsiko k’ Abanyamurengwebagashize akuriye, Abataripfana biyemeje gusubukura umugambi wabo wo kwerekeza mu gihugu cy’abakurambere bemye mu rugendo bise « Urugendo rwa Revolusiyo » (Marche de la Revolution).

Bityo rero turasaba abanyarwanda bose

A. gufatana urunana muri uru « rugendo rwa Revolution » kugirango umugambi wo guhagurukira gufunguza urubuga rwa politiki no kubohoza rubandigoka ugerweho byihuse

B. Gukomeza gushyigikira no gukurikirana ibikorwa by’abalideri bahagurukiye by’ukuri uru rugamba rwo gutabara Rubandigoka yatawe ku munigo n’agatsiko k’Abanyamurengwebagashize

C. Kudakangwa n’imvugo z’iterabwoba z’umunyagitugu Paul Kagame ahubwo buri munyarwanda akamenya ko afite uburenganzira n’inshingano zo kutemera gukomeza kugirwa inkomamashyi n’umugererwa mu gihugu cyamwibarutse.

D. Kwemera kwitangira igihugu cyawe kabone nubwo wakimenera amaraso nibibangombwa no guhaguruka nk’abitsamuye tugatera ingabo mu bitugu Madame INGABIRE UMUHOZA Victoire, ukomeje kugaragaza ubutwari ntangarugero.

Turashimira abakomeje kutugaragariza ko bashishikajwe n’ubufatanye mu bikorwa byo kwihutisha Revolution ya Rubanda igamije gukuraho ubutegetsi bw’agatsiko k’Abanyamurengwebagashize no kwimika bidasubirwaho ubutegetsi bwa Rubanda, bushyizweho na Rubanda kandi bukorera Rubanda.
Urugendo rwa Revolusiyo twese ruratureba

Bikorewe Montreal kuwa 23/09/2018

Mme Nadine Claire Kasinge,
Presidente w’Ishyaka Ishema ry’u Rwanda

Ishema ry’u Rwanda: Nadine Kasinge, Umuyobozi mukuru mushya

Leave a reply

ITANGAZO RIGENEWE ITANGAZAMAKURU

Itangazo N° Ishema 2018/05/002

« Ni koko guharanira impinduka bitangirira mu gikari »

Nk’uko byari byatangajwe kuwa gatanu tariki ya 04/05/2018, ku cyumweru tariki ya 06/05/2018 abagize ubuyobozi bw’ishyaka Ishema ry’u Rwanda bateraniye mu mwiherero udasanzwe mu mujyi wa Paris mu Bufaransa.
Bamaze kungurana ibitekerezo ku bibazo by’ingutu bikomereye abanyarwanda muri iki gihe, Abagize ubuyobozi basanze ari ngombwa gukomeza umurego mu rugamba twiyemeje kugira ngo mu Rwanda hashyirweho ubutegetsi bushyize imbere inyungu rusange kandi bushingiye ku mahame ya demokarasi binyujijwe mu ndangagaciro z’ukuri, ubutwari n’ugusaranganya ibyiza by’igihugu.
Hatowe kandi Komite nshya y’ubuyobozi bukuru bw’ishyaka Ishema ry’u Rwanda ku buryo bukurikira :

Perezidante : Madamu Nadine Claire KASINGE

Visi Perezida : Bwana Chaste GAHUNDE

Umunyamabanga nshingwabikorwa : Bwana Vénant NKURUNZIZA

Umubitsi : Madamu Virginie NAKURE

Abagize Komite nshya bamaze kurahira bahise batangira imirimo batorewe, ndetse basabwa gushyiraho Amakomisiyo ya ngombwa mu gihe cya vuba.

Tubifurije imirimo myiza.

Harakabaho Demokarasi mu Rwanda

Harakabaho Repubulika y’u Rwanda

Harakabaho umuco mwiza w’ubutaripfana

Bikorewe i Paris, kuwa 06/05/2018

Bwana Vénant NKURUNZIZA

Umunyamabanga Nshingwabikorwa

Ishyaka ISHEMA ry’u Rwanda rigiye kuvugurura ubuyobozi bukuru.

Leave a reply

Itangazo rigenewe itangazamakuru

ITANGAZO No Ishema 2018/05/001

« Guharanira IMPINDUKA bitangirira mu gikari ».

1.Ishyaka ISHEMA ry’u Rwanda rirakataje mu kwivugurura kugira ngo ryiyongerere ubushobozi bwo kugera ku ntego ryiyemeje yo GUTINYURA Rubandigoka igahagurukira kwigobotora ingoyi y’igitugu cy’Agatsiko k’ABANYAMURENGWEBAGASHIZE barangajwe imbere na Jenerali Paul Kagame.

2.Muri urwo rwego, ndamenyesha ABATARIPFANA bose, abakunzi b’Ishyaka ISHEMA n’Abanyarwanda muri rusange ko kuri iki cyumweru taliki ya 7/5/2018 abayobozi bose b’Ishyaka Ishema ry’u Rwanda bagize Komite Nyobozi Yaguye bazahurira mu mwiherero wo kungurana ibitekerezo, kurebera hamwe ibibazo biremereye bibangamiye rubanda muri iki gihe no gutora Komite Nyobozi nshya.

3.Tubazirikane kandi tubasabire guhora ari intangarugero mu kubahiriza Indangagaciro z’Ukuri, Ubutwari n’Ugusaranganya.

Bikorewe i Paris,

Taliki ya 4/5/2018.

Padiri Thomas NAHIMANA,

Umunyamabanga Mukuru.

28 MUTARAMA : TWANZE UBUHAKE BW’ABANYIGINYA NTABWO TUZEMERA UBUJA BW’ABEGA !

Leave a reply

Ijambo ry’Umuyobozi w’Ishyaka Ishema ry’u Rwanda

28 MUTARAMA : TWANZE UBUHAKE BW’ABANYIGINYA NTABWO TUZEMERA UBUJA BW’ABEGA !

Banyarwandakazi, Banyarwanda,

Bataripfana b’Ishyaka Ishema ry’u Rwanda n’abakunzi bacu

Baturanyi namwe ncuti z’Abanyarwanda,

1.Taliki ya 28 Mutarama 1961, abagabo b’INTWARI zikunda rubanda bitavugwa bahuje umugambi bazindukira i GITARAMA, batitaye ku kaga kashoboraga kubagwira kuko ubutegetsi bwariho icyo gihe butari bwishimiye impinduka nziza bifurizaga igihugu. Bagiye inama bafata ibyemezo bidateze kwibagirana mu mateka y’uRwanda :

*Basezereye Kalinga n’izayo zose, bashinga Repubulika

*Baciye ubuhake bw’Abanyiginya bari bacyishuka ko bo bavukiye gutegeka naho abandi benegihugu bakavukira kubabera abagaragu

* Uwo munsi batangije « Ubutegetsi bwa rubanda, bushyizweho na rubanda kandi bukorera rubanda »

2.Guhera uwo munsi abenegihugu bari baramenyerejwe kwitwa ABAGARAGU bamenye bidasubirwaho ko nabo bafite uburenganzira budakuka mu gihugu cyabo. Bahishuriwe ko ubutegetsi ari ubwabo kandi ko bafite ububasha bwo kuburagiza abayobozi bishakiye binyuze mu matora aciye mu mucyo. Uwo munsi haciwe iteka ko batazongera kwitwa « Abagererwa n’Inkomamashyi » mu gihugu cyabo !

3.Abanyarwanda barishimye bishyira kera, Abanyuramatwi babishyira mu majwi anoze y’indirimbo, bose bakikiriza ko ubuhake bugiye nk’ifuni iheze, ko Umunyarwanda avuye bidasubirwaho ku ngoyi ya Kalinga, ko ibihe bishya kandi byiza bitangiye kuri buri mwenegihugu.

4.Icyakora nyuma y’imyaka 33 benshi baje gutungurwa no gutahura amatwara, imyemerere n’imigenzereze bitakijyanye n’igihe tugezemo by’Umutwe wa FPR INKOTANYI wafashe ubutegetsi ku ruhembe rw’umuheto mu mwaka w’1994 nyuma y’intambara n’imivu y’amaraso yahinduye igihugu cyacu amatongo.

5.Jenerali Paul Kagame wayoboye uwo mutwe w’abicanyi kabuhariwe, yirengagije amateka y’u Rwanda,ntiyatinya kwiyimika no kwigira Umwami w’Umwega, ngo uteganya kuzavanwa ku butegetsi n’urupfu rwonyine. Yabuze ubutwari bwo kuvuga ku mugaragaro ko agaruye ingoma ya cyami, ya yindi y’abasekuru be yari yarasezerewe na rubanda taliki ya 28/1/1961, nuko yemera agononwa kwiyita Perezida ariko mu by’ukuri imikorere n’imyitwarire bye biguma kuba iby’umwami w’umwega unejejwe cyane no gusubiza Abanyarwanda bose mu buja, abatabyemeye akabafunga , abandi akabica, ab’amahirwe bagakizwa no gutorongera bagafata iy’ubuhungiro. Umubare wabo ntuhwema kwiyongeraho ibihumbi byinshi buri mwaka ! Ni ubwambere mu mateka y’u Rwanda, Gahutu, Gatwa na Gatutsi bahuzwa no guhunga ikivunge « ingoma » ibica itarobanuye !

6.Ngiyo impamvu yatumye taliki ya 28 Mutarama 2013 abandi banyarwanda b’ababyiruka bifuza kugera ikirenge mu cy’intwari zo hambere kandi bahujwe n’umugambi wo gusubiza u Rwanda Ishema rukwiye, bahuriye mu mujyi wa Paris ho mu Bufaransa, bashinga Umutwe wa politiki bawita ISHEMA ry’u Rwanda, biha izina ry’ubuhizi ry’ABATARIPFANA, binjira batyo mu ruhando, batangira kurengera inyungu za rubanda. None dore ngiyi imyaka ishize ari itanu.

7.Ku Bataripfana, iki ni igihe gikwiye cyo gusuzuma ibyo bagezeho, ibyabagoye ndetse n’ibyabananiye. Ikigaragara ni uko ikintu cyenda gusa n’ubwami bw’Umwega Paul Kagame kimaze imyaka 24 gica ibintu mu Rwanda, kwitwa Repubulika bikaba ntacyo bigabanya ku rugomo rukabije rugirirwa abenegihugu no ku karengane kadasanzwe ubutegetsi bw’igitugu bukomeje gukorera rubanda rugufi. Abaturage basubijwe mu buja, bose barongeye bahindurwa abagaragu, barakora bakagoka ariko Agatsiko kakaba ariko gatungwa n’ibyo baruhiye : Barahinga ntibasarure, bakubaka inzu bakazisenyerwa hejuru, bacuruza inyatsi FPR ikabatwara byose, dore bigeze n’aho basorera amasambu gakondo nk’aho ari inguzanyo bahawe n’uyu mugabo wigize umwami wabo ku kingufu ! Iruhande rw’umunyagitugu Paul Kagame harasagamba « Agatsiko k’Abanyamurengwe bagashize » biheshereza agaciro mu kurya ibyabo bakagerekaho no gukungahazwa n’ibindi byinshi bambuye Rubandigoka !

8.Nicyo gitumye abashinze Ishyaka ISHEMA ry’u Rwanda, bamaze imyaka itanu bakora iyo bwabaga ngo barenganure rubanda, ubu noneho bihaye gahunda yo gukora URUGENDO rudasanzwe , bityo guhera kuri iyi taliki nziza ya 28 Mutarama 2018, bakaba bafashe igihe cy’amezi atanu yo kuvugurura Ishyaka ryabo (Refondation) , baryinjizemo Abarwanashyaka bashya, barihe inzego nshya, barihe gahunda n’ingamba bishya bizaryongerera ubushobozi bwo gusezerera umunyagitugu Paul kagame n’Agatsiko ke k’Abanyamurengwe bagashize bidatinze, hagamijwe gusubiza Abenegihugu uburenganzira bwabo bwose bambuwe.

9.Kubera izo mpamvu zose, Ikipe Nyobozi y’Ishyaka Ishema yagennye ko :

(1) Kwizihiza Isabukuru y’Imyaka itanu ISHYAKA ISHEMA rimaze rivutse bishyizwe taliki ya 1 Nyakanga 2018. Aho ibyo birori bizabera muzahamenyeshwa bidatinze.

(2) Hatanzwe Ishimo ku Benegihugu bagomba gufatwa nk’icyitegererezo cy’ubutwari n’ubutaripfana. Bene abo bagomba kumenyeshwa abanyarwanda, amateka y’ubuzima bwabo n’ibikorwa byabo byiza bikigishwa urubyiruko.

Banyarwandakazi, Banyarwanda,

Bataripfana b’Ishyaka Ishema ry’u Rwanda n’abakunzi bacu

Baturanyi namwe ncuti z’Abanyarwanda,

10.Abahawe Ishimo ry’INTWARI ZA RUBANDA ni aba bakurikira :

(1)Umwami Mutara III Rudahigwa waciye ubuhake kandi agatura u Rwanda Kristu Umwami.

(2)Perezida Mbonyumutwa Dominiko wabaye Perezida wa mbere wa Repubulika yasezereye ubwami ikavana rubanda mu buja

(3)Perezida Geregori Kayibanda wabaye Perezida wa kabiri akaba n’Impirimbanyi y’ikirenga mu batangije Repubulika na Demokarasi ishingiye kuri rubanda mu Rwanda

(4)Perezida HABYARIMANA Yuvenali wahimbye UMUGANDA watoje abenegihugu kwitabira umurimo no guteza imbere ibikorwa remezo rusange kandi agahihibikanira gushimangira amajyambere nyakuri ya rubanda.

11.Abahawe Ishimo nk’ababaye URUGERO RW’UBUTARIPFANA ni aba bakurikira :

a)Abanyapolitiki

(1) Madame Victoire INGABIRE, umutegarugori wa mbere watinyutse agasiga umuryango we mu mahanga, akajya mu Rwanda guhangara no kubwiza ukuri umunyagitugu Paul Kagame n’Agatsiko ke k’Abanyamurengwe bagashize agamije kurengera rubanda iri mu kaga.

(2) Bwana Deogratias Mushayidi, Umwenegihugu wabaye umuyoboke wa FPR nyamara agatinyuka gutangaza ku mugaragaro, mu mvugo no mu nyandiko, ko niba ubutegetsi bwa FPR buhisemo kwimika akarengane nk’ako ku ngoma ya cyami buzakurwaho na rubanda nk’uko ingoma ya cyami yasezerewe.

(3) Maitre Bernard NTAGANDA nk’umwenegihugu watinyutse guhirimbanira imbere mu gihugu, agatotezwa, agafungwa ariko agakomera ku ntego yo gucungura Rubandigoka.

(4)Umwari Diane SHIMA RWIGARA wanze akarengane kagirirwa umuryango we ndetse na rubanda muri rusange agahitamo gutinyuka, agahaguruka agahangana n’umunyagitugu atitaye ku ngaruka zo gutotezwa no kwamburwa imitungo yose y’umuryango.

b) Abo muri Sosiyete Sivile

(5) Bwana Simeon MUSENGIMANA, watinyutse gushinga Radiyo Ijwi Rya Rubanda, agamije gukangurira Abanyarwanda kuva mu mwobo ,bagacika ku muco mubi wo gukora bufuku, bakajya ahagaragara bakamagana urugomo rw’Inkoramaraso zose, kandi bakihatira guharanira impinduka nziza mu gihugu cyabo.

(6) Bwana MATATA Yozefu kubera ko yatinyutse kwamagana atitangiriye itama akarengane FPR ikorera rubanda, akigisha ko Inzira y’amahoro (Non-Violence) aricyo gisubizo kandi akitangira gutabariza abenegihugu bakomeje kuvutswa uburenganzira bw’ikiremwamuntu.

(7) Bwana KIZITO MIHIGO umuhanzi ukundwa n’abanyarwanda benshi cyane kubera ko yatinyutse guhimba no kuririmba indirimbo zisana imitima akanitangira kwigisha ubwiyunge butanga amahoro nyakuri abinyujije muri Fondation KMP(Kizito Mihigo pour la Paix) .

Muri iyi minsi ikurikira italiki nziza ya 28 Mutarama, buri wese muri izi ntwari tuzamuha umunsi we wo kumuvuga ibigwi no kwereka urubyiruko icyo rukwiye kumwigiraho.

Banyarwandakazi, Banyarwanda,

Bataripfana b’Ishyaka Ishema ry’u Rwanda n’abakunzi bacu

Baturanyi namwe ncuti z’Abanyarwanda,

12.Sinasoza iri jambo ntongeye gushima mbikuye ku mutima, abenegihugu bose bakiriye neza ukuza kw’Ishyaka Ishema, bakatugirira icyizere bakatugira inama nziza.

13.By’umwihariko ndashimira abagabo n’abagore, cyane cyane abaciye bugufi, bikokoye bakadutera inkunga yose bashoboye kugira ngo ibikorwa byari biteganyijwe bigerweho. Abaturihiye ingendo, abatwakiriye mu ngo zabo, bakadufungurira, bakatumesera, bakatugurira inkweto n’udukanzu tw’urugendo, abo bose ndabashimira kandi mbizeza ko tutazabatenguha. Urugendo ruracyari rurerure ariko twiteguye kurukomeza.

14.Abataripfana bitanze mu ikubitiro ariko bakaza gucika intege kubera ibigeragezo by’urugendo turabashimira umuganda batanze kandi turabasezezeranya ko Ishyaka Ishema ridateze kubibagirwa.

15.By’Umwihariko turazirikana Dogiteri Joseph NKUSI, twafatanyije cyane mu ntangiriro z’Ishyaka Ishema. Muri iki gihe ari mu kigeragezo gikomeye cyo kuba yarashimuswe aho yari yarahungiye mu gihugu cya Norvege akajyanwa gufungirwa i Kigali kandi atari umunyacyaha no kuba afite abana bato badafite kirengera. Turasaba Paul Kagame ko yamurekura agasubirana ubwigenge bwe nta yandi mananiza.

16.Rubanda yanze ubuhake bw’Abanyiginya, ntabwo iteze kwemera ubuja bw’Abega. U Rwanda ni Repubulika, ntituzahwema guharanira ko igendera ku mahame ya Demokarasi isesuye.

17.Niyo mpamvu inteye kwatura,kuri iyi taliki nziza ya 28 Mutarama, nk’Umuyobozi w’Ishyaka riharanira ISHEMA rya rubanda , nkagusaba wowe Bwana Paul Kagame kugabanya ubugwari bugutera guhora usonzeye gufatwa nk’Ikigirwamana; ukingure amarembo dutahe mu gihugu cyacu; ishakemo ubutwari bwo gufungura urubuga rwa politiki, urekure abo wagize imbohe bose ubarenganya. Uzitwa intwari nutera intambwe yo kurekura ubutegetsi wihaye ku ngufu no mu buriganya bugayitse, ugasubiza rubanda amahirwe yo kwikihitiramo abategetsi bayinogeye binyuze mu matora akozwe mu mucyo. Nukomeza kunangira umutima no kungikanya urugomo ukorera abaturage, tuzakora ibishoboka byose kugira ngo RUBANDA iguhagurukane igukosore, icyo gihe nta we uzakurengera kuko n’abakurwanyeho kuva mu ntangiriro umaze kubajogorora. Kandi na we urabizi neza ko nutisubiraho bwangu umunsi umwe uzaryozwa ibibi BYOSE wakoreye RUBANDA.

Harakabaho Repubulika ishingiye ku mahame ya Demokarasi

Harakabaho Ishyaka ISHEMA ry’u Rwanda,

Harakabaho umuco mwiza w’UBUTARIPFANA mu Banyarwanda

Bikorewe i Paris, taliki ya 28 Mutarama2018

Padiri Thomas Nahimana,

Umunyamabanga mukuru w’Ishyaka ISHEMA

IMINSI 2 GUSA NIYO ISIGAYE NGO ISHYAKA ISHEMA RY’U RWANDA RYIZIHIZE ISABUKURU Y’IMYAKA 5 RIVUTSE!

Leave a reply

ISHEMA RY’U RWANDA 2013-2018: HABAYE AH’ABAGABO. …

Gukora umurimo wa politiki ku ruhande rutavuga rumwe n’ubutegetsi bw’igitugu nk’ubwimitswe na FPR Inkotanyi ni ikintu kitoroshye ndetse n’ubu kigifatwa n’abatari bake nk’ubwiyahuzi. Iyi myemerere ya benshi mu Banyarwanda ifite inkomoko : Agatsiko-Sajya kimitse iterabwoba mu Banyarwanda, kabapfuka umunwa, kababuza kuvuga icyo batekereza n’ubigerageje agacibwa umutwe aka Rwisereka, cyangwa agafungwa aka Ingabire Victoire, Déo Mushayidi, Theoneste Niyitegeka n’abandi. Ku babashije gufata iy’ubuhungiro bo, FPR ibinyujije mu biro by’umushinjacyaha mukuru yakoze urutonde rw’abo ishinja ibyaha (ababikoze koko kimwe n’abo ibigerekaho batarabikoze) , ibashumuriza inkiko mpuzamahanga ngo zibahigishe uruhindu, bamburwa batyo uburenganzira bwabo bwo gukora politiki. Ng’uko uko ikibuga cya politiki nyarwanda cyabaye ubutayu, ugerageje kuvugira rubanda akabanza agahenengera mu mwobo, akiyita amazina atabaho ndetse akaba atakwerekana isura ye. Icyari gikenewe ni uguhindura iyi myumvire tugahangara Agatsiko-sajya izuba riva ,tukakabwiza ukuri ko tudatinya gupfa kuko no hakurya y’imva hari ubugingo.

Twari tuzi neza ko igikorwa dutangiye cyasabaga ubwitange, gushirika ubwoba no gusobanura tudategwa umurongo duhisemo gufata w’ubutaripfana. Hari hakenewe guhangana n’imyemerere y’ubwoba yokamye benshi, ndetse rimwe na rimwe twanyuzagamo hakazamo no gucyocyorana n’abadushotoraga. Nanone byari ngombwa kwishakamo ubutwari bwo kwitandukanya n’ibidusubiza inyuma harimo utunyungu tw’umuntu ku giti cye, impungenge z’abo duhuje imiryango, gukorera kuri « baranyica », n’isoni zo kubwiza ukuri abaturuta!

Mu masaha 72 yakurikiye ishingwa ry’ishyaka ISHEMA twakiriye ubutumwa bw’abantu 467 badusezeraho ngo aheza ni mu ijuru tuzahurirayo ! Batwemezaga ko tu ta mara ebyumweru bibiri Kagame ataduciye imitwe twese!

Ese Ishyaka Ishema ry’u Rwanda hari igishya ryazanye mu rubuga rwa Opozisiyo nyarwanda ?

Twazanye umuco wo kujya impaka zubaka (DÉBAT constructif) haba mu nyandiko cyangwa ku ma radiyo. Uwadutumiye ngo tuganire wese twaramwitabye cyakora hari benshi bakomeje kudutinya ndetse bakatwita abirasi n’abishongozi. Hari n’abo twasabye guhura tukaganira ariko baranangira.
Twahaye agaciro gakomeye ihame ry’uko politiki nziza igomba gukorerwa mu Rwanda kandi ko abanyapolitiki bakorera mu buhungiro bakwiye gukora ibishoboka byose bagataha mu Rwanda gufatanya urugendo rw’impinduka na Rubanda.
Twatsindagiye ko inzira y’amahoro ikwiye kwitabazwa mu gukemura ibibazo by’u Rwanda cyane cyane ko twabonye ingaruka mbi cyane intambara ya FPR Inkotanyi yatangiye taliki ya 1/10/1990 yakururiye u Rwanda.
Twahamagariye ‘Nouvelle génération’ kwitabira ibikorwa bya politiki no kwirinda ko urubuga rukomeza kwiharirwa n’abafite ibiganza bijejeta amaraso y’Abanyarwanda.
Twakanguriye Abanyarwanda kwemera no kugira iryabo ihame ry’uko nta wundi ubibabereyemo kandi ko ak’imuhana kaza imvura ihise bityo bakitegura guhagurukira mu majyaruguru , amajyepfo, uburengerazuba n’uburasirazuba bagasimbukana agatsiko-sajya kabahinduye Abagereerwa n’Inkomamashyi mu gihugu cyabo.

Ese hari umuganda wihariye Ishyaka ISHEMA ryatanze ?

Ngo nyiramaso yerekwa bike,ibindi akibonera.

Habonetse abasore n’inkumi batinyuka bakajya ku mugaragaro bakamagana badatinya ubutegetsi bw’agatsiko, ikintu cyari imbonekarimwe mbere.
Ibi byatumye nà bake cyane bari barabitangiye mbere bagira imbaraga ntibacika intege ntibacogozwa n’ibizazane bahuraga nabyo
Bityo rero, ubu nta wavuga ko ari umunyapolitiki nibura adatinyuka kwerekana ifoto ye ngo avuge ibyo yemera ahagaze ku maguru yombi.

Ubutaha tuzakomeza turebera hamwe aho Ishyaka ISHEMA rigeze rishyira mu bikorwa gahunda ryiyemeje.

Biracyaza…

Chaste GAHUNDE,

Umunyabanga Nshingwabikorwa,

Tel: 00 33 6 43 60 13 11

HASIGAYE IMINSI 3 GUSA ISHYAKA ISHEMA RY’U RWANDA RIKIZIHIZA ISABUKURU Y’IMYAKA 5 RIVUTSE

Leave a reply

ISHEMA ry’u Rwanda 2013-2018 : Utazi iyo ava, ntamenya aho yerekera .

Turabyibuka neza Ishyaka ISHEMA ry’u Rwanda ryatangijwe taliki ya 28 Mutarama 2013. Ryaje rizanye amatwara atari amenyerewe muri Opozisiyo nyarwanda.

(1)Ryabimburiwe n’ibitekerezo byatangazwaga mu kinyamakuru UMUHANUZI, http://www.leprophete.fr guhera mu ntangiriro y’umwaka wa 2011.

(2)Ryamenyekanye kurushaho kubera ibiganiro-mpaka n’ubuhamya abayobozi baryo batangaga kuri Radiyo Ijwi rya Rubanda .

(3) Ryatangijwe n’abasore n’inkumi bakibyiruka batari basanzwe bazwi mu rubuga rwa politiki nyarwanda. Twanyurwaga no kwiyita Abanyapolitiki ba « Nouvelle Generation ».

(4) Twihaye izina ry’ubuhizi ry’ « ABATARIPFANA » (Ijambo) kandi koko nyuma gato biza kugaragariraga ko « GUTINYUKA », kuva mu mwobo no gukorera ku mugaragaro twari tubifite nk’intego.

(5) Gahunda yacu yari iyobowe n’intego-ndangarumuri twashyize hanze rugikubita : UKURI-UBUTWARI-UGUSARANGANYA.

(6) Twavugaga mu magambo yacu ko ikibazo u Rwanda rufite ari « Ubutegetsi bw’Agatsiko k’Indobanure z’Abasilikari b’Abatutsi baturutse Uganda(Agatsiko-Sajya), bwubakiye ku Kinyoma, Iterabwoba n’Ukwikubira ibyiza byose by’igihugu ».

(7) Twahamagariraga rubanda kwisuganya hagamijwe kuvudukana ubutegetsi bw’Agatsiko binyuze muri REVOLISIYO ya rubanda idasesa amaraso, hagashyirwaho Leta ihangayikishijwe by’ukuri no guteza imbere inyungu z’umuturage.

(8) Twemezaga ko politiki yagira icyo ihindura ku mibereho y’ubuja abanyarwanda babayemo ari iyakorerwa mu Rwanda . Twabonaga ko igihe cy’amatora ari amahirwe abaturage baba bahawe nk’akadirishya banyuramo bagahindura ubutegetsi.

(9)Twateganyaga ko Ishyaka Ishema rigiye kwiyubaka rishingiye ku matsinda mato-mato (structure-clé ) yitwa « Ikipe Ishema ». Buri Kipe Ishema ikaba yaragombaga kugirwa n’abarwanashyaka nibura batandatu.

(10) Amakipe Ishema yari agiye gutangizwa imbere mu gihugu yagombaga gukorera mu ibanga kugeza igihe Abalideri b’Ishyaka Ishema bazinjirira mu gihugu , bakandikisha Ishyaka kugira ngo ritangire gukorera ku mugarago.

(11) Twateganyaga kuzajya mu matora y’umukuru w’igihugu yo mu 2017.

None dore imyaka 5 irashize ! Ni igihe cyo gusubiza amaso inyuma, kwibaza no kwisubiza. Ngo utazi iyo ava ntamenya n’aho yerekera.

Ese Ishyaka Ishema ry’u Rwanda hari igishya ryazanye mu rubuga rwa Opozisiyo nyarwanda ?
Ese hari umuganda wihariye ryatanze ?
Ibyo ryasezeranyije abaturage rigitangira ryaba rigeze he ribishyira mu bikorwa?
Ese intego ryihaye yo guhirika ubutegetsi bw’Agatsiko-Sajya rizashobora gufasha Abanyarwanda kuyigeraho ?
Ese Abanyarwanda bakiriye bate Ishyaka Ishema ?
Ishyaka Ishema rizahimbaza rite iyi Sabukuru y’imyaka itanu?
Ni iyihe ntambwe ikurikiraho Ishyaka Ishema ryiteguye gutera ?

Ibi bibazo hamwe n’ibindi buri wese yakwibaza bizahabwa ibisubizo mu nyandiko zacu zitaha.

BIRACYAZA…..

Nadine Claire KASINGE,

Umunyamabanga mukuru wungirije

w’Ishyaka Ishema ry’u Rwanda.

AMATORA 2017: GUVERINOMA Y’U RWANDA IKORERA MU BUHUNGIRO IRAHUMURIZA RUBANDA

1 Reply

Itangazo rigenewe Itangazamakuru

MU GIHE KITARENZE AMEZI 6 GUVERINOMA YA RUBANDA IKORERA MU BUHUNGIRO IZABA IMAZE GUHANGA INZIRA YO GUSEZERERA « Ikigirwamana »CYIYICAJE KU NGOMA.

Nyuma yo kwitegereza neza no gusesengura bihagije uko u Rwanda rwayobowe guhera taliki ya 1/10/1990 kugeza uyu munsi n’ibyago bikomeye byarugwiririye biturutse ku byemezo n’ibikorwa by’abategetsi babi , by’umwihariko Paul Kagame udaterwa isoni no kugenda arushaho kwerekana koko ko ari « Umunyagitugu w’umwicanyi utaranganwa impuhwe,Umusazi utagifite igaruriro, Umunyamurengwe usonzeye gusengwa nk’ Ikigirwamana » ;

I. Reka tubanze twibutse urugendo twakoze kugeza ubu :

1. Taliki ya 28/1/2013, Abataripfana b’ikubitiro bateraniye i Paris bashinga Ishyaka ISHEMA ry’URWANDA ryihaye intego yo gufasha abanyarwanda kwisubiza « ishema » ry’abenegihugu, bakanga kugirwa inkomamashyi n’abagereerwa mu Rwatubyaye ;

2. Ntibyatinze andi mashyaka ya « Nouvelle Génération » afata icyemezo cyo gushyigikira umushinga w’ishyaka Ishema wo kujya gukorera politiki mu Rwanda hashyizwe imbere « Kunga Abenegihugu kugira ngo bafatanye kwiyubakira u Rwanda rujya mbere »;

3. Twafashe igihe gihagije cyo kuganira , kujya impaka no kungurana ibitekerezo n’Abanyarwanda b’ingeri zose ndetse dukora ingendo zo gusanga impunzi mu bihugu binyuranye;

4. Twagendereye abayoboyi b’ibihugu by incuti tubasobanurira umushinga dufite, barawushima kandi batwizeza kuzawutera inkunga tugeze mu Rwanda ;

5. Hagenwe Ikipe igomba kuva mu buhungiro ikajya mu Rwanda, ihabwa Padiri Thomas Nahimana nk’umukandida mu matora y’umukuru w’igihugu yagombaga kuba muri Kanama 2017;

6. Nyamara uwo mugambi mwiza kandi w’amahoro wakomwe mu nkokora n’Umunyagitugu Paul Kagame wahisemo gukumira Padiri Thomas Nahimana n’Ikipe ye hifashishwa inzira igayitse yo kubasohora mu ndege zabajyanaga mu Rwanda incuro ebyiri zose, ni ukuvuga taliki ya 23/11/2016 i Nayirobi muri Kenya na taliki ya 23/1/2017 i Buruseli ho mu Bubiligi;

7. Icyo gikorwa cy’urugomo cyo guheza Ishyanga abenegihugu batavuga rumwe n’Inkotanyi cyahaye Bwana Paul Kagame, icyanzu cyo « kwiyimika nk’umwami wa Repubulika y’u Rwanda » binyuze mu ikinamico yiswe amatora yo ku ya3-4/8/2017;

II. Kubera izo mpamvu zose n’izindi nyinshi tutiriwe turondora, turatangariza Abanyarwanda n’umuryango mpuzamahanga ibi bikurikira :

1. Guverinoma y’u Rwanda ikorera mu buhungiro yashyizweho taliki ya 20 /2/2017,ikaba ihuriweho n’amashyaka menshi na Sosiyete Sivile, ntiyemera kandi nta gaciro na busa iha « ingirwamatora y’umukuru w’igihugu » yo ku itariki 3-4/8/2017 yahejwemo mu buryo buteye isoni abandi benegihugu bifuzaga kuba abakandida aribo Diane Shima Rwigara na Mwenedata Gilbert;

2.Turamenyesha rubanda ko Paul Kagame atakiri Perezida w’u Rwanda kuko manda ye ya nyuma yemererwaga n’Itegekonshinga yarangiye taliki ya 3/8/2017 bityo akaba atagomba kumvirwa no kuyobokwa nk’umukuru w’igihugu cyacu;

3.Dutangaje ko « Igisanaguverinoma » Paul Kagame yitegura gushyiraho ntaho kizaba gitaniye n’ « Agatsiko k’Abagizibanabi bitwaje imbunda » kagambiriye guheza Abanyarwanda mu iterabwoba no mu bucakara hagamijwe gusa gukomeza kubarya imitsi;

4 . Kuko twakomeje gusaba Paul Kagame ko yafungura imfungwa za politiki zirimo Victoire Ingabire Umuhoza, Deogratias Mushayidi, Theoneste Niyitegega, Padiri Eduwari Ntuliye, Padiri Mategeko Amatus n’abandi….ariko akica amatwi, dutangaje ko tutagikeneye kugirana ibiganiro na we;

5.Guverinoma y’u Rwanda ikorera mu buhungiro irahumuriza abenegihugu bose kandi irabizeza ko igiye gukorera ibishoboka byose kugira ngo mu gihe kitarenze amezi atandatu (6) hazabe habonetse inzira ikwiye yo kugamburuza « Agatsiko k’Abagizibanabi bitwaje imbunda »kaduhinduye twese nk’ingaruzwamuheto;

6.Turasaba Abenegihugu bose muri rusange na buriwese ku giti cye kwihutira gushyigikira mu nzira zose mushoboye Guverinoma yanyu ikorera mu buhungiro kugira umugambi mwiza wo kwibohoza ingoyi y’iterabwoba ry’Agatsiko ugerweho mu buryo bwihuse;

7.Turashimira abategetsi b’ibihugu by’incuti batugaragarije ko bahangayikishijwe n’uburiganya bwa Paul Kagame, bakaba batakimubonamo umukuru w’igihugu ukwiye kwemerwa no kwizerwa, ndetse bakaba biteguye gutera rubanda inkunga mu rugamba rwo kwishyiriraho ubutegetsi bushingiye kuri demukarasi nyakuri;

8.Turasaba umuryango mpuzamahanga gutera intambwe yo guha akato aka « Gatsiko k’Abagizibanabi bitwaje imbunda » no kugafatira ibihano bikakaye byo mu rwego rw ‘ubukungu, urwa politiki ,urwagisilikari n’urw’ubutabera mpuzamahanga kugira ngo karekure ubutegetsi kibye rubanda, bityo hategurwe amatora y’umukuru w’igihugu adafifitse .

Bikorewe i Paris, taliki ya 10 /8/2017
Padiri Thomas Nahimana,
Perezida wa Guverinoma y’u Rwanda ikorera mu buhungiro