Category Archives: Revolisiyo

REVOLISIYO YISWE “IKARAMU” INZIRA YO GUHAMBIRIZA KAGAME N’AGATSIKO KE

Hari abantu bamaze iminsi bandika ku mbuga zitandukanye ko opozisiyo igomba gukora igisirikare cyo gukuraho Kagame. Njye siko mbibona kuko gukora ikirebeli ubu ni ugutuma Kagame agarura ubuyanja kandi nta munyarwanda ubyifuza, kandi abifuza intambara wenda baba basa na ba bandi nita ba Kozivuze Rutemayeze,  Kagame ajya imbere akivovota, akivuga imyato atagira, akababwira ukuntu agiye kwica abanyekongo bagakoma amashyi, bati ubwo abatutsi bazakugwa inyuma twe tuzakugwa imbere; bariya ntawe uzi ko isasu ryica kuko batagiye ku rugamba, kuribo Kagame yishe ntacyo bivuze icya ngombwa ni umutekano wa miliyoni zabo bafata buri kwezi.

Kagame ariho arasamba rwose igisigaye ni ukumuhirika wa mugani wa Padri Nahimana Tomasi. Ikindi nkuko mwabibonye muri iriya mbonerahamwe iri hejuru, Opozisiyo ntishobora gukora icyo kirebeli mu gihe amashyaka ayigize afite ibyerekezo binyuranye; urugero mwarwiboneye, bamwe ntibemera ko revolisiyo yo muri 1959 yari Revolisiyo, ngo ishyaka rishaka gukorana nabo rigomba kubanza kuyihakana, njye rero mbona gutaburura  abayoboye iriya revolisiyo nka Mbonyumutwa Dominiko cyangwa se ukandangaza abandi nka Kayibanda Gregoire, Gitera Habyarimana Joseph, Bicamumpaka B., Habyarimana, Juvenal, Makuza Anastase, Habamenshi Callixte ngo bari ibiyobyabwenge, bitabuza revolisiyo yo  muri 1959 kuba yo; abaturage bayikoreye nibo bonyine  bagomba kubazwa niba bayihakana si  amashyaka.  Aba kandi bakongeraho ko abahutu bose n‘abataravuka n’abazavuka, bafite icyaha rusange cy’ubujenosideri, ese amashyaka y’abahutu azemera iyi ngengabitekerezo ni angahe? Iki wenda nacyo bashobora guca ku nshuti zabo kikemezwa na Loni!

Revolisiyo “IKARAMU” rero niyo yonyine ishobora kwirukana Kagame na FPR ye, nta maraso yongeye kumeneka mu Rwanda kandi abenshi ndumva aribyo twifuza, ikanazanira umunezero buri munyarwanda. Rwose impamvu zatumye ba Hosni Mubarak wari Prezida wa Misri, Mouamar EL Kadafi wari Prezida wa Libya, na Zen El Abdin Ben Ali wari Prezida wa Tuniziya bahirikwa ku butegetsi na Revolisiyo z’abaturage, zirahari mu Rwanda kandi ziraruta izari muri biriya bihugu kiriya gihe nkuko twiboneye zimwe murizo mu gice cya kabiri cy’iyi nyandiko. Tugarutse kuri biriya bihugu navuze hejuru, urubyiruko rw’abashomeri rwari rwararangije amashuri rukabura imirimo nirwo rwagiye  kuri Internet, face book, twitter maze rugenda ruganira ku bibazo byarwo. Icyakurikiyeho ni ukumvisha ababyeyi babo ko mu gihugu hari ibibazo kandi kugirango birangire hagomba kuba impinduramatwara mu gihugu. Icya gatatu n’uko urubyiruko rwashyize uwo mwuka mushya no mu bandi bashomeri batize. Icya kane n’uko abahembwaga imishahara idafashije nabo bahumutse. Abari hanze y’igihugu nabo bagiye bashyiraho akabo bakoresheje ziriya mbuga basobanurira abaturage uko bagomba kwifata kugirango bahirike izo ngoma. Urebye iriya muhuha yakoresheje ikoranabuhanga kugirango igere ku mugambi wayo. Dore  rero uko byakorwa no mu Rwanda:

INTAMBWE YA MBERE: ( GUHUMURA)

  1. Abafite imbuga bose ni ugusobanurira abaturage ibibazo biri mu Rwanda, icyabiteye n’uko byakemuka.( Ibi byaratangiye, ntawabura gushima intambwe imbuga zimaze gutera  muri iyi gahunda)
  2. Gukangurira abanyarwanda gusoma ibyo imbuga zanditse, bagashirika ubwoba bakumva ko Kagame n’abicanyi be batazashobora gusoma no kwica abazasoma ibyo banditse, kandi abaturage bagasobanurirwa n’ ukuntu umuntu akoresha amwirondoro muhimbano.
  3. Za kaminuza ( abarimu n’abanyeshuri) nibo bagomba gusobanurira bagenzi babo bari mu mashuri yisumbuye icyo revolisiyo yabo “IKARAMU” igamije: kwigobotora ingoma y’injiji hakajyaho ubutegetsi bubereye bose, budasahura, budatonesha, butica, butaroga, butari ubwa ba gasurantambara, kandi budateranya abanyarwanda.
  4. Abanyeshuri barangije ayisumbuye bari muri TIG n’abo mu mashuri yisumbuye nabo bagomba gukwiza ibi bitekerezo mu mashuri mato no mu baturage.
  5. Abaturage bamaze gusobanukirwa, nabo bagomba guhita bumvishwa ikigomba gukorwa.

INTAMBWE YA KABIRI: (KWINYAGAMBURA)

1. Abaturage bose, abanyeshuri bo mu mashuri yose n’abakozi b’ingeri zose bagomba guteranira ku KAGARI kabo buri wa mbere kuva saa mbiri kugeza saa sita basaba ko bakurirwaho imisoro baka idafututse: agaciro, uw’ingabo, amashuri, sacco n’iyindi; bagasaba n’ibindi bagiye babuzwa na Leta y’agahotoro ukurikije akagari barimo.

2. Gusaba ko abana babo batangiye amafranga atabarika mu mashuri barangije bakaba ari abashomeri bahabwa akazi.

3. Abana barangije amashuri yisumbuye bariho bakora TIG ya Kagame na Rucagu nabo bagomba kugira icyo babona buri kwezi, byibura amafranga yo kugura isabune yo kumesa imyenda bajyana muri iyo TIG.

4. Kubuza lokodefensi, inkeragutabara, polisi n’igisoda gukomeza kudurumbanya umutekano wabo.

5. Kubaza leta impamvu imfashanyo z’amahanga zihagarara.

6. Kubuza leta gukomeza gushora intambara mu bihugu by’abaturanyi, zitikiriramo abana babo aba Kagame n’agatsiko bariho basamara mu misoro yabo muri Amerika.

INTAMBWE YA GATATU: ( GUSHYIGURA)

  1. Mu gihe kimwe muri biriya bivuzwe hejuru kitabonewe igisubizo, abaturage bagomba bose kujya guhurira ku mirenge yabo buri wa Kabiri, baka ko Leta y’Agatsiko ivaho hakabaho amatora.
  2. Hagize ushaka gukoresha imbaraga ngo ibi bihagarare, abaturage bose mu gihugu bahita bikuramo ugomba gufata ubutegetsi muri buri murenge kugeza igihe ayoboreye amatora.
  3. Gufata Kagame n’abafatanyije nawe bose kugeza mu Murenge, bakabarindira umutekano kugeza igihe hagiriyeho inkiko zo kubaburanisha(reba ingingo ya 12)
  4. Gufatanya n’amahanga n’ibihugu duhana imbibe bakabuza abasoda cyangwa abahoze ari abategetsi gutoroka igihugu.
  5. Gusaba ko ingabo za East African Community zaza gufasha abaturage kurinda ubusugire bw’igihugu n’umutekano igihe cy’umwaka, no gufasha mu gushyiraho igipolisi cyo kurinda umutekano mu gihugu.
  6. Gusaba abasoda, abapolisi, inkeragutabara gusubira mu bigo byabo.
  7. Uyoboye umurenge ni nawe ugomba gushaka uko umutekano wa buri muturage wubahirizwa( Abaturage nibo bagomba kwishyiriraho inzego z’umutekano wabo).
  8. Bamwe mu basirikare bakuru na polisi bataranzweho kwica cyane kuko bose ubundi ari abicanyi ukurikije ibyabereye mu Rwanda na Congo, bashobora guhura na komite igizwe n’abantu 3 bavuye muri buri murenge, abantu  babiri bavuye muri buri shyaka ryo hanze y’igihugu, 2 bavuye muri buri shyaka ry’imbere bakumvikana uko bashyiraho inzego zihamye z’umutekano zafatanya na kiriya gisoda cya EAC.
  9. Aba bo hejuru bahita banareba uko amatora yo gushyiraho inzego z’ubuyobozi bw’ibanze mu gihugu yakorwa.
  10. Gushyiraho Leta y’agateganyo imara amezi 6 gusa. Iyi niyo yafatanya n’inzego za Loni, n’Afrika Yiyunze ( African Union) na East African community kureba uko hashyirwaho itegeko nshinga rirengera buri munyarwanda; n’amatora y’abadepite(Ay’abasenateri ntiyaba yihutirwa).
  11. Gushyiraho Guverinema nyuma y’amezi 6 y’inzibacyuho.
  12. Gushyiraho INKIKO GACACA II zicira imanza abiyitaga abayobozi ku ngoma y’Abasahuzi.
  13. Gushyikiriza inkiko mpuzamahanga abicanyi bose bashakishwaga n’izo nkiko.
  14. Gusaba Loni gukora anketi muri ibi  bikurikira: a) Uko Jenoside yo muri 1994 yateguwe no guhana abayigizemo uruhare bose. b) Guhana abantu bose bo mu gisoda bagize uruhare mu kwica impunzi i Kibeho, mu Ruhengeri, Gisenyi, na Byumba na RDC. c)Gushyiraho urukiko rwemeza cyangwa rugahakana ko ubwicanyi bwakorewe abahutu muri Republika iharanira rubanda ya Congo ari Jenoside; maze hakabaho Arusha II yo gucira imanza abahamwa n’icyaha.
  15. Gushyiraho ingabo z’igihugu zihuriwemo n’amoko yose kuva hasi kugeza hejuru, no gusezerera ingabo za East African Community.

UMWANZURO

FPR  igiye idusigiye akaga katazibagirana mu mateka y’u Rwanda n’isi yose: miliyoni z’abacu twabuze, imfubyi zitagira kirera, abapfakazi, n’ibirema , urwango ibindi bihugu byanga abanyarwanda kubera ubwicanyi n’ubusambo bakeka ko twese duhuriyeho n’abategetsi bacu.  FPR  ariko nanone igiye idusigiye isomo ko ntawe ukwiye kwiheba mu buzima, wa mugani ngo ntawiheba agihumeka, ko ushobora kuzunguza ipaki imwe y’isigara n’agapaki k’ubunyobwa ejo ukagura indege, ukubaka imiturirwa, amabanki n’ibindi ariko byose ukazabibamo nabi ukanabisiga nabi nta wawe ubiriyeho kubera kubigeraho uri inkirabuheri, ibona buri wese ko ari injiji, icyontazi, amabyi n’ibigarasha! Aha rero ba bandi bavuga ko ikilo cy’amahirwe kiruta ibilo jana by’ubwenge niho babonye ko bibeshyaga.

Ikindi ihirima rya FPR risigiye abanyarwanda, ni uko nta muntu uzongera kubeshya abanyarwanda ngo ateye aje kurenganura ubwoko ubu n’ubu. Ubutaha ushaka  kwiyibira azajye aza ninjoro asahure agwe ku gahinga atabeshya ko aje kuvuganira ubwoko bwe, ba Musa b’ibisambo n’abicanyi turabarambiwe. Uku kuvumbura izi nyangabirama gushobora kuzatuma habaho ubumwe n’ubwiyunge nyakuri igihe hazaba habayeho ubutabera: abicanyi bose bashyikirijwe ubutabera. Umuntu nanone ntiyarangiza atagiriye inama bariya barwaye indwara yo kumva ko bavukiye gutegeka; gushaka ukuntu bakumvikana bo n’imiryango yabo maze iyi ndwara ikavurirwa mu ngo zabo, nk’umugabo akaba umwami cyangwa perezida icyumweru mu rugo rwe, umugore nawe akaba ministri w’intebe, hashira ukwezi bakagurana bityo bityo kugeza batashye kwa Rurema.

Rwose bagenjeje batyo nta maraso yazongera kumeneka mu Rwanda. Utagira umugore nawe ufite iyo ndwara, ashobora kubikora n’umuboyi we cyangwa umuyaya! Abanyarwanda bagomba kubahwa nk’ibiremwamuntu, bizi gutekereza nk’abandi baturage b’isi maze icyo bihitiyemo kikubahirizwa na buri wese. Turambiwe kumva ko u Rwanda kuva rwabaho rwagiwe ruyoborwa n’abantu b’abicanyi cyangwa se abazi ubutiriganya kurusha abandi. Niyo mpamvu rero abaturage bagiye gusezerera abo bose bari bafite ibisigisigi bya gihake bakoresheje revolisiyo IKARAMU itamena amaraso kandi izazana amahoro arambye kuri buri wese, mu Rwanda hose kandi y’igihe cyose.

Narangiza rero mbaza uriya ushaka gusubira mu ndaki, impamvu ashaka kubikora. Ko uvuga ko watowe +90% ibyo bikaba byerekana ko intore zose zigukunda ni ikihe kigarasha, amabyi, ikiyobyabwenge , bihwahwa kiguhungese ukumva  ko ugomba gusubira mu ndaki mutware? Ese ziriya ndege, na ya miturirwa, na ya magorufa, na ya mabanki, na za nganda, na ya mafamu, waraye amajoro udasinziriye ubikorera imipango nabyo urabijyana? Wakwerekanye ko uri intwari, wenda abawe bakazagira icyo baramira muri ibyo mvuze hejuru, ugakora nka Mbarushimana Callixte ukajya kwitanga mu rukiko Mpanabyaha Mpuzamahanga i La Haye, ukiyeza ukaza ukayobora u Rwanda mu mahoro na FPR yawe, n’ejo wenda ukazayobora Isi dore ko ngo wavukiye gutegeka gusa! Mu kinyarwanda babwira usamba amagambo meza yo kumusezeraho bati: “ugende amahoro kandi neza” ibi ni ukugirango umuzimu we atazagaruka kubadurumbanya. Nawe FPR ugende amahoro kandi neza. REVOLISIYO  IKARAMU nitubohore twese twese, maze umwicanyi, isiha rusahuzi FPR igende nk’ifuni iheze!

Nkusi Joseph Shikama ku Kuri na Demukarasi (SKUD)
____________________________________________________

Iyi nyandiko yatangajwe bwa mbere kuri :1.      Urubuga  Umuhanuzi (leprophete) :www.leprophete.fr  mu Kuboza 2012          2.      Radio Ijwi rya Rubanda :       13.1.2013


Dg NKUSI Yozefu

RWANDA : REVOLISIYO YA RUBANDA IRATUTUMBA… (IGICE CYA 1)

I.IBYICIRO BIBIRI by’ABENEGIHUGU BAHANGANYE BYAMENYEKANYE 

1.Uko ndiho mbyerekwa muri iki gihe, Revolisiyo ya rubanda yatangiye mu Rwanda, nta gihe kinini isigaje ngo isandare hanze isi yose ibibone. Amakuru dufite ni uko amatsinda anyuranye y’abaturage b’abasivili, mu gisilikari ndetse no mu gipolisi, akomeje kwijujutira AKARENGANEkagirirwa abaciye bugufi batahwemye gufatwa nk’inkomamashyi n’abagereerwa mu gihugu cyabo. Ayo matsinda kandi arimo kongera cyane ingufu mu kwisuganya, ayobowe n’Abalideri badashaka kwigaragaza kuko bidakenewe. Uko kwisuganya biri gukorwa imbere mu gihugu no hanze yacyo. Mu gihe kitarambiranye Kagame n’agatsiko ke bashobora kuzaryama bajya gukanguka bagasanga barangije gufatwa mpiri batazi n’uko bibagendekeye.

2.Impamvu ingana ururo ?

Akarengane kagiriwe umusore w’umuhanzi witwa Kizito Mihigo, agafungwa atagira icyaha, kababaje abatagira ingano mu bamukundaga, bituma Uwatinyutse kurenganya umusore muzima nk’uriya afatwa nk’igisimba mu bantu.

Deogratias Mushayidi na we yari umunyarwanda ushyira mu gaciro cyane akaba umwe mu bageragezaga guha FPR-Inkotanyi ishusho ya kimuntu: ntiyayinengaga kuko yayangaga, ahubwo yifuzaga ko abategetsi bayo bahindura ingiro bakareka gukomeza kwijandika mu byaha bikomeye byerekeza igihigu mu rundi rwobo. Yasabye Kagame kunamura icumu aho kumwumva aramufunga. Kumucecekesha no kumukatira igifungo cya burundu byahamije FPR muri ya shusho yayo y’Igikoko kitaranganwa umutima w’imbabazi.

Muri iyi minsi, ukugaraguzwa agati mu buryo buteye isoni n’agahinda biri gukorerwa Diane Shima RWIGARA n’umuryango we byahumuye amaso ya benshi mu benegihugu. Kwica umugabo wagufashije urugamba  nka Asinapol Rwigara, ukamwambura ibye, ukagerekaho kwica urubozo, gucunaguza no kwandagaza umupfakazi n’imfubyi asize , byeretse abake bari bagishidikanya ko Kagame n’Agatsiko ke atari abanegihugu nk’abandi, ko ahubwo ari ABACANCURO bigaruriye u Rwanda , bakaba  nta kindi bagamije uretse gusahura igihugu bishyirira mu mifuka yabo, mu by’ukuri ubuzima bwiza bw’umuturage bikaba bitarigeze kuba gahunda ibashishikaje na buke.

Uguhezwa ishyanga n’ugufungwa kw’Abalideri banyuranye ba Opozisiyo, ukwigira indakoreka n’ukwihambira ku butegetsi bya Kagame, ukwikubira ibyiza byose by’igihugu, KUNENA no GUSUZUGURA UMUTURAGE,(=kumunyara hejuru ! ) ni bimwe mu by’ingenzi bishobora gushora u Rwanda mu marira n’amaganya birenze ibyo amateka yatweretse kugeza ubu.

Abicaje amabuno yombi, abadamaraye mwibwiraga ko mwashyikiriye imaragahinda yanyu…muritonde , ibihe bije birasa ukwabyo. Kurwanira guhirika iyi ngoma y’Umunyagitugu utakigira rutangira byo ngibi byaje, ubanza nta kigishoboye kubihagarika. AKARENGANE kari mu Rwanda karenze igipimo.

3.Hari intsinzi yabaho hatabanje kubaho imirwano ?

Uwifuza gusogongera ku byiza by’intsinzi ariko agashaka kugendera kure imirwano, uwo aba ari ikigwari cyangwa umutesi. Gutsinda bibanzirizwa no kwiyemeza kwirwanaho urwaana.

Revolisiyo nayo ni ubwoko bw’intambara igamije impinduka nziza mu miyoborere y’igihugu no mu mibereho y’abenegihugu. Umwihariko wa Revolisiyo ya rubanda ni uko ari intambara y’abakene kuko idakenera intwaro kirimbuzi zikorerwa mu nganda z’abazungu kandi zihenze cyane. Revolisiyo nta batekenisiye baminuje amashuri ikenera. Icyo Revolisiyo ya rubanda isaba gusa ni amaboko, amaguru, umutwe n’UKWIYEMEZA kutajegajega kw’abaturage bahagurukiye kuyikora. Iyo rubanda yahagurutse Umunyagitugu uwo ariwe wese ahinda imishyitsi.

Nk’uko buri wese abizi, imirwano (lutte/combat) yose ihanganisha nibura amatsinda abiri aharanira inyungu zivuguruzanya. Kumenya neza Umwanzi murwana, ukamenya kumutandukanya n’Umwizerwa mufatanyije urugamba, ni intambwe ikomeye yerekeza ku ntsinzi.

4.Ibyiciro by’abenegihugu bihanganye mu Rwanda ni ibihe ?

Muri iki gihe, buri wese yarangije kubona neza ko mu Rwanda hari ibyiciro bibiri by’abenegihugu bihanganye, kabone n’ubwo abafite inyungu mu kurya imitsi ya rubanda bakomeje kubeshya amahanga bavuga ikibazo cy’U Rwanda uko kitari, bakajya bacyita amazina y’utubyiniriro, mbese mu rwego rwo gutoba amateka y’u Rwanda!

Iki ni igihe rero cyo kumenya neza gutandukanya ibyo byiciro nyakuri bihanganye no kwitegura byuzuye intambara ivuza ubuhuha igiye gushyamiranya ibyo byiciro byombi kugeza kimwe muri byo gitsinzwe ruhenu.

Hari uwaba se atabona neza ko hariho icyiciro kigizwe n’«AGATSIKO K’ABANYAMURENGWE BAGASHIZE » hakaba n’icyiciro cya « RUBANDA IGOOKA »!

5.Abagize « AGATSIKO K’ABANYAMURENGWE BAGASHIZE » wababwirwa ni’iki ?

 

Uwo ni Cyomoro cya Kagame udamaraye mu byo se yambuye rubanda mu gihe bene Rwigara bari kugaraguzwa agati!

Ntabwo bigoye na gato gutandukanya abagize iki cyiciro n’abandi benegihugu kuko nta kibahuza na gito .

« Abanyamurengwe bagashize » ni abakoresha umwanya w’ubutegetsi bicayemobakarya utwabo bakagerekaho n’ibyarubanda ».Mu ijambo rimwe ni « ABARYAMITSIYARUBANDA« .

Umuntu wese ufite inzira yo gutungwa n’ibyo yambuye rubanda akoresheje ingufu cyangwa uburiganya, agakira, agakungahara , akanena kandi agasuzugura rubanda….uwo ni Umunyamurengwe wagashize .

Mu yandi magambo,ABANYAMURENGWE BAGASHIZE ni abajura biyita Intore, bakarangwa no kwishongora kandi mu by’ukuri imigenzereze mitindi yabo ibashyira mu mubare w’abakwiye gufatwa nka ba Ruvumwa. Uzababwirwa n’uko biheshereza agaciro mu byakagombye kubatera isoni!  Ni ubuhe bupfura bundi buri mu kwifashisha umwanya waherewe gufasha rubanda noneho ukawukoresha usahura n’ibitakugenewe ?

Dore ingero zigaragara z’Abanyamurengwe bagashize :

(1)Perezida wa Repubulika ubura gutungwa n’umushahara  utubutse ugeretse ku bindi byinshi Leta imugenera ahubwo agakoresha ubutegetsi afite, agasahura n’ibyagenewe gufasha impfubyi, abapfakazi n’ abakene, akigwizaho imitungo, akigurira indege ze bwite,amakonti ye yo muri Banki zo mu mahanga akayuzuzaho amamiliyoni y’amadolari…uwo si umuntu wo kubahwa, ni umujura mu bandi, akwiye gufatwa akabiryozwa.

(2)Minisitiri w’umuherwe : Niba Minisitiri runaka agaragayeho imitungo y’akataraboneka atari yaragaragaje ko afite mbere y’uko yinjizwa muri Guverinoma, uwo ni umubandi, akwiye gufatwa bwangu agasubiza iby’abandi yanyereje.

(3)Undi muyobozi wese uhemberwa kubungabunga inyungu rusange, ubukungu bwose yaronka akananirwa kwerekana inzira zemewe n’amategeko yaburonsemo, ni igisambo kitagomba gukomeza kureebeerwa . Nafatwe asobanure ibye n’ibyarubanda.

(4)Umusilikari cyangwa umupolisi wabaye umuherwe nyuma y’uko yinjiye muri ako kazi, nta handi yaba yarakuye ayo mafaranga uretse kuba yarayibye rubanda. Bene uwo rubanda iramworohera kugira ngo azagire akahe kamaro kandi ?

(5)Uwihayimana (Padiri, Furera, Mameya, Pasitori …) ugaragaweho no kuba umuherwe , nta handi yerekana yaba yarakuye iyo mitungo . Ko Imana akorera idahemba inoti z’amafaranga, ibyamirenge atunze yaba yarabikuye he handi uretse mu kwambura abaturage no kunyereza ibyari bigenewe rubanda rugufi ?

Muri make, « AGATSIKO K’ABANYAMURENGWE BAGASHIZE » kagizwe ahanini n’aba bantu tumaze kwerekana haruguru. Kandi aba bantu bafite IKIBAHUZA gikwiye kumenywa na bose : Baraziranye; bafite uko basangira ibisahurano; buhuzwa nanone no gushyiraho imitwe y’ABACANCURO bahemberwa kubacungira umutekano, kongeera no kurinda imitungo-myibano yabo. Niyo mpamvu barangwa no kwifata nk’ « UMUTWE w’ABAJURA BITWAJE INTWARO ».

Mu by’ukuri nk’uko bishobora kugaragazwa n’ ibaruzamibare, abagize Agatsiko k’ABANYAMURENGWE BAGASHIZE » ntibarenze 1% by’abaturage bose b’u Rwanda. Nyamara nibo bikubira 95% by’umutungo wose w’’igihugu.  Ni ukuvuga ko kuri miliyoni 12 zituye u Rwanda, abafitanye isano n’Agatsiko k’Abanyamurengwe bagashize ntibarenze ibihumbi 120 , ubariyemo abana babo ,abagore babo, n’Imbwa Zabo Ziryana zirinda ibipangu byabo ngo hatagira uwo muri rubanda igooka uhegera.

 

6.RUBANDA IGOOKA igizwe na bande?

RUBANDA IGOOKA ntibisobanura gusa abakeneshejwe kurusha abandi.

RUBANDA IGOOKA igizwe n’abenegihugu bakora bakagooka ariko ibyo baruhiye bikajya gutunga ABANYAMURENGWE BAGASHIZE.

(a)Umuhinzi urima umushike, akabiba, ibyeze bigasarurwa na Koperative z’Abanyamurengwe bagashize kandi abana be bicwa n’inzara.

(b)Umucuruzi ukora ijoro n’amanywa ariko inyungu yose ikaba iy’Agatsiko, (c)Umusilikari cyangwa Umupolisi urara rwantambi arwanira kurengera inyungu z’Abanyaremurengwe bagashize, akiyuha akuya abacungiye umutekano, yagira amahirwe amaraso ye ntamenekere mu kazi agahembwa urusenda ndetse akimwa iminsi y’ikiruhuko yo kujya iwe ngo yite no ku muryango we.

(4) Umwarimu ugoka ngo ararerera igihugu ariko akagororerwa kwimwa ibikoresho n’imfashanyigisho, gusuzugurwa akitwa « Gakweto » no guhembwa inticantikize itamwemerera no kugaburira abo yabyaye.

(5) UMULIDERI wese wiyemeza kwitangira kuvuganira « Rubanda Igooka », kabone n’aho yaba yari asanzwe abarurirwa mu Banyamurengwe bagashize, aba ahinduye urugamba, aba ahindutse umwana wa « rubanda igooka », aba abaye umwe nayo.

Muri make RUBANDA IGOOKA ni bariya baturage banyuyuzwa imitsi. Bamburwa ibyabo, bakirukanwa muri gakondo yabo, bakarandurirwa imyaka, bagasenyerwa amazu hakiyongeraho gucibwa imisoro ihanitse, amahooro y’urucantege n’imisanzu by’urudaca…byose bijya mu mifuka y’Abanyamurengwe bagashize!

Ushyize mu mibare usanga icyiciro cya Rubanda igooka kigizwe n’abenegihugu basaga miliyoni 11 n’ibihumbi 800, ubariyemo n’abana babo. Mu by’ukuri iki cyiciro nicyo gifite ingufu gihabwa n’uko kigizwe n’UMUBARE munini cyane w’abenegihugu.

 

II.NONE SE  KO RUBANDA IGOOKA ARIYO IFITE INGUFU Z’UMABARE MUNINI IRABURA IKI NGO ISUMIRE AGATSIKO K’ABANYAMURENGWE BAGASHIZE BAYIHEJEJE KU NGOYI !?

 

(BIRACYAZA….)

Padiri Thomas Nahimana

mandela-300x148

Nelson Mandela ati :   “Kwibohoza bitangirira mu mutwe”.

Mu kiganiro mpaka radio Itahuka yagiranye na Padiri Thomas Nahimana (taliki ya 28/11/2015), umukandida ku mwanya wa Perezida wa Repubulika mu matora ya 2017, hagarutswe ku ihinduka ry’ubutegetsi muri 1959 nk’icyitegererezo cy’ibishobora kuba mu myaka iri imbere. Hari uwahamagaye ari muri Kanada agira ati “Kayibanda kuba yarageze kuri iriya revolisiyo ni ukuba ababiligi baramurwaniye”. Umutumirwa mukuru we, Padiri Thomas, yagiraga ati umurimo wakozwe na bariya bayobozi, Kayibanda na bagenzi be, ni uwo gushimwa no gufataho icyitegererezo. Nzinduwe no kugira ngo turebere hamwe uko ubutegetsi buhirima, muri rusange, ndetse tunarebe uko ubwa cyami bwahirimye muri 1959, byadufasha kumva ibiri imbere.

1. Urugendo rwa politiki.

Mu gusobanura isano hagati ya politiki n’ubutegetsi, reka nifashije ibyanditswe n’umuhanga Jean Hakorimana, umwarimu mu gihugu cya Espagne, muri Kinyamateka numero 1852 yo muri Nyakanga 2015. Yaragize ati, “mu bumenyi bwa politiki (science politique), politiki ni igikorwa cyose gikorewe mu ruhame, kigamije guha isura imigendekere y’umuryango n’igihugu muri rusange. Ibi bivuze ko ibyo abantu bakora mu mbere bamaze kwegekaho urugi bititwa ibikorwa bya politiki, kabone n’aho byagira ingaruka mu migendekere yayo…Politiki itangira ku myumvire y’umuntu umwe cyangwa bake, bikazabyara impaka, abantu bakagenda biyegeranya bakurikije aho buri wese ahagaze, bikazakura bikabyara amashyirahamwe, amashyaka, amatora n’amategeko. Akenshi ibi by’amashyirahamwe n’amashyaka ni byo abantu bita politiki. Nyamara uru rwego rwa politiki ntirwagerwaho hatabanje ziriya ntambwe zibanza. Dufate urugero mu mateka y’Amerika. Mu myaka ya za 1960, abirabura baho ibihumbi n’agahumbagiza bigabije imihanda bamagana amategeko yabavanguraga. Nyamara imbarutso yatanzwe n’igikorwa cy’umugore umwe witwa Rosa Parks. Umunsi umwe, mu ruhame, yanze kwimukira umuzungu ku ntebe yo muri bisi, nk’uko amategeko y’ivangura yabiteganyaga”.

2. Itandukanyirizo hagati ya politiki n’ubutegetsi.

Mu kugereranya politiki n’ubutegetsi, uyu musesenguzi abigereranya mu buryo bwumvikana neza. “Ugereranyije politiki n’ubutegetsi, wavuga ko urubuga rwa politiki rugarukira ku mpaka mu bitekerezo n’ibyifuzo. Ubutegetsi bwo ni intambwe ituma umwe muri benshi bajyaga impaka yegukana ubushobozi bwo gushyiraho amategeko agenga bose. Kugira ngo bigerweho, ababona ibintu kimwe bishyira hamwe bagafata ubutegetsi mu nzira zinyuranye, yaba amatora cyangwa ingufu. Ubutegetsi ni bwo butuma ibitekerezo bihinduka amategeko, kandi ayo mategeko akagenga bose, ababyibonamo n’ababirwanya. Nyuma y’iyi ntambwe, izo mpande zombi zikomeza kugaragarira mu bari ku butegetsi n’abatavuga rumwe na bo (opozisiyo).

Aho demokarasi itaniye n’igitugu, ni uko demokarasi igena umwanya ibikererezo bitari ku butegetsi bikomeza kwigaragarizamo mu ruhame. Yemera ko ibitekerezo bitari ku butegetsi bikomeza kubyara ibikorwa bya politiki, ku buryo na byo umunsi umwe bishobora kuzagera ku butegetsi. Naho igitugu cyo, gicungira ku muryango ngo ibitekerezo bitari ku butegetsi bitabyara ibikorwa bya politiki (bitajya mu ruhame), ahubwo bigume gusa mu nzu no mu mutima wa buri wese. Nyamara igitugu ntigishobora gusiba burundu ibitekerezo badahuje. Icyo gikora gusa, ni ukubuza ko bijya ku karubanda mu nzira iyo ari yo yose, ngo bitabyara ibikorwa bya politiki. Mu yandi magambo, igitandukanya demokarasi n’igitugu, ni uko muri demokarasi, nyuma yo gutera intambwe yo gufata ubutegetsi (binyuze mu matora), politiki irakomeza. Urubuga rwo kujya impaka z’ibitekerezo ntiruhagarara. Naho mu miyoborere y’igitugu, ugeze ku butegetsi ahita afunga urubuga rwa politiki”.

3. Icya mbere kiranga ubutegetsi ni uko nta wifuza kuburekura. Ikibazo ni Inzira zo kubukomeza.

Muri kamere y’ubutegetsi, nta muntu ubufata agamije kuburekura. Ibi hari uwo byatungura, ariko reka nisobanure. Ubutegetsi bushobora kugirwa n’ishyaka cyangwa umuntu. Ishyaka riba rifite umurongo rigenderaho. Riba ryifuza ko ibyo bitekerezo byaryo byazayobora igihugu ubuziraherezo. N’iyo ubutegetsi bufitwe n’umunyagitugu, aba ashaka kuzaburaga umwana we cyangwa agatsiko ke (nk’igihe bufitwe n’itsinda rya gisirikari). Muri rusange, igitandukanya demokarasi n’igitugu ni inzira zinyurwamo mu kugumana ubutegetsi:

• Muri demokarasi, ufite ubutegetsi aharanira guhora imbere mu kugeza abaturage ku byo bashima kuko ari bo babutanga. Ikindi muri demokarasi, ushaka kuramba ku butegetsi areba inzira amategeko yateganyije. Niba wenda manda zemewe umuntu umwe ari ebyiri, agategura umukandida mushya azamamaza nyuma yazo.

• Mu butegetsi bw’igitugu ho, ubufite aburindisha intwaro kabone n’aho abaturage baba batamushaka. N’iyo hateganyijwe inzira zimuha nyirantarengwa, aca mu kigunda, mu kibunda no mu myobo ngo akunde abugumeho. Mbese nk’ibi byogeye muri Afurika byo guhindura Itegeko Nshinga.

Mu yandi magambo, muri demokarasi, uguma ku butegetsi si umuntu ni ibitekerezo. Ibitekerezo bya politiki biharanira kuguma ku butegetsi ariko abantu babisegasiye bo bakagenda bahinduka. Ikindi kiranga ubutegetsi bwa demokarasi, ni uko ubugumishwaho no kuba ari wowe ukorera abaturage kurusha abandi. Iyo habonetse ugutambutse, aragutsimbura, ugasubira kwisuganya mu myumvire n’imikorere, nyuma ukazagaruka kwiyereka abaturage. Igitugu aho gitandukaniye na demokarasi ni uko aha ho ibitekerezo atari cyo gikuru. Si ibitekerezo biharanira kuguma ku butegetsi, ahubwo ni abantu. Bashobora no kugenda bahindura ibitekerezo, igikuru ni uko bo badahinduka. Icya kabiri ni uko ikigumisha ku butegetsi atari ukurusha abandi gukorera abaturage, ni ingufu z’amoko anyuranye.

4. Icya kabiri kiranga ubutegetsi ni uko nta wishimira abatavuga rumwe na we.

Turetse no ku butegetsi bw’igitugu, no muri demokarasi nta wishimira opozisiyo. Ndetse iyo ayibonye urwaho arayisenya. Urugero rutari kure twarufatira mu Bufaransa. Ubwo Sarkozy n’ishyaka UMP bari ku butegetsi, bakoze ibishoboka byose ngo abo batavuga rumwe b’abasosiyalisti bacike intege. Barabanje ab’inkwakuzi muri bo ariko na none b’inkundarubyino nka Bernard Kushner barabiyegereza babaha imyanya, ariko banaboneraho barabacuyura muri politiki. DSK (Dominique Strauss Khan) byagaragaraga ko ashobora kuzabahagama mu matora bamushukishije kuyobora ikigega cy’imari (FMI) umutego umutsinda yo (ndavuga gupfa mu bya politiki). N’ahandi ni uko abantu batabyitaho, ubonye urwaho abo abatavuga rumwe na we ntabarebera akari urutega. Gusa muri demokarasi bikoranwa ubwenge n’uburere, nta rugomo n’amahane.

Muri make, ufite ubutegetsi burya aba afite ingufu nyinshi ku buryo ubundi abatavuga rumwe na we batahangana na we kabiri batarasenyuka. Impamvu opozisiyo ikomeza kubaho ikwiye kumvikana.

5. Kuki se opozisiyo zibaho mu gihe abafite ubutegetsi baba batazicira akari urutega.

Opozisiyo ibeshwaho n’impamvu imwe: kuko ari AMABURAKINDI. Ni ukuvuga ngo no muri demokarasi iyaba byashobokaga bayizimya burundu. Muri demokarasi, ikiyigira amaburakindi ni amategeko n’imyubakire y’inzego bihamye. Umwanya wayo uba warateganyijwe ku buryo n’uri ku butegetsi akinishije kurengera amategeko yamucura inkumbi. Yakoresha amayeri cyangwa akitwaza ukutareba kure kw’abagize opozisiyo, akaba yababibamo urumamfu, ariko nta na kimwe yakora hanze y’amategeko. Muri make, muri demokarasi opozisiyo ibaho kuko irengerwa n’amategeko, ndetse n’umuco wa politiki muri rusange ukaba waramaze kuyishingira igiti.

Mu butegetsi bw’igitugu ho biragoye. Nta muco wa politiki uhaboneka washingira igiti opozisiyo ngo ikore mu mudendezo. Akenshi nta n’amatageko aba ahari, n’iyo ahari ntiyubahirizwa. Ni yo mpamvu akenshi kuba muri opozisiyo (kutavuga rumwe n’abari ku butegetsi) byitwa amazina nko kugambana, kudakunda igihugu, kubiba amacakubiri n’ibindi.

Igitangaje ariko, ni uko no mu butegetsi bw’igitugu opozisiyo itajya ibura. Wenda bayica intege bakanayitega imitego yose ishoboka, nyamara ntibiyivanaho burundu. Aha rero ni ho hari ibanga rikomeye.

6. Kuki opozisiyo ishoboka mu butegetsi bw’igitugu.

Niba twavuze ko muri demokarasi ubutegetsi bwemera opozisiyo by’amaburakindi kuko amategeko yayishingiye igiti, mu butegetsi bw’igitugu ho ibintu biragoye. Ubutegetsi bw’igitugu bwemera opozisiyo ku mbaraga (ntihagire uwumva iza gisirikari). Imbaraga ziri amoko menshi: imyigaragambyo, kugumura abaturage, guha ubutegetsi akato (non collaboration) n’ibindi. Ku muhero w’uru rutonde, na za mbagara za gisirikari wazishyiraho. Akenshi iyo ubutegetsi bukoresha ingufu za gisirikari, amaherezo biratinda na opozisiyo ikazageraho ikabyiga. Ni bya bindi ngo ukoze hasi yibutsa umusazi ibuye.

Muri make rero, urugero rwo gushyigikirwa n’abaturage, ingufu zo kwishyira hamwe no kubuza ubutegetsi amahwemo, ni cyo cyonyine gishingira igiti opozisiyo. Iyo ibyo bibuze, bayiniga itaranavuka. Imbaraga z’abaturage abenshi ntibazi uburemere bwazo. Zirusha uburemere izindi zose, ndetse n’iza gisirikari. Iyo abaturage bageze aho bavuga bati turanze, ubutegetsi bw’igitugu n’aho bwaba bukomeye gute buba bwamaze guhirima. Byaragaragaye mu minsi ishize. Za Misiri, za Tuniziya n’ahandi si uko abategetsi baho batagiraga intwaro. Ariko umunsi abaturage bagize bati turanze, bararashe nyamara baratsindwa.

7. Umunzani hagati y’imbaraga za opozisiyo n’iz’ubutegetsi ugendera ku mahame ane.

1. Iyo ubutegetsi bufite imbaraga kandi na opozisiyo ikaba ari uko ibibona: opozisiyo icisha make ikayoboka.
2. Iyo ubutegetsi bufite imbaraga nyinshi ariko opozisiyo yo yibwira ko ari nke: opozisiyo iraburwanya byarimba ikanabuhirika.
3. Iyo ubutegetsi bufite intege nke nyamara opozisiyo yo yibwira ko bukomeye: opozisiyo icisha make ikayoboka.
4. Iyo ubutegetsi bufite imbaraga nke kandi na opozisiyo ikaba ibizi: opozisiyo iraburwanya byarimba ikanabuhirika.

Ziriya mpamvu enye uzitegereje urasanga zubakiye ku byo abantu bemera. Hari ibyo abantu bemera bitariho bikabatsikamira, hari n’ibiriho banga gushyiramo ukwemera bakabitsimbura. Ikigenga ibintu si ikbaraga z’ubutegetsi ahubwo mbere na mbere ni uko opozisiyo ibubona. N’iyo bujegajega ariko opozisiyo yo yibwira ko budahangwarwa iratinya igahora yimunyamunya. Ni yo mpamvu ingoyi ya mbere mbi iba mu mutwe, kwibihora kwa mbere na ko kugahera mu bitekerezo. Uwashingira ahangaha byamufasha kumva byinshi byahise, ibiriho n’ibizaza:

-Impamvu FPR ihoza ku munwa ko ngo ari akataraboneka n’indahangarwa kuva ngo isi yaremwa.
-Icyatinyuye ba Kayibanda bagahangara ubutegetsi bw’umwami muri 1959.

Edmond Munyangaju

(Biracyaza).

Bazumva ryari? Ngo kutemera ko Kagame afata manda ya gatatu ni ugusebya u Rwanda!?

Dasso

Ngiryo iterambere Kagame yazaniye rubanda. Arasaba indi manda kugira ngo rikomeze! Ngiyi BILAN ya Kagame.

Ubwo itangazamakuru rikorera agatsiko ryikomye Kaminuza ya Gisenyi na INES Ruhengeri, ubwo ishyari rya FPR ryatangiye kubira nk’ikirunga cyenda kuruka ! Mu kanya gato ayo mashuri makuru yigenga araba afunzwe, abana bayigagamo bajye mu gihirahiro, bahindurwe Mayibobo.  Ariko hagati aho ntihabura  ba Nyirurutwerunini bafatwa bagasiribangwa nk’uko uyu mu DASSO uri ku ifoto ariho agaraguza agati abaturage b’inzirakarengane. Iryo niryo terambere Paul Kagame yatugejejeho muri iyi myaka isaga 20 amaze ku butegetsi, none akaba asaba indi manda ngo akomeze acure rubanda bufuni na buhoro. Ubu koko igihe ntikigeze ngo ibintu bihinduke ? Abanyarwanda twese dukwiye guhaguruka tukamagana twivuye inyuma ingoma y’igitugu y’Agatsiko-Sajya kibwira ko u Rwanda ari akarima kako bwite. Rubyiruko mukwiye gufata iyambere mugashaka inzira zose zishoboka zo gutera hejuru muti U Rwanda si umunani Paul Kagame yasigiwe na se “!

Muri kaminuza za ULK Gisenyi na INES Ruhengeri hatoraguwe inyandiko zamagana manda ya 3 ya Kagame

Mu mugoroba wo kuri uyu wa Gatatu tariki ya 06 Gicurasi 2015, mu ishuri rikuru ry’Ubumenyingiro, INES-Ruhengeri (Institute of Applied Sciences) no muri kaminuza yigenga ya Kigali ULK, hatoraguwe inyandiko zamagana manda ya gatatu ya Perezida Paul Kagame.

Ubuyobozi bwa INES-Ruhengeri bumaze kwemeza amakuru y’inyandiko idasinyeho (Tract) ko yatoraguwe n’abanyeshuri ikaza gufatwa na Bienvenu umunyeshuri uhagarariye abandi, na we akayishyikiriza ubuyobozi bw’ishuri.

Prosper Ziganibuga, umuyobozi wungirije ushinzwe ubutegetsi n’imari muri INES-Ruhengeri yagize ati “Mu kanya saa moya na 45 abanyeshuri batoraguye inyandiko izwi nka tract, ihita ifatwa n’uhagarariye abanyeshuri itaragera mu kigo hose.”

Twamubajije amagambo yari yanditse muri iyo tract atubwira ko atabashije kuyamenya kuko inzego zishinzwe umutekano zahise ziyijyana ariko zikavuga ko iyo nyandiko ngo yanditswe n’abasanzwe basebya u Rwanda.

Si aha gusa hatoraguwe tract, kuko no muri kaminuza yigenga ya Kigali ULK ishami rya Gisenyi hatoraguwe tract mu gihe cya saa kumi z’umugoroba.

Umuyobozi wa ULK ishami rya Gisenyi Dr Cyeye, yahamije ko inyandiko itariho umukono yatoraguwe n’abanyeshuri ariko ngo nta mwanya wo gutanga amakuru afite kuko twamuvugishije arimo kwigisha. Nyuma twagerageje kumuvugisha telefoni ye ntiyacamo.

Umwe mu banyeshuri twaganiriye yavuze ko iyo tract yatoraguwe muri ULK, yarimo ubutumwa bugenewe urubyiruko n’abanyeshuri.

Yagize ati “Iyo nyandiko yatangiraga yerekana ko perezida Kagame yayoboye imyaka 5 RPF-Inkotanyi igifata ubutegetsi, akaza kuyobora imyaka 4 nyuma ya Bizimungu, mu myaka 23 amaze ku butegetsi akaba ntacyo yagejeje ku rubyiruko.”

Undi munyeshuri wavuze ko yisomeye iyo nyandiko yavuze ko ngo abanyamuryango ba RFP-Inkotanyi ko nta mwisanzure bahabwa, ikindi kandi gahunda z’ubudehe n’ingando bikorwa ngo nta mumaro bifitiye abanyarwanda.

Iyo nyandiko kandi ngo yagaragazaga ko ishyaka riri ku butegetsi mu Rwanda ntaho ritandukaniye n’ayandi nka MRND na CDR yayoboraga mbere ya jenoside yakorewe abatutsi nk’uko iyi nkuru dukesha mugenzi wacu ukorera ikinyamakuru Rushyashya ikomeza ivuga.

Umwe mu bayobozi ba kaminuza yigenga ya Kigali ULK, batubwiye ko ngo iyo nyandiko yasabaga amadini n’amashyaka guhagurukira hamwe bakamagana manda ya 3 kuko ngo nta cyiza RPF yakoze kuva yagera ku butegetsi.

Izi nyandiko zishishikariza urubyiruko, abanyeshuri, amadini n’amatorero kwamagana manda ya gatatu ya perezida Kagame, zigaragaye nyuma yaho kuri uyu wa Gatatu tariki ya 6 Gicurasi 2015, perezida w’ Inteko Ishinga Amategeko, Umutwe w’Abadepite, Donatila Mukabalisa yakiriye amabaruwa y’abasaba ivugurwa ry’Itegeko Nshinga mu ngingo yaryo y’101, barenga miliyoni ebyiri.

Emmanuel Nsabimana – imirasire.com

Rwanda: Abaturage bakomeje gutera utwatsi igitekerezo cyo guhindura itegekonshinga hagamijwe ko Kagame yongera kuba perezida.

abaturage-17

Batewe umujinya n’ubutegetsi bubahimbira ngo barashaka Kagame.

Kuva aho bimwe mu bihugu by’ibihangange bigaragarije ko bidashyigikiye aba perezida bashaka guhindura itegekonshinga bagamije kwizirika ku butegetsi, abenshi mu ba perezida barebwa n’ibi baratitiye karahava. Muri bo hari Bwana Pahulo Kagame uyobora u Rwanda kuva mu mwaka wa 2000. Ukurikije itegekonshinga u Rwanda rugenderaho uyu munsi, Pahulo nta bundi bushobozi afite bwo kwiyamamaza kuko manda ebyiri ateganyirizwa zizarangira mu minsi 852 uhereye uyu munsi.

Abandi  nka perezida Kabila wa Congo bagerageje guhindura itegekonshinga abaturage babamerera nabi. I Burundi naho uko byifashe si shyashya nyuma y’aho Nkurunziza ageragereje gushaka kwiyamamaza igihugu cyacuze imiborogo. Hasihaye Pahulo urmo kubikurikiranira hafi ubutaruhuka ari nako afata ingamba kuko azi neza ko inkoni ikubise mukeba bayirenza urugo.

Binyujijwe mu itekinika risanzwe riranga FPR, abaturage bo hirya no hino barasabwa gusinya impapuro zemeza ko basanga itegekonshinga rikwiye guhindurwa Kagame akongera kuba umukandida. Amakuru atugeraho aturutse mu mirenge yemeza ko abaturage benshi bamaganye iki gitekerezo hanyuma abakada ba FPR bahitamo kubinyuza mu dukipe tw’abantu bakeya bafite icyo bahuriyeho. Ng’ayo amashyirahamwe y’ubuhinzi bw’icyayi, abacukuzi ba gasegereti, abiyita aba pasiteri b’amadini y’inzaduka n’abandi.

Kugira ngo itekinika ryihute, inkuru z’urudaca ziracicikana ku mbuga zisanzwe zinyuzwamo ibitekerezo bya FPR. Muri iz nkuru haba havugwamo ko Kagame ariwe muntu wenyine ukwiye kuyobora, ngo ibi bikaba byemezwa n’amabaruwa yasinywe n’abaturage bose. Nyamara birazwi neza ko ari abantu bakeya basinya mu mazina ya rubanda barangiza bagashyiraho nimero y’amarangamuntu ngo kugira ngo ikinyoma gifate.

Abaturage bakomeje guhangayikishwa n’ibyo babona byitirirwa mu izina ryabo, umujinya urushaho kubasya iyo bumvise ko Kagame ashaka kongera gutegeka, kandi  ni mu gihe bafite impamvu ifatika yo kurakara:

  • babonye Kagame n’ingabo ze bamara abantu,
  • bagendana amasasu mu mubiri n’ibikomere by’ingoyi ku maboko,
  • babonye amasambu yabo afatirwa atezwa cyamunara kandi nta cyaha bakoze,
  • babonye bahatirwa kwishyura imitungo itarigeze ibaho cyangwa bakoherezwa mu mirimo y’uburetwa,
  • babonye ababyeyi babo bafungirwa ubusa bahinduka inzererezi bava mu ishuri
  • babonye imirambo y’abana n’ababyeyi babo itabururwa ijya kwanikwa ku gasozi kandi nyama umubyeyi wa Kagame we yarashinguwe mu butaka,
  • bambuwe uburenganzira ku mfashanyo za bourse,
  • n’ibindi byinshi cyane.

Gusa rero iyo Kagame abonye bicecekeye agira ngo ni ibicucu! Niyo mpamvu bakomeje kwitegura kuko uwo ari we wese uzibeshya agakora ku itegekonshinga azaba yisinyiye. Azaba avugije ifirimbi ya revolisiyo izamuhitana, kandi ntakagire ngo ntiyabibwiwe.

Abanyarwanda benshi ntibashyigikiye ko Kagame yizirika ku butegetsi.

kagame-bougie

Kw’itariki  20/3/2015 umunyamakuru wo kuri radio Star Isango yabajije umukuru wa Sénat Makuza ati : “Ko muvuga ngo abaturage barashaka ko itegekonshinga rihinduka ngo Kagame agume k’ubutegetsi, abo baturage muvuga umubare wabo ni nka bangahe kw’ijana (%)”?

Umukuru wa Sénat Makuza ati : “Ntabwo mbizi; Ati ariko aho tujya abaturage barabisaba ndetse no kuri iyi radio yanyu”.

Kuri  23/3/2015 umuyobozi w’ishyaka PDC Mme Agnes Mukabaranga yabwiye iyo radio ko ishyaka ryabo rishyigikiye icyo abaturage bari gusaba. Umunyamakuru yamubajije niba ishyaka ryabo ridafite uwategeka igihugu, ati ibyo uzabimbaze ikindi gihe.

Ikigaragara muri ibi ni kwa kudatinyuka kw’abayobozi dufite mu Rwanda basingiza gusa, ariko ntibatinyuke kuvuga icyo bafite ku mutima. None barabazwa ibyo guhindura itegeko nshinga, kuko bazi ko kurihindura ari ukuryica nkana, kuko ingingo bifuza guhindura ari “Ndahindurwa”, bakihisha inyuma y’abaturage !

Kuri 21/3/2015 radio Flash mu kiganiro ku byasohotse mu itangazamakuru, umwe mu banyamakuru yavuze ko atajya abona abatavuga ko ingingo y’i 101 itahindurwa. Ariko ubutumwa yabonye muri icyo kiganiro abenshi ni abamubwiye ko batifuza ihinduka ry’iriya ngingo. Bamubwiye ko batari bakwiye kujya babaza abo mu ruhande rumwe gusa.

Mu gusesengura ibyavuzwe na ambassadeur wa EU mu Rwanda mu kiganiro cya City radio cyo kuwa 24/3/2015, aho yavuze ko mu Rwanda hakwiye gukurikizwa icyo abaturage bavuga niba babivuga nta gahato bashyizweho, mbere yo guha ijambo abateze amatwi icyo kiganiro, Umunyamakuru yibukije ko ubwo bakoraga ikiganiro nkicyo ubushize, ku bantu 50 bahamagaye, 5 bonyine aribo bifuzaga ihinduka ry’itegeko nshinga (10%). Ati iby’abanyarwanda biterwa n’uko baramutse. Mugenzi we ati, biragoye kumenya icyo umunyarwanda atekereza. Batanga micro, abahamagaye bari 17, abifuza ko président Kagame ataguma k’ubutegetsi bari 11 kuri 6!

None se abayobozi n’itangazamakuru rya Leta cyanga iriyibogamiyeho, bari kutubwira ngo abaturage barashaka ko Kagame aguma k’ubutegetsi, baravugira umubare ungana ute ?

Kuba dufite ubutegetsi butorohera abatangaza ibitekerezo binyuranye n’ibyabwo ni ikibazo; kuko iyo umuturage umuhaye micro imbere ya camera avuga ibyo ubutegetsi bushaka. Yaba ari guhamagarira aho ntawe umureba akavuga icyo afite k’umutima.

Gukoresha référendum mu gihugu amatora adakorwa mu mucyo nabyo ntabwo ari igisubizo ku kumenya icyo abanyarwanda bifuza. Hashoboka ibintu 2 gusa:

  1. Niba koko ubutegetsi bwa Kagame bwifitiye ikizere mbere yo gukoresha référendum, nibubanze bufungure amarembo ya politique, butange ubwisanzure habeho impaka kuri iyi ngingo ;
  2. Abanyarwanda gushirika ubwoba bagasezerera ubutegetsi bwa Kagame mu mahoro, tugaha u Rwanda ubutegetsi bujyanye naho ibihe bigeze. Mwibuke ko ntawe uzaduhindurira ibintu atari twe ubwacu. Mu bihugu duturanye abaturage, imiryango itegamiye kuri Leta n’abanyepolitiki bahagurukiye kurengera itegeko nshinga ryabo, Amahanga nayo arabashyigikira; None mu Rwanda abari ku ngoma baratubeshyera tugakoma mu mashyi. Abibwira ko amahanga azategeka Kagame kubahiriza itegekonshinga, twe ba mbere bireba twiyicariye cyangwa twijujutira munzu iwacu, turibeshya.

Ni duhaguruke duharanire uburenganzira bwacu. Niduharanire ko ingingo y’i 101 iba “Ndahindurwa”.

Jean-acques Matabaro; amakuruki.com
25/03/2015

2017: Niba FPR idashoboye kwishakamo undi mukandida, nibise abashaka gukorera igihugu ibyiza, turahari.

images

Muri Demokarasi ububasha bwa rubanda ntibugira rutangira, n’iyo rubanda ihisemo kugira  aho ishyira ibihato ingufu zibishyizeho ni nazo zibikuraho : ni cyo gisobanuro (esprit de la loi) cy’ingingo y’193 y’Itegekonshinga ryo mu 2013. Kuba byaragenwe ko nta mushinga wo kuvugurura iyo ngingo y’193 ushobora kwakirwa (clause intangible) bifite ishingiro n’injyana. Koko rero Itegekonshinga ntiriva mu ijuru, rikorwa n’abantu. Guhindura ingingo iyi cyangwa iriya sibyo byakabaye ikibazo. Uretse n’ingingo  imwe cyangwa ebyiri zaryo, Itegekonshinga ryose uko ryakabaye rishobora kuvaho hagashyirwaho irindi, isi igakomeza ikazenguruka, ndetse ikaba  yazenguruka neza kurusha mbere.

1. Itegekonshinga  ryo mu 2003 si ryo rya mbere u Rwanda rwagize. Ryaje risimbura iryo ryasanze naryo rifite iryaribanjirije.  Guhindura ingingo yaryo y’101 sibyo byakabaye ikibazo, iyo biba koko biri mu nyungu za rubanda (nyamwinshi !) .

2. Ikibazo gikomereye rubanda muri iki gihe si ukumva icyo  itegekonshinga ryo mu 2003  rivuga (interpretation de la loi). Icyo rubanda yifuzaga  mu gusezerera ingoma ya cyami  n’ubungubu nticyahindutse , ni  nacyo mu by’ukuri kigaragarira mu ngingo y’101 : ni uko byakwemerwa na bose, bikubahirizwa n’abayobozi,  ko ubutegetsi bwose ari ubw’abaturage , bukaba mbere na mbere bugomba gukorera  inyungu z’abaturage,  bityo inzozi z’abitwa ko bavukanye imbuto  bacyibwira ko bavukiye gutegeka, abandi benegihugu bakavukira kubabera abagaragu, zikagenda nk’ifuni iheze !

3. Ikibazo nyakuri kiduhangayikishije twese ntawe utakibona uretse abigiza nkana : ni uko Paul Kagame n’Agatsiko ke nta yindi mpamvu igaragara bafite yo guhindura ingingo y’101 y’itegekonshinga uretse inyungu bwite  z’Agatsiko  rukumbi  kamaze imyaka isaga 21 ku butegetsi, kakaba karabukoresheje uko kishakiye mu kwimakaza iterabwoba no  kwikubira ibyiza byose by’igihugu,  none ubu kakaba  gashaka « gukorogoshora Itegekonshinga » kagamije gusa  kwihambira ku butegetsi no guheza rubanda mu icuraburindi ry’ingoma y’igitugu. Ibi se ninde wabyemera !?

4. Icy’ingenzi kigomba kumvikana ni uko Itegekonshinga, uko ryaba ryarashyizweho kose, intege nke ryaba rigaragaza zose, iyo  ryatowe n’abaturage, ntiripfa guhindagurwa uko abantu biboneye kose, ku mpamvu ibonetse yose.

5. Niba rero ishyaka rya FPR riri ku butegetsi  nta bantu bazima rikigira, rikaba ridashoboye kwishakamo  undi mukandida  ryakwamamaza  mu matora y’umukuru w’igihugu yo mu 2017 , niryemere ko ricyuye igihe, ribise abashaka gukorera igihugu ibyiza, turahari .

6.Niba kandi bigaragaye ko  Abacurabwenge ba FPR  bacyibereye mu 1959, bakaba bacyibitseho imitekerereze y’ingoma ya cyami twaserereye mu myaka 50  ishize, bakaba koko bumva  bafite umuntu umwe rukumbi wavukanye imbuto, ngo ugomba  gutegeka  Abanyarwanda kugera ku iherezo ry’isi, nibakenyere bahangane na Revolisiyo ya rubanda kuko ibintu bigiye kubashyuhana, « match » ikabarenga,  bakabura iyo bakwirwa.

7.Ndongera kwemeza ko  ikibazo Abanyarwanda bafite muri iki gihe atari Itegekonshinga ! Rirahari . Kurivugurura, hagahindurwa  ibikwiye guhinduka  nta kibazo byakagombye gutera ariko « kurikorogoshora » mu nyungu z’Agatsiko , rubanda ntizabyihanganira .

8. Reka  nanone nibutse  abibagirwa vuba ko Perezida Blaise Compaore wa Burkina Faso, wari umaze imyaka 27 ku butegetsi,  abaturage baherutse kumwirukankana (28-31/10/2014) mu gihe Inteko Ishinga amategeko yari iteranye iri guhindura ingingo ya 37 y’Itegekonshinga ryo kuwa 11/4/2000,  hagamijwe kumufasha kongera kwiyamamaza kandi yari arangije manda yemererwa n’iri tegeko nshinga.

9. Hafi yacu, abaturage baherutse kuvudukana Perezida Joseph Kabila wa Repubulika Iharanira Demokarasi ya Kongo kuko yashakaga guhindura ingingo ya 220 y’itegekonshinga ryo mu 2006 kugira ngo  arenge kuri manda ebyiri yemererwaga n’iryo tegeko,  bityo ngo mu mwaka utaha w’2016 azashobore kongera kwitoresha  ! Icyakora Joseph Kabila  we yabonye bimukomeranye, kubera abaturage bavuye hasi,  yisubiraho, asaba rubanda imbabazi,  ahagarika ivugururwa, umutekano wagarutse ari uko abanje gutangariza ku mugaragaro ko atazongera kurota yitoresha mu 2016.

10.Mu gihugu tuvuga rumwe cy’Uburundi naho ishyamba si ryeru : ubushake bwa Perezida  Petero Nkurunziza bwo gushaka kongera kwitoresha nabwo bukomeje gukurura amahane . Uko bizarangira turabyiteze twese mu minsi ya vuba aha. Birabe ibyuya…..

Izi ngero z’ibibera ahandi zikwiye gutuma natwe twibaza ariko tukanisubiza :

11.Aho   Paul Kagame n’Abanyagatsiko be , mu gushaka guhindura ingingo y’101 ngo Kagame ahame ku butegetsi ubuziraherezo , nabo ntibaba bagambiriye gukora Abanyawanda mu jisho kugira ngo barebe niba koko iterabwoba  ryarabagize ibikange bidasubirwaho ?   Icyo tuzi  neza ni kimwe: ni uko  iryo ngirwa-vugururwa bashaka kudutura hejuru rishobora  gukururira kabutindi impumyi za FPR zisa n’izitareba neza ngo zibone uburemere bw’akaga Abanyarwanda bakomeje gushyirwamo n’ubutegetsi bw’igitugu bwa Paul Kagame !

12.Turasaba urubyiruko rw’u Rwanda gukanguka rukitegura kwamaga rwivuye inyuma  KUDETA (Putsch Constutitionnel)  Kagame n’abambari be biteguye gukorera Itegekonshinga ry’u Rwanda kuko ishobora gusubiza igihugu cyacu mu miborogo, igasenya n’ibyiza byose byagezweho. Ejo hazaza heza ntihashobora gutegurwa n’abategetsi bikunda, bakorera inda zabo gusa, birengagije akaga ka rubanda rugufi.

13.Dukomeje guhamagarira abenegihugu bose, Abatutsi, Abahutu ,Abatwa n’abandi bahawe ubwenegihugu,  kuba maso maze igihe cyagera bagaha Kagame n’abambari be ISOMO ry’uko twasezereye  ingoma ya cyami, gihake na gikolonize bikajyana  ! Ntitwiteguye rero gusubira inyuma ho  imyaka 50 yose !

Muri make, Perezida Paul Kagame arangije Manda ze yemererwa n’itegekonshinga ryo mu 2003(art 101),  si we kamara, nagende, hatorwe undi mukuru w’igihugu,  u Rwanda rukomeze inzira y’iterambere risangiwe na bose .

Padiri Thomas Nahimana,

Umukandida w’Ishyaka Ishema

mu matora y’umukuru w’igihugu yo mu 2017

Umwihariko wa Revolisiyo: inkunga yo kwirukana Agatsiko ntizabura ! Ariko nanone si Abazungu bazadutangirira ikivi.

Ni koko Abaturage nibo bafite urufunguzo rw’impinduka mu Rwanda. Paul Kagame n’agatsiko ayoboye bameze nk’uwo munyagitugu uhagaze ku rubaho narwo ruhagaritswe na rubanda. Uko byamera kose umuturage navuga “NO” nta kizatubuza gukoresha ya mvugo y’abakuru ngo “agahuru k’imbwa karahiye”!

UMUTWE WA 9 : INKINGI 8 AGATSIKO K’INDOBANURE KUBAKIYEHO

Umwanzi w’Urwanda n’Abanyarwanda tumaze kumenya neza uwo ari we : ni Agatsiko k’Indobanure z’Abasirikare baturutse Uganda. Ntituzongera kwibeshya ngo twitiranye ibintu, ngo umwanzi tumwite Abatutsi cyangwa se Abahutu muri rusange. Agatsiko niko konyine mwanzi w’ibyiza, ni ko konyine tugomba kurwanya twivuye inyuma kugeza karekuye ubutegetsi. Ni bwo tuzabona gushyira mu bikorwa iriya myanzuro  igamije kuzahura igihugu no gusubiza Abanyarwanda icyizere cyo kubana mu mahoro.

Gusa rero mbere yo gushoza urugamba rwo gukuraho Agatsiko, hari ikintu gikomeye tugomba kwitondera : tugomba kumenya INKINGI zihagaritse kariya Gatsiko ruvumwa, ahasigaye tukazagenda turandura inkingi imwe imwe duhereye kuzitworoheye.

IBANGA RYA 45 : Inkingi ya mbere ni AMAFARANGA.

Agatsiko gafite amafaranga menshi cyane. Ay’igihugu cyose kayagize ayako bwite. Aho kugirango kayakoreshe mu byubaka igihugu, Agatsiko kayakoresha mu gutanga ruswa ihabwa Abazungu b’inda nini kugirango bakavuge neza. Andi menshi akoreshwa mu buryo bwo kwaya, ngo Agatsiko kagaragare neza, mbese nk’amwe atagira umubare akoreshwa mu bya siporo ! Andi mafaranga atagira ingano akoreshwa mu byo guhiga no kwica abenegihugu batemera guhakwa n’Agatsiko. Birababaje.

Aya mafaranga y’Agatsiko nta bwoba akwiye kudutera cyane kuko na Ben ALi wa Tuniziya yari afite inzu yuzuye inoti z’amadolari, amayero, amalivre yo mu Bwongereza… Abaturage baramuhagurukanye, arayata yose akizwa n’amaguru. N’amafaranga Paul Kagame yibye igihugu, azagaruka asubire mu isanduku. Ntawe upfa abimaze !

IBANGA RYA 46 : Inkingi ya 2 ni Ingengabitekerezo yitwa ngo “Kagame yahagaritse jenoside yakorewe Abatutsi”

Ubwo Agatsiko katangiraga intambara kerekanaga ko gafite ibitekerezo bihamye, nyamara ubu byose byarayoyotse ! Aho gucyura impunzi kazikubye karijana ; ibyo kuzana demokarasi byari amareshyamugeni gusa, yayandi atamutunga ; ibyiswe VISION 2020 yari amaco y’inda agamije kurya amafaranga y’Abazungu: umuturage akagororerwa gusenyerwa akazu ke ka nyakatsi kugirango Agatsiko gakunde kereke Abazungu ko amafaranga bagahaye yakoreshejwe mu kubakira Abanyarwanda bose inzu nziza z’amabati asize irangi (ngo niyo gahunda igezweho!). N’utundi dukinamico tubi tubi tugamije kurangaza abaturage, bariho bicwa n’inzara! Mu by’ukuri, Agatsiko kubakiye ubutegetsi bwako ku gitekerezo kimwe gusa ari cyo : “Abahutu bose bakoze jenoside, batsemba Abatutsi, Kagame w’intungane aba ari we utabara Abatutsi”. Ntawabura kubabazwa n’urwo Abatutsi bapfuye cyane cyane abatari bafite aho bahuriye n’umugambi wa FPR-Inkotanyi wo gufata ubutegetsi ku ngufu imaze kwivugana Abanyarwanda batagira ingano.

Gusa rero twamaze kubona neza ko iyi ngengabitekerezo ifite inenge nyinshi, ahanini kubera ko yubakiye ku kinyoma kizwi na bose. Ubu ntawe ugishidikanya ko uwambere watekereje ko kurimbura Abatutsi bari mu gihugu byamugirira akamaro (A qui profite le crime ?) ari Paul Kagame n’Agatsiko ke, we byahaye inzira yo kwifatira ubutegetsi akabona uko yikungahaza kugeza ubwo asigaye abarirwa mu baherwe bo kuri iyi si !

Jenoside yakozwe muri 1994, ntiyamanutse mu ijuru ngo itugwe hejuru, yewe nta n’ubwo yapfupfunutse mu butaka nk’igihumyo ! Jenoside yo mu 1994, yakurikiye iraswa ry’indege ya Perezida Habyarimana, yaje ari indunduro y’intambara y’isubiranamo ry’abanyagihugu yarangiye nabi (Une simple guerre pour le pouvoir qui a mal tourné). Kagame yashatse kwifatira ubutegetsi yibwira ngo bizamworohera, intambara ayikorana ubugome burenze urugero, isaza Abenegihugu benshi biroha mu bwicanyi, bityo ihitana benshi, Abatutsi, Abahutu n’Abatwa ! Byaragaragaye ko bose bava amaraso! Intambara yatangiye mu 1990 ni “guerre civile” kuko impande zombi zitanaga abanzi zari zigizwe n’Abanyarwanda gusa. Iyo biza kwemezwa ko ari igihugu cya Uganda cyateye Urwanda tariki ya 1 Ukwakira 1990, yari kwitwa intambara gusa (guerre), yenda amateka y’igihugu cyacu aba yaranditswe ukundi ! Iyo ntambara ni yo yabaye NYIRABAYAZANA, uwayiteje azabibazwe. Hariho inzira nyinshi zo gukemura ibibazo, ariko inyota y’ubutegetsi ya Paul Kagame yo yanze gushira itagaritse ingogo.

Ubundi kandi tuzi ko muri 1994 Paul Kagame yarwanyije yivuye inyuma igitekerezo cyo kwita “jenoside” ubwicanyi bwakurikiye ihanurwa ry’indege ya Habyarimana mu ijoro ryo ku itariki ya 6 rishyira iya 7 Mata 1994. Yifuzaga ko byitwa intambara gusa kuko atashakaga ko byitwa ko yarwaniye Abatutsi bonyine. Nyamara ngo “ugukanira ni we umenya urugukwiye”. Abanyamerika bamurushije ijwi, bamubeshya ko kwemeza jenoside Abahutu aribyo bizamugumisha ku ngoma igihe kirekire. Nyamara baramubeshye, none bigiye kumukoraho !

Ariko se mu by’ukuri wasobanura ute ko ubwoko bw’Abatutsi bugizwe na 15% by’abaturarwanda, bukorerwa jenoside n’Abahutu bose babarirwa muri 85%, hanyuma muri icyo gihe Abatutsi barimo bicwa bagahindukira bagafata n’Ubutegetsi ku ngufu ? Nta handi byabaye ku isi! Ubwo se abari bafite ingufu si abashoboye gufata ubutegetsi ? Dore icyo bisobanura :

(1) Abahutu nta mugambi bigeze bafatira hamwe wo kurimbura Abatutsi, n’Urukiko mpuzamahanga rwashyiriweho Urwanda rukorera Arusha (TPIR) ntirwashoboye kwemeza ko uwo mupango waba warabayeho ku ruhande rw’Abahutu.

(2) Abahutu bose ntibishe Abatutsi kuko iyo babyiyemeza nta Mututsi wari mu Rwanda wajyaga kurokoka.

(3) Abahutu benshi cyane nabo barishwe, kandi kubica nacyo ni icyaha, kandi bishwe n’Interahamwe barongera bicwa na Paul Kagame n’Agatsiko ke.

(4) Guhera muri 1990, na Paul Kagame yishe Abatutsi batari bake, abicira ahantu hanyuranye, nk’uko yakunze kwivugira ngo « Umututsi ni uwo turi kumwe ku Mulindi…Ntawe ukora umuleti atamennye amagi… Abatutsi bari mu Rwanda ntaho batandukaniye n’Interahamwe…. Abatutsi bari mu Rwanda bagomba kuba ibitambo…Yabujije ingabo za Loni gutabara Abatutsi igihe bicwaga (1994), avuga ko we aribubyirangirize, ko ingabo z’amahanga nizibyivangamo azifata nk’abanzi akazirasaho… ». Ibyo kandi bigaragazwa n’Ubuhamya bunyuranye bw’abakoranye na we nka Riyetona Abdul Ruzibiza, Jean Marie Vianney Ndagijimana (Kagame a sacrifié les Tutsi ), n’abandi.

(5) Niba kandi abishe abantu benshi ari abajenosideri, Paul Kagame n’Agatsiko ke nibo bishe benshi kuko n’Abahutu 8000 batsinze i Kibeho ku manywa y’ihangu ari abantu atari inyamaswa ; ibihumbi amagana n’amagana batsinze muri Kongo, Loni ikaba yararangije kwemeza ko bizitwa jenoside n’Urukiko (Reba Raporo Mapping).

Muri make Paul Kagame n’Agatsiko ke ni Abajenosideri nk’Interahamwe amahanga yose yakuyeho amaboko, zikaba zikomeje gushyikirizwa inkiko. KAGAME n’Agatsiko ke nabo BAGOMBA gufatwa bagashyikirizwa ubutabera kuko ari abicanyi bazwi na bose. Abicanyi bose ni bamwe, nyina ubabyara ni umwe, umwanya wabo nturi muri Prezidansi ya Repubulika y’Urwanda, aderesi yabo iri muri Gereza yitwa 1930, NTA KUNDI BYAGENDA.

Iturufu ya Kagame wahagaritse jenoside agatabara Abatutsi, iturufu y’Abahutu bose batsembye Abatutsi …Paul Kagame nayibike, yarangije kuba IKIGARASHA GICITSE ! Muri iki gihe, umwanzi w’Urwanda n’Abanyarwanda ni Paul Kagame n’Agatsiko bonyine ! Niko bimeze.

IBANGA RYA 47 : Inkingi ya 3 : Ingabo z’Igihugu

Paul Kagame n’Agatsiko k’Indobanure z’Abasirikari baturutse Uganda bafashe ubutegetsi ku ngufu, bafashijwe n’umutwe w’ingabo zakoreraga ako Gatsiko. Nyamara nyuma yo gufata ubutegetsi muri 1994, hatangiye gahunda yo kubaka ingabo z’igihugu zidakorera Agatsiko ahubwo zishinzwe kurinda umutekano w’Abanyagihugu.

Tuzi neza ko Ingabo z’Igihugu (APR) nazo ziri ku ngoyi y’Agatsiko nk’iyo Abanyarwanda twese turiho. Ziyoborwa n’abicanyi kabuhariwe amahanga yarangije gutera imboni, akaba asaba ko bafatwa bagashyikirizwa ubutabera.

Ubu rero igihe kirageze ngo RDF ihitemo : Ngabo z’Urwanda, nimuhitemo gukomeza kwibera Ingabo z’Umunyagitugu Paul Kagame n’agaco ke karembeje Abanyarwanda, cyangwa se muhitemo kubahiriza inshingano yanyu, mube INGABO z’Igihugu koko zirengera Abaturage, zikwiye kwizerwa n’Abanyarwanda bose. Guhitamo neza ni ugufasha Abaturage kwigobotora igitugu cy’Agatsiko, abaturage bakishyiriraho Ubutegetsi bubabereye. Guhitamo nabi ni ugukomeza gutiza umurindi umwanzi w’igihugu ari we Paul Kagame n’Agatsiko. Byaba bibabaje mwibuzemo ingabo zishyira mu gaciro ngo zifashe abandi guhitamo uruhande rwiza, rwo gushyigikira rubanda rugufi.

Banyarwanda mwese mufite abana, abavandimwe n’inshuti muri RDF, nimushishikare mubagire inama bitandukanye n’umwanzi, inzira zikigendwa.

IBANGA RYA 48 : Inkingi ya 4 : Abihayimana n’abayobozi b’Amadini

Muri rusange Kiliziya gatolika n’andi madini kimwe n’imiryango y’Abihaye Imana bayoborwa n’abantu bajijutse. Benshi mu bayobozi bakuru b’amadini ni abantu baba barageze ku rwego rwa nyuma rw’icyubahiro bashobora guhabwa kuri iyi si. Birumvikana ko bamwe muri bo icyo baba bifuza ari ukurengera intebe zabo, nuko bakirinda ikintu cyose cyatuma ibintu bihinduka mu gihugu. Nyamara muri iki gihe, abo bihayimana n’abayobozi b’amadini yo mu Rwanda bazi neza akarengane abaturage bahura nako ; ntibayobewe kandi uko Agatsiko gasahura igihugu ariko bahisemo KWITURAMIRA. Kuko bibwira mu mitima yabo ko « kubabara biruta gupfa », bahisemo kwicecekera, bakabaho. Icyo birengagiza ni uko atari abaturage nk’abandi kuko bo bahamagariwe kumurikira rubanda : « niyo mpamvu ari bo bahamagarirwa guhara amagara yabo mbere y’abandi…. ». Ikindi batayobewe ni uko guceceka kwabo bibashyira mu ruhande rw’abashyigikiye amarorerwa Agatsiko gakomeje gukora : « Utaturwanya aba ari kumwe natwe ». None se ubwo kurundira hamwe n’Ikirura cyica intama, ni wo mwanya ukwiye Abashumba ?

Uko mbibona, intama zugarijwe n’Ikirura zigiye guhaguruka zisige Abashumba inyuma, niba batikubise agashyi ngo bakanguke, barekere aho kugona kandi ibintu bicika ! Ubwo se hari ukundi kunyagwa kutari uko ? Kuba umucancuro hari ikindi bivuga ?

Abapadiri, Abapasitori na ba Imamu babana n’abaturage iyo mu mashyamba, mu giturage no mu mijyi ; bazi imisaraba iremereye Agatsiko gahekesha abaturage buri saha, buri munsi, buri cyumweru, buri kwezi, buri mwaka ! Iyo bashishikariye kubaba hafi no kubahumuriza, bifasha abaturage kutaganzwa n’ukwiheba. Gusa rero abo bayobozi b’amadini nibatere indi ntambwe kugirango iyobokamana bigisha ritaba iryo gusinziriza abaturage gusa kugira ngo urupfu rubatware bahumirije : Religion opium du peuple ! Umunsi abaturage bakangutse amadini atabafashije, bazabyarana abo . Hari ahandi byabaye !

Intambwe abihayimana n’abakuru b’amadini bakwiye gutera ni iyo gutinyuka kubwira abayoboke b’Imana ko Imana ifasha uwifashije…ko nibadahagaruka ngo barwanye Agatsiko, bishyirireho ubutegetsi bubanogeye, nta kindi Imana basenga yabamarira ! Ibyo kandi ntibitandukanye n’ubutumwa bashinzwe bwo kogeza Ingoma y’Imana mu bantu. Bazabe se baribagiwe ijambo ry’Imana rigira riti ,  « La gloire de Dieu, c’est l’homme vivant » ? None se Bakozi b’Imana, ubu koko mwakwihandagaza mukemeza ko Abanyarwanda bariho ? Bariho batariho, ntimubiyobewe. Mu rugero byabaturukaho, nimuve hasi, mubafashe kubona ubuzima busendereye.

IBANGA RYA 49 : Inkingi ya 5 : Incabwenge zirituramiye

Icyo nkundira Paul Kagame ni uko yivugira ibintu uko bimujemo, uwabene nta handi aba aduhishe ! Iyo yiyamiriye ati « Injiji ziba mu bize » ni uko hari icyo aba yabonye ! We ubwe ntiyagize amahirwe yo kwiga cyane ngo agire za Degrees ! Habe n’imwe yifitiye. Ni nayo mpamvu yikundira gukorana n’abajenerali nka IBINGIRA, batazi aho umubare utandukanira n’inyuguti. Icyo bazi cyane ni ukurasa gusa!

Bafata ubutegetsi, ntibari bizeye ko kumenya kurasa gusa byabaha amahirwe yo kwigarurira igihugu, imyaka ikaba irenze 21 ! Batinyaga ko incabwenge zizatera hejuru zikamagana politiki ya humirizankuyobore y’Agatsiko. Siko byagenze. Impamvu ni uko Agatsiko kabanje gufata abo gashyikiriye karabasogota, abandi kababika muri Gereza. Abenshi babonye Agatsiko kaje nabi, bafata inzira baragahunga . Abize basigaye mu gihugu ntibavuga, baracecetse biteye ubwoba.

Ku rundi ruhande hari abize batari bake bahisemo gukorera Agatsiko, mbese nk’uriya Dogiteri Karangwa Kirizologi wabaye Inzobere mu kwibira Kagame amajwi. Abandi ni bariya bagize Leta n’Inteko Ishingamategeko bahisemo kwibera les« Collaborateurs » b’Agatsiko: Ibyo kuba Intumwa za rubanda babishyize ku ruhande, bakajya basinyira gusa ibyo Agatisko kifuza, bakabihemberwa umushahara utubutse. Aba bose nibo Paul Kagame yitegereza, ati ntimukankangishe ayo ma degrees yanyu ya Fake, ntacyo mumariye rubanda, muri “Injiji” gusa!

Nyamara Kagame aribeshya, uwize aba yarize. Umwihariko w’Abize ni uko bamenya gusoma ibimenyetso by’ibihe, bakamenya guteganya igihe imvura izagwira, kandi bikaba byo ! Nk’ubu barangije kubona neza ko umuyaga w’amahindura watangiye guhuhana ingufu : the wind of change is blowing ! Kagame we n’Agatsiko ntabyo bazi, ntibazi no gupima agaciro bifite. Umunsi umwe, bariya ba COLLABO bihaye akanyabugabo bakamwigarika, Kagame n’Agatsiko ke babura iyo barigitira.

Icyo abize bashyigikiye Agatsiko bakwiye kwemera ni uko igihe cyo guhitamo nyine ari ikinginki : nimuhitemo rubanda cyangwa Agatsiko kari mu marembera. Niba muhisemo Abaturage, nimubasubize ijwi Agatsiko kari karabambuye, muvuge akababaro kabo kandi mukore iyo bwabaga mubabe hafi mu nzira yo kwibohoza barimo gutangira. Rubanda ntijya iyoberwa kugororera INTWARI no guhana INGAMBANYI.

IBANGA RYA 50 :Inkingi ya 6: Itangazamakuru rikorera Agatsiko

Agatsiko kikundira ko abaturage baguma mu icuraburindi, ntibamenye amakuru y’ibyabaye mu gihugu n’ibikorwa hanze yacyo. Ibinyamakuru byo mu gihugu Agatsiko karabyigaruriye, ibindi karabifunga. Ibitangazamakuru byo mu Rwanda ntibivuga ukuri, ubutumwa bwabyo ni ukurengera inyungu z’Agatsiko gusa, no kubeshya amahanga ngo Urwanda rwabaye paradizo !

Ni ngombwa ko dukoresha uburyo bwose bushoboka ngo Abanyarwanda n’Abanyamahanga bamenyeshwe amakuru nyayo, basobanurirwe imikorere mibi n’imigambi mibisha y’Agatsiko. Nihakoreshwe Interneti, Radio na Televisiyo mpuzamahanga, Email, Facebook, Twitter, Radiyorunwa,…ariko amakuru agere ku baturage.  

Munyarwanda wese ushyigikiye ko ibintu byahinduka mu Rwanda, shyiraho akawe : agakuru usomye ukumva hari icyo kakunguye, nturare utakagejeje ku bavandimwe n’incuti, nka 5 nibura.

IBANGA RYA 51 : Inkingi ya 7 : Ibihugu by’amahanga

Ntawahakana ko ibihugu by’amahanga byashyigikiye Kagame n’Agatsiko ke, bikamufasha urugamba kugera bimuteretse ku butegetsi i Kigali ! Birazwi ko ibyo bihugu ari Amerika n’Ubwongereza. Ariko burya Abazungu ntibapfa gufasha gusa, baba banacunze inyungu zabo. Abari bizeye ko Paul Kagame azarengera inyungu zabo igihe kirekire barangije kumukuraho icyizere kubera amakosa ye menshi nk’ay’ingurube. Ubu abo bamufashije barihakanira bagatsemba bavuga ko ubwicanyi yakomeje gukorera Abanyarwanda n’abaturanyi batigeze babumushyigikiramo, ko alri we wenyine ukwiye kubibazwa n’abo yahemukiye. Gufunga abanyapolitiki batavuga rumwe n’Agatsiko, kwica no kujujubya Abanyamakuru bigenga, kujya kurasira impunzi mu mahanga no kuzoherereza amarozi …. ibyo byaha byose bikomeye (crimes) byatumye Abazungu bamukuraho amaboko ku buryo asigaye yarahindutse “un allié genant ”. Mbese ntawe ugiterwa ishema no kuba yaramufashije, ndetse ahubwo hari abatakimuha n’akaboko mu gihe abandi bavugira ku mugaragaro ko batigeze bamumenya. Bishatse kuvuga ngo uwamubakiza, amaherezo bazamugororera. Kumubakiza si ukumwica, ni ukumufata agashyikirizwa ubutabera kuko ari War Criminal. Niho ageze.

Abakiririmba ngo Kagame ashyigikiwe n’amahanga, nibamenye ko baba bari mu zasabwe ! Nawe se, dore noneho ageze aho gusaba uwo yimye…ba Bafaransa atahwemye gukerensa no guciraho nibo ategerejeho amakiriro : Nyamara burya Abazungu bo bazi kwandika, ntibajya bibagirwa, utabazi abihenuraho! Ni ko Kagame yabigenje !

IBANGA RYA 52 : Inkingi ya 8: Ubwoba bw’Abaturage

Iki ni ikibazo gikomeye. Abaturage babura kugira ubwoba bate mu gihe ntawe bafite wabatabara ? “Ushoboye kubatabara ni we abaturage bumvira », iri ni ibanga rikomeye rya politiki!

Gusa rero twibaze neza : kuki Abaturarwanda muri rusange batinya Kagame n’Agatsiko ke ? Ni uko bakoresha iterabwoba bakaba badatinya kurasa Abaturage! Muri make n’ubundi, Agatsiko ntigasanzwe gatabara abaturage ahubwo karabatera. Ibyo kandi kabikoze kuva na kera, kicira abantu mu manama, kakabatsinda mu nkambi i Kibeho ; kiciye Abepiskopi i Gakurazo, karasa abaturage ba Gisenyi na Ruhengeri gakoresheje za Kajugujugu, katsinze benshi mu nkambi no mu mashyamba ya Kongo…..Muri iyi myaka kongeye kwadukana ingeso yo gutera za gerenade muri gare no mu masoko kugira ngo hapfe umubare mwinshi w’Abaturage ! Reka tubishyire mu mibare :

Abanyarwanda bicwa buri munsi + abarigiswa + abicwa n’inzara + abagwa mu buroko + abicwa n’ubukene + abicwa n’indwara badashobora kwivuza X imyaka 2 Kagame asigaje (2017) = nka miliyoni y’inzirakarengane ! Twiyemeje guhagurukana Kagame n’Agatsiko ke bakavaho uyu mwaka, yenda Kagame yahitana abantu nka 500, ariko haba harokotse miliyoni ! Kandi ikibazo kikaba kirakemutse burundu, abazabaho bakiruhutsa !

Biragaragarira buri wese ko n’ubundi nta wundi mukiro abaturage bateze ku Gatsiko ! Iyaba abaturage batakomezaga kwicwa uruhongohongo, twagira ubwoba bwo kwikorereza Agatsiko. Nyamara n’ubundi barapfa kandi baracyapfa ari benshi! None se n’ubundi ko nta gihe Agatsiko katatwishe, turacyatinya iki kindi kiruta icyo twabonye ?

Ikizwi nk’ihame ni uko abaturage ubwacu turamutse duhagurutse, tukavuga ku mugaragaro ko dusezereye Agatsiko, n’iyo kakoresha indege za BOMBARDIERS katurasa, amaherezo AMAHANGA yadutabara ! Kadafi yagerageje kurasa abaturage ba Libiya, aho ageze ni ho Kagame agana, nadasubiza ubwenge ku gihe!

Ni koko amahanga arwaye Paul Kagame n’Agatsiko ke. Erega si Abanyarwanda bonyine Agatsiko kishe ! Ibihugu by’Abazungu birakubita agatoki ku kandi bitegereje ko Abanyarwanda ubwabo bahaguruka bagafata iyambere, inkunga yo kwirukana Agatsiko ntizabura ! Ariko nanone si Abazungu bazadutangirira ikivi, iryo naryo ni ibanga rikomeye rya politiki! Ubwo se AHASIGAYE SI AHACU ?

Biracyaza…

Niba ufite icyo ushaka gusobanuza, watwandikira kuri aderesi ikurikira: ishema_party@yahoo.fr cyangwa se ugasura urubuga http://www.ishemaparty.mobi ukatwandikira ukoresheje uburyo bwateganyijwe. Ushobora no gusura imbuga zacu kuri facebook.

Abaturage bo mu karere ka Gasabo bigaragambije bahangana n’ubutegetsi.

DSC_0629-2-732a1
Abaturage bari barakaye cyane

Kuri uyu wa Kabiri tariki ya 24 Gashyantare 2015 mu Mudugudu wa Muhozi, Akagari ka Kinyaga, Umurenge wa Bumbogo ho mu Karere ka Gasabo nyuma y’ uko ubuyobozi bw’Umudugudu bufatanyije n’inzego z’umutekano (DASSO) basenyeye umuturage, abaturage bagenzi be bagumutse biyemeza guhangana n’ababasenyeye kugeza aho nabo bari bagiye gusenyera Umuyobozi ushinzwe umutekano mu Mudugudu, bashinja ubuyobozi bw’inzego zibanze ruswa ikabaje bigatuma barenganya mugenzi wabo.

Uyu mutegarugori witwa Bamurange Nadia wariraga cyane avuza induru, yadutangarije ko ubwo yari Kimironko akumva baramuhamagaye kuri telefoni ngo naze arebe inzu ye abagize Komite y’Umudugudu bari kuyisenya, ahageze asanga koko bamaze kuyishyira hasi.

Ubwo twahageraga twasanze abaturage benshi mu mihanda bugufi bw’ahari inzu, aho ingabo z’u Rwanda zitabajwe baje guhosha izo mvururu kuko abaturage basaga nk’abariye karugu bahiga Umukuru w’umudugudu, n’uwa Kagali, ari nako bari bamaze kubuzwa gutera amabuye ku nzu y’ushinzwe umutekano muri uwo mudugudu.

Nk’uko ababonye biba twahasanze babidutanagrije, abaturage bamaze kubona iyi nzu isenywe, bavuze ko uyu mudamu ari we wabonewe kuko nkuko babitweretse iyi nzu ikikijwe n’izindi ziri kuzamurwa mu buryo bumwe, we bikavugwa ko yajijijwe ko yanze guha abo bayobozi b’inzego zibanze ruswa igera kubihumbi 400 uteranyije. Ibi bikaba ari byo byahembereye uburakari bw’abaturage.

Ubwo abagize DASSO bahisemo gukuramo akabo karenge, umupolisi wari uhari yashatse kubakangisha imbunda abereka ko ashaka kurasa yakokingaga (to choke), ntibyabakanga bagahitamo kumwegera no kumusingira.

Aba baturage byagaragaraga ko bariye karungu, byabaye ngombwa ko hitabazwa ingabo z’igihugu ndetse n’Umuyobozi w’Umurenge nawe yari amaze kuhagera bagerageza kwegera abaturage, berekeza aho inzu yasenywe, ari nabwo Ubuyobozi bw’Umurenge bwahise bubakoresha inama y’igitaraganya., nyuma y’umwanya munini ariko abaturage banze gutuza.

N’ubwo wasangaga abaturage bose bemeza ko ibyo byose biri guterwa n’umuyobozi mushya w’Umurenge Nduwayezu Alfred (kuko atarahamara igihe kigeze ku mezi abiri) ndetse bemeza ko bifuza ko harebwa ahandi ajyanwa kuyobora, nyuma yo gukorana inama nabo bagaragaje ko hari uko bari bamuzi atameze aho banamwibwiriye ko bamufataga nk’Igikoko.

Aba abaturage bavugaga ko abayobozi b’Imidugudu iyo baje kugira icyo babasaba gukora babawira ngo gira vuba “Umulasita atariyizira” (izina abo bayobozi b’imidugudu bahaye uw’Umurenge) ku buryo ngo abataramumenya bumvaga ateye ubwoba.

Uyu muyobozi yabasabye gushyiraho umunsi bumva bagahura bakaganira kuri ibyo bibazo ariko abanenga cyane ku kibazo cyo kwihorera bashatse kugaragaza, ababwira ko ikibazo cyose bagira bagishyikiriza inzego zibishinzwe, ariko bakirinda uwo muco wo kwihorera.

JPEG - 690.8 ko
Bamurange Nadia yicaye mu itongo arira

Mu kiganiro twagiranye na Bamurange nyiri ugusenyerwa ubwo twasanga arira cyane, yadutanagarije ko ibi byabanjirijwe n’umuyobozi w’Akagari wamuhamagaye akamubwira ngo bahurire muri Gare ya Kimironko baganire ku by’inzu ye yubatse nta byangombwa afite.

Bamurange ngo yahuye n’uyu Muyobozi ngo nyuma amusaba ko yaba amushakiye amafaranga ya ruswa ibihumbi 50 ariko undi yanga kuyamuha amubwira ko kubera ibikorwa byo kubaka ntayo yabona, akemeza ko hafi ya buri munsi yajyaga amuhamagara agamije kumwaka iyo ruswa, nkuko yabyerekanaga muri telefoni ye.

Umuyobozi w’Umurenge wa Bumbogo, Nduwayezu Alfred yadutangarije ko kubera ikibazo cy’uburyo Umujyi uri gukura kandi ari ahantu usanga hakiboneka ibibanza bya make, hari kuboneka ibibazo by’abahaza benshi bashaka gutanguranwa batura mu buryo butemewe n’amategeko nabo bagafatirana babakumira kugira ngo hubahirizwe igishushanyo- mbonera, ari byo bikurura ibi bibazo.

Kuwa Kane w’icyumweru gishize, ngo nibwo baje baramusenyera ariko bahirika uruhande rumwe rw’inzu, ariko nyuma nawe arongera araruzamura, aribwo ubu bongeraga kuyihirika yose.

Mu gihe Bamurange yiyemerera ko yubatse iyi nzu abizi ko nta byangombwa afite kubera amafaranga ngo yacibwaga agasanga atayafite, ahuza n’abaturanyi be bose bemeza ko hari izindi nzu ndetse zirimo n’izo begeranye bubakiye rimwe kandi nazo zidafite ibyangombwa ariko zo abamusenyeye bakababirinda kuzirebaho.

Kuba Ubuyobozi bw’Imidugudu bwaba buri mu bagira uruhare muri iki gikorwa byagarutsweho n’impande zose aho abaturage bagaragaza ko bakwa ruswa bakemererwa kubaka utayitanze ntiyemererwe. Aha byashimangiwe n’umuyobozi w’Umurenge wagaragaje ko bidashoboka ko inzu yubakwa ikarenda yuzura igasakarwa, igakingwa Umuyobozi w’Umudugudu atabizi.

Bamurange Nadia wasenyewe iyi nzu afite abana babiri n’umugabo, ubusanzwe akaba akodesha mu Murenge wa Kimironko. Inzu ye yasenywe yari imaze gusakarwa no gukingwa, ikaba yari ifite ibyumba bitatu na salo.

Urugi rumwe ndetse n’amabati 36 yari ayisakaye, nyuma yo kuyisenya abakoze iki gikorwa bahise babipakira imodoka babijyana ku Murenge.

JPEG - 626.3 ko
Inzu yose bayishyize hasi
JPEG - 577.5 ko
Amarira yari yose, Bamurange avuga ko yazize kwanga gutanga ruswa
JPEG - 775.4 ko
JPEG - 428.2 ko
Umuyobozi w’Umurenge wa Bumbogo mu nama yo guhosha abaturage
Inkuru dukesha Makuruki.com 24/02/2015