Kizito Mihigo (ibumoso) ni umwe mu Batutsi barokotse jenoside  FPR irimo gusonga.

 Paul Kagame ( iburyo) aramutse yanze gushyikirana akagwa mu ntambara yaba yizize.

Mu Rwanda ibintu bihabera biteye agahinda kenshi. Kuva tariki ya 7 Mata umuhanzi w’icyamamare kandi ukiri mutoya yafashwe na polisi afungirwa ahantu hatabona, amazwa iminsi itatu ntawe umureba ku buryo rwose urupfu rwari hafi. Amaze kumvishwa ko ashobora no gupfa kandi isi igakomeza igatembera, nibwo noneho yashyizwe kuri tortures zikomeye kugira ngo yemere ibyo aregwa byose. Icy’ingenzi mu byaha aregwa ni uko ngo yifuje ko aho kugira ngo habe intambara mu gihugu imara abaturage, ahubwo hapfa umuntu umwe ari we Paul Kagame.

Iyo ukurikiye neza uburyo bivugwa, usanga Kizito atari we ucura wo mugambi ahubwo uwo mugambi ucurwa na Kagame we ubwe. Muti kuki? Impamvu ni uko iri yicwa rya Kagame rivugishwa amatama yombi n’abantu umuntu atanahamya ko babishoboye (iyo babishobora ntaba yarabamarishije ibiziriko), mu by’ukuri rituruka kuko Kagame yanze imishyikirano. Hashize imyaka myinshi Abanyarwanda basaba ko Paul Kagame yakwemera hakaba imishyikirano hagati y’Abanyarwanda igahuza FPR n’abayirwanya, abihayimana, sosiyete sivile, abahagarariye amashyirahamwe y’abakozi n’imiryango itegamiye kuri Leta kugira ngo tuganire ku mateka yacu nta gucengana. Ibi biganiro bitaziguye kandi bizira ikinyoma nibyo byatanga umurongo nyawo w’ubwiyunge bw’Abanyarwanda. Ikibazo rero cyakomeje kuba ingorabahizi kuko Leta ya Kigali yavuniye ibiti mu matwi ikikomereza urugendo nk’aho ntacyo biyibwiye. Hagati aho kandi niko Abanyarwanda b’ingeri nyinshi bakomeje kwicwa urubozo bagafungirwa ubusa, bagatorongezwa, abasigaye bagahindurwa inkomamashyi n’abagererwa mu gihugu cyabo ubu cyigaruriwe n’agatsiko gatoya k’abasirikare bakuriye mu nkambi z’impunzi muri Uganda ndetse n’abandi birirwaga mu mihanda ya Kampala bacuruza ibiyobyabwenge.

Kuba rero bamwe mu Banyarwanda bumva niba ibiganiro binaniranye wenda hari indi nzira banyuramo ndumva bitabazwa bo, ahubwo bikwiye kwirengerwa n’uwanze ko ibyo biganiro bibaho. Gusa rero na none dukurikije amateka yacu ya vuba, gushoza intambara bamwe bavuga ko ngo izaba ngufiya cyane, tuzi neza ko yamena amaraso y’inzirakarengane.( Niyo mpamvu hari amashyaka  nk’ ISHEMA abona intambara idakwiye kugirwa priority). Aha niho Kizito Mihigo atuje yatanze igitekerezo ati aho kwitura inabI izo nzirakarengane , ni kuki uwo wanze ko ibiganiro bibaho atari we wabibazwa ariko abandi bakagira amahoro?

Iki gitekerezo cya Kizito rero nicyo ubucamanza bw’u Rwanda bwahereyeho buyicuranga buyica imirya ngo aha ishyano ryacitse umurizo. Gusa mu byerekeye amategeko, nta kimenyetso na kimwe cyerekana ko Kizito atari kugera nyuma akisubiraho mbere y’uko ibyo biba cyane cyane ko nta n’aho agaragaza uko uwo mugambi uzagenda. Paul Kagame nabimenye. Guhera uyu munsi ashatse yakoresha izo nkomamashyi ze z’abacamanza agafunga u Rwanda rwose kuko Abanyarwanda 75 % bamwifuriza gupfa wenyine aho kwanga imishyikirano maze bikaba byabyara intambara izamara abenegihugu. Ese ubundi byaba bitwaye iki niba umuntu umwe apfuye kugira ngo hakire ubuzima bwa benshi? Kagame nawe yagombye kwishimira kuba yapfa ariko agakiza benshi niba ari wo muti wonyine usigaye. Bityo twamwandika  no mu gitabo cy’intwari!

Igitangaje si uko Kagame yapfa, kuko n’ubundi twese ntawe utazapfa. Ikindi hari umuntu  w’inshuti yanjye uhora atwibutsa ko no hakurya y’urupfu hari ubugingo. Ariko nanone kwambura umuntu ubuzima bihanirwa n’amategeko. Kubitekereza gusa utabishyize mu bikorwa ntacyo byamutwara akaba ariyo mpamvu bidakwiye kugenderwaho ngo umuntu akorerwe dosiye. Igikomeye ahubwo ni iyo igikorwa cyabayeho. Ku itariki ya 1 /10/1990 umutwe w’inyeshyamba wiyise Inkotanyi ukaba wari ugizwe n’abana bakomoka ku wundi mutwe wari wariyise Inyenzi( Ingangurarugo ziyemeje kuba Ingenzi) wagize igitekerezo cyo kwica abanyarwanda bo mu bwoko bw’abahutu. Ntibyahagarariye ku gitekerezo gusa kuko byashyizwe no mu bikorwa. Uyu mutwe wakoze umugambi wo kurasa Habyarimana ndetse ubishyira mu bikorwa. Sijye ubivuga ahubwo abari bahibereye barabyemeza. Ni ukuvuga ko abagize uyu mutwe ntibabaye ibigwari nka Kizito uvugisha umunwa gusa, ahubwo bo babishyize no mu bikorwa maze ku itariki ya 6 Mata 1994 Habyarimana yicirwa hamwe na Ntaryamira. Ibitekerezo n’imipango byashyizwe mu bikorwa nyamara nta wigeze abatunga agatoki kugeza n’ubu. Iryo yicwa rya Habyarimana niryo ryakuruye iyicwa ry’umubyeyi wa Kizito nyamara nta wigeze avugira Kizito uretse kumwambika ishati bakajya bahora bamubwira ngo “iyo shati ntuyanduze nijye wayiguhaye”! Ubonye iyaba na Kagame yarifurije Habyarimana gupfa ariko ntabikore? Wenda miliyoni z’abantu zapfuye ubu ziba ntaho zagiye.

Si Habyarimana wenyine kandi wishwe. Abasenyeri barishwe kandi ntibishwe n’amagambo yo kuri whatsapp na skype. Impunzi i Kibeho zishwe atari internet ikoreshejwe. Impunzi muri Congo zararimbaguwe biturutse mu mugambi wacuzwe ukanashyirwa mu bikorwa.

Icya ngombwa si ugufunga abana ngo batekereje kandi nyamara wirengagije aho ikiganiro cyaturutse. ” Niba Kagame yanze ibiganiro kuki atari we wakwicwa ariko imbaga y’abantu ikarokoka? Ng’ibi ibyo Kizito yavugaga. Niba Kagame ari umugabo yagombye kumva interuro yose atayiciyemo kabiri. Ikindi akiyemeza gushakra igihugu cyose icyiza dore ko akibifitiye Ubushobozi.

Uko mbibona ndasanga urubanza rwa Kizito rutazoroha. N’ubwo bamugumishije muri polisi amasaha arenze ateganywa n’itegeko ndetse bakamujyana mu rukiko ngo yemere bakamusubiza muri polisi aho ahozwa kuri torture, ubu igihe kirageze ngo ashyirwe muri gereza nk’abandi. Aha niho azajya avanwa ajya kuburana. Nagera imbere y’abancamanza urubanza rugiye gutangira mu mizi, Kizito azasobanura iby’iyicarubozo yakorewe ngo abyemere. Aha ni naho azahakana ibyo bamurega byose maze abe ahaye akazi katoroshye ubushinjacyaha ko kwerekana nta shiti ko Kizito yagize uruhare mu iyicwa rya Paul Kagame ritigeze ribaho! Nanone FPR ishobora kumushyiraho akarimi keza nka ka kandi yashyize ku abhutu bakikorera amadosiye ya jenoside ngo aha bazafungurwa bagera hanze bagasubizwamo. Kizito rero ashobora gushukishwa ko niyemera rwose bazamugabanyiriza ibihano maze agataha agasubira mu muryango. Ariko yibuke ko isura ye yamaze guhindana, uretse Imana yonyine niyo twizeye ko itazamuvaho naho abantu bo ntakibafite 100%. Kizito n’iyo yakatirwa amezi 6 gusa azaba afite ubusembwa bumwambura uburenganzira ku bintu byinshi mu gihugu. Ni yo mpamvu buriya ashatse yabona ko nta mnwanya azaba agifite mu gihugu amaze gufungurwa, keretse revolisiyo ya rubanda iri hafi kuba imufunguye.

Aho gutakaza umwanya bacira urubanza inzirakarengane ngo zatekereje, uwafata uwarashe indege ya Habyarimana, uwishe Abasenyeri  i Kabgayi n’impunzi i Kibeho, uwafungiye abantu mu buvumo bwa Mahoko muri Kanama… Abo bose ntibatekereje ngo banavuge gusa ahubwo babishyize no mu bikorwa.

Chaste Gahunde